އެޗްޑީސީގެ މުވައްޒަފުންގެ ބޯނަސް އަށްވާ ފައިސާގެ އަދަދު ސިސްޓަމް އިން ކުރިން ދެއްކި ނަމަވެސް މިހާރު އެ އަދަދު ފެންނާކަށް ނެތް!
11 ފެބުރުއަރީ 2025 | އަންގާރަ 04:33އުސޫލެއްގެ ގޮތުން އެޗްޑީސީ އިން އަހަރީ ބޯނަސް ދެމުން އަންނަނީ އެ އަހަރެއްގެ ބޯނަސް ޖެހިގެން އަންނަ އަހަރު މުވައްޒަފުންނަށް ލިބޭ ގޮތަށް
އެޗްޑީސީ އޮފީސް ހުންނަ އިމާރާތް
ހައުސިންގ ޑިވެލޮޕްމެންޓު ކޯޕަރޭޝަނުގެ މުވައްޒަފުންނަށް އަހަރަކު އެއްފަހަރު ދެމުން އައި ބޯނަސްގެ ތެރެއިން 2023 ވަނަ އަހަރުގެ ބޯނަސް އަދިވެސް ނުދޭކަން ހާމަވެއްޖެއެވެ.
އާއްމުކޮށް އަމަލުކުރާ އުސޫލަށް ބަލާއިރު އެޗްޑީސީ އިން އަހަރީ ބޯނަސް ދެމުން އަންނަނީ އެ އަހަރެއްގެ ބޯނަސް ޖެހިގެން އަންނަ އަހަރު މުވައްޒަފުންނަށް ލިބޭ ގޮތަށެވެ. އެ އެލަވަންސް ދެމުން ދަނީ އޯޓީ ފިޔަވާ މުސާރަ އާއި އިނާޔަތުގެ ގޮތުގައި ލިބޭ މުސާރައިގެ ނިސްބަތުން ބެލުމަށް ފަހު ކަނޑައަޅާ ވަކި މިންވަރެއް ހުރިހާ މުވައްޒަފުންނަށް ލިބޭ ގޮތަށެވެ. ކޮންމެ އަހަރެއްގެ ވެސް އޯގަސްޓު މަހުގެ ކުރިން ނިމިދިޔަ އަހަރުގެ އަހަރީ ބޯނަސް ސްޓާފުންނަށް ފޯރުކޮށްދިން ނަމަވެސް 2023 ވަނަ އަހަރީ ބޯނަސް މި ހިސާބަށް ވެސް މުވައްޒަފުންނަށް ފޯރުކޮށްދީފައެއް ނުވެއެވެ. ނިމިދިޔަ އަހަރުގެ ސެޕްޓެމްބަރ މަހުން ފެށިގެން މުވައްޒަފުން އައީ ބޯނަސް ނުލިބި ލަސްވާތީ ކަންބޮޑުވުން ފާޅުކުރަމުންނެވެ.
ހަމައެއާއި އެކު މި މައްސަލައިގައި ގޮތެއް ނިންމުމަށް ބާރު އެޅުމަށް އެޗްޑީސީގެ މުވައްޒަފުން އައީ އެ ކުންފުނީގެ މެނޭޖްމެންޓަށް ވަރަށް ބޮޑަށް ޕްރެޝަރކުރަމުންކަން ފާހަގަކުރެވެއެވެ. އެގޮތުން އެޗްޑީސީގެ އެކި ޑިޕާޓްމެންޓްތަކަށް ނިސްބަތްވާ މުވައްޒަފުން ވަނީ އެކަމާއި ގުޅިގެން ކަންބޮޑުވުން ފާޅުކުރުމަށް އަމިއްލަ އަށް އިސްނަގައިގެން ވައިބަރ ގްރޫޕެއް އެކުލަވާލާ، މި މައްސަލައިގައި ކަންބޮޑުވުން ފާޅުކޮށްފައެވެ. ނަން ހާމަ ނުކުރުމަށް ޝަރުތުކުރުމަށް ފަހު ރާއްޖެއެމްވީ އާއި މައުލޫމާތު ހިއްސާކުރި މީހަކު ބުނި ގޮތުގައި އެ ވައިބަރ ގްރޫޕްގައި އެކުންފުނީގެ ގިނަ އަަދަދެއްގެ މުވައްޒަފުން ހިމެނެއެވެ. އަދި މި މައްސަލައިގައި ގޮތެއް ނިންމުން އަވަސްކުރުމަށް މުވައްޒަފުން ގޮވާލަމުން އައި ކަމަށް އޭނާ ވަނީ ބުނެފައެވެ.
އެހެންކަމުން މުވައްޒަފުންގެ ފަރާތުން ކުރިމަތިވި ޕްރެޝަރ ބޮޑުވެ، ނިމިދިޔަ މަހު އެކަމާއި ގުޅޭ ގޮތުން އެޗްޑީސީގެ ބޯޑުގައި މަޝްވަރާކުރުމަށް ފަހު ގޮތެއް ނިންމާފައިވާ ކަމަށް މި ނޫހަށް ވަނީ މައުލޫމާތު ލިބިފައެވެ. މުއުތަބަރު ގޮތަކަށް ރާއްޖެއެމްވީ އަށް މައުލޫމާތު ލިބިފައިވާ ގޮތުގައި 2023ގެ އަހަރީ ބޯނަސް މުވައްޒަފުންނަށް ދިނުމަށް ނިންމާ އެކަމާއި ގުޅޭ މައުލޫމާތު ފިނޭންސް މިނިސްޓްރީ އަށް ވަނީ ފޮނުވާފައެވެ. އަދި މިހާރު މުވައްޒަފުންނަށް ބޯނަސް ދިނުމުގެ މަރުހަލާ ހުއްޓިފައި އޮތީ ފިނޭންސް މިނިސްޓްރީ އާއި ހިސާބުން ކަމަށް ވެސް ވަނީ އެނގިފައެވެ. އެހެންނަމަވެސް ރަސްމީކޮށް އެ މައުލޫމާތު މުވައްޒަފުންނާ ހިއްސާކޮށްފައި ނުވާކަން ވެސް ރާއްޖެއެމްވީ އަށް ވަނީ ކަށަވަރުވެފައެވެ.
މި ނޫހަށް މައުލޫމާތު ދިން އިތުރު މީހަކު ނަން ހާމަ ނުކުރުމަށް ޝަރުތުކޮށް ބުނީ އެޗްޑީސީގެ ބޯނަސްއަށްވާ ފައިސާ ނަގާ ސަރުކާރުގެ އެހެނިހެން ކަންކަމަށް ބޭނުންކޮށްފައިވާ ކަމަށް މައުލޫމާތު ލިބިފައިވާ ކަމަށެވެ. އަދި ކުރިން ބޯނަސް އަށްވާ ފައިސާގެ އަދަދު ސިސްޓަމް އިން ދެއްކި ނަމަވެސް މިހާރު އެ އަދަދު ނުފެންނަ ކަމަށް އެޗްޑީސީގެ ފިނޭންސް ޑިޕާޓްމެންޓާއި ހަވާލާދީ އެ މައުލޫމާތު އެނގޭ މީހަކު ވަނީ ރާއްޖެއެމްވީ އަށް ކިޔާދީފައެވެ. އެކަމާއި ގުޅޭގޮތުން އެޗްޑީސީގެ ބަހެއް ހޯދުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފައެވެ.
އެޗްޑީސީން 2023 ވަނަ އަހަރުގެ ބޯނަސް ނުދީ 2024 ނިންމާލާފައިވާއިރު އެ ބޯނަސް ލިބޭނެކަމަށް އުންމީދުކޮށްގެން ތިބި އެތައް މުވައްޒަފުންނެއް ތިބީ އެކަމާއި މެދު މާޔޫސްވެފައެވެ.
މީގެ އިތުރުން އެޗްޑީސީގެ 2023 ވަނަ އަހަރުގެ އަހަރީ ރިޕޯޓާއި، ކުންފުނީގެ އޮޑިޓް ރިޕޯޓްވެސް އެކުލަވާލާ އާއްމުކޮށްފައި ނުވާކަން ފާހަގަކޮށްލެވެއެވެ. ހަމައެހެންމެ 2023 ވަނަ އަހަރުގެ އަހަރީ އާއްމު ޖަލްސާވެސް އެ ކުންފުނިން ބާއްވާފައި ނުވާއިރު އެކަން ނުކުރާ ސަބަބެއް ވެސް ހާމަކޮށްފައެއް ނުވެއެވެ. ކޮންމެ އަހަރެއްގެ ވެސް އަހަރީ ރިޕޯޓާއި، އޮޑިޓް ރިޕޯޓް އެކުލަވާލަނީ ޖެހިގެން އަންނަ އަހަރެވެ. ކުންފުންޏަށް ލިބޭ ފައިދާ ދެނެގަނެ، ބޯނަސް ބަހަނީ ވެސް ޖެހިގެން އަންނަ އަހަރެވެ.
އެޗްޑީސީގެ މުވައްޒަފުންނަށް ކޮންމެ އަހަރަކު ވެސް އަހަރީ ބޯނަހުގެ ގޮތުގައި ޑަބަލް މުސާރަ ލިބެއެވެ. އެގޮތުން 2022 ވަނަ އަހަރު ވެސް 20،000ރ. އަށް ވުރެ ބޮޑު އަދަދެއް އެ ކުންފުނީގެ މުވައްޒަފުންނަށް ބޯނަހުގެ ގޮތުގައި ވަނީ ލިބިފައެވެ.
