ކުރީ ސަރުކާރުން ފެނަކައާ ހަވާލުކޮށްފައި ހުރި އައިސްޕްލާންޓުތައް މި މަސް ތެރޭގައި މިފްކޯގެ ދަށަށް ނަގަނީ
ކުރީ ސަރުކާރުގައި އައިސް ޕްލާންޓުތައް ފެނަކައާ ހަވާލުކުރުމަކީ ދެރަ ކޮށް ކޮށްފައި އޮތް ކަމެއް
ފިޝަރީޒް އެންޑް އޯޝަން ރިޒޯސަސް މިނިސްޓަރު އަހުމަދު ޝިޔާމް
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ފެނަކައާ ހަވާލުކޮށްފައި ހުރި ހުރިހާ އައިސްޕްލާންޓުތަކެއް މި މަސް ތެރޭގައި ސަރުކާރުގެ މަސް ކުންފުނި މިފްކޯގެ ދަށަށް ނަގާނެ ކަމަށް ފިޝަރީޒް އެންޑް އޯޝަން ރިޒޯސަސް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
ވަޒީރާ ސުވާލުކުރުމުގެ ފުރުސަތުގައި ތުޅާދޫ ދާއިރާގެ މެންބަރު ހަންނާނު އަބޫބަކުރު ކުރި ސުވާލަކަށް ޖަވާބު ދެއްވަމުން ޝިޔާމް ވިދާޅުވީ ކުރީ ސަރުކާރުގައި އައިސް ޕްލާންޓުތައް ފެނަކައާ ހަވާލުކުރުމަކީ ދެރަކޮށް ކޮށްފައި އޮތް ކަމެއް ކަމަށާއި ފެނަކައާ ހަވާލުކޮށްފައި ހުރި ހުރިހާ އައިސްޕްލާންޓުތައް މި މަސް ތެރޭގައި އަލުން ސަރުކާރުގެ މަސް ކުންފުނި މިފްކޯގެ ދަށަށް ނަގާނެ ކަމަށެވެ.
ވަޒީރު ޝިޔާމު ވިދާޅުވީ އައިސްޕްލާންޓު ހަވާލުކޮށްފައި ހުރީ ކަރަންޓު ދޭ ފެނަކަ ކުންފުންޏާއި ކަމަށާއި އެ ކުންފުނީގައި އައިސް ޕްލާންޓާ ކުޅެން އެނގޭ މީހަކުވެސް ނެތްކަމަށެވެ. އެހެން ކަމުން ފެނަކައިން އައިސް ޕްލާންޓުތައް ރަނގަޅަށް ބެލެހެއްޓިފައި ނެތުމުން ގިނަ އައިސް ޕްލާންޓުތަކުގެ އޮޕަރޭޝަންވެސް ހުއްޓިފައިވާ ކަމަށް ވަޒީރު ޝިޔާމު ވިދާޅުވި އެވެ.
ވަޒީރު ޝިޔާމް ވިދާޅުވީ ރައީސް ޑރ. މުހައްމަދު މުއިއްޒުގެ މި ސަރުކާރު އައި އިރު، މިދިއަ ސަރުކާރުން ފެނަކަ އާއި ހަވާލުކުރި އައިސް ޕްލާންޓުތައް ރަނގަޅަށް ބެލެހެއްޓިފައި ނެތުމުން، އޮޕަރޭޝަންތައް ހުއްޓިފައި ހުރި ނަމަވެސް މިހާރު އެ ޕްލާންޓުތައް އޮޕަރޭޝަނަށް ގެނެވިފައިވާ ކަމަށެވެ. އަދި ފެނަކައިގެ ބެލުމުގެ ދަށުގައި ހުރި ހުރިހާ އައިސް ޕްލާންޓެއް މިނިސްޓްރީގެ ބެލުމުގެ ދަށަށް ގެންނާނެ ކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ އައިސް ޕްލާންޓުތައް ފެނަކައިގެ ބެލުމުގެ ދަށުގައި ހުންނާނީ މި މަހުގެ 15 ވަނަ ދުވަހާއި ހަމައަށް ކަމަށާއި އޭގެ ފަހުން އެ ޕްލާންޓުތައް ހުންނާނީ މިފްކޯފެ ބެލުމުގެ ދަށުގައި ކަމަށެވެ. އަދި އައިސް ޕްލާންޓުތަކަށް ބަރޯސާވުން ނިމުމަކަށް ގެނައުމަށްޓަަކައި ދޯނިތަކުގައި އާރްއެސްޑަބްލިއު ނިޒާމު ގާއިމުކުރުމުގެ މަސައްކަތް ކުރިއަށްދާނެ ކަމަށް ވެސް ވަޒީރު ވިދާޅުވިއެވެ.
