މި އިންސުލިން ޕެން ބޭނުން ކުރުމުގެ ހުއްދަ އޮތް ނަމަވެސް މި ބޭނުންކުރުމަށް ޑޮކްޓަރުން ރިކޮމެންޑެއް ނުކުރާނެ
ފަލަސުރުހީ ޕްރޮގްރާމްގައި ހެލްތު މިނިސްޓްރީގެ ކުރީގެ ސްޓޭޓް މިނިސްޓަރު އަދި އެމްޑީޕީގެ ހެލްތް ކޮމެޓީގެ ޗެއަރ އަހުމަދު އާދިލް ވާހަކަދައްކަވަނީ
މިސަރުކާރުގައި ރާއްޖެއަށް އެތެރެކުރާ އަގުހެޔޮ އިންސިއުލިން ޕެންއާމެދު ޑޮކްޓަރުން ވެސް ސުވާލު އުފައްދާފައިވާ ކަމަށާއި، ކޮލިޓިއާމެދު ޔަގީންކަމެއް ނެތް ކަމަށް ހެލްތު މިނިސްޓްރީގެ ކުރީގެ ސްޓޭޓް މިނިސްޓަރު އަދި އެމްޑީޕީގެ ހެލްތް ކޮމެޓީގެ ޗެއަރ އަހުމަދު އާދިލް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އާދިލް ވިދާޅުވީ ކުރީގެ ސަރުކާރުތަކުގައި ރާއްޖެއަށް އެތެރެކޮށްފައިވަނީ ފެންވަރު ރަނގަޅު އިންސިއުލިން ކަމަށާއި، ނަމަވެސް މިސަރުކާރުގައި އަގުހެޔޮކޮށް އެތެރެކޮށްފައިވާ އިންސިއުލިން ޕެންއާމެދު ސުވާލު އުފެދިފައިވާ ކަމަށެވެ. މި އިންސިއުލިން ޕެންއަކީ ކުރީގައި ލިބޭ އިންސިއުލިންއަށް ވުރެ މާ އަގުހެޔޮކޮށް ލިބޭ އެއްޗެއް ކަމަށް އޭނާ ވިދާޅުވިއެވެ.
އާދިލް ވިދާޅުވީ މި އިންސިއުލިން ޕެން ބޭނުން ކުރުމުގެ ހުއްދަ އޮތް ނަމަވެސް މި ބޭނުންކުރުމަށް ޑޮކްޓަރުން ރިކޮމެންޑް ނުކުރާ ކަމަށެވެ. އަދި ނޭޝަނަލް ޑައިބެޓިކްސް ސެންޓަރުގެ ވެސް ކަންބޮޑުވުންތަކެއް ހުރި ކަމަށް އާދިލް ވިދާޅުވިއެވެ.
މީގެ އިތުރުން އާދިލް ވިދާޅުވީ އިންސިއުލިން މި ޕެންއަކީ ދުނިޔޭގެ ފަގީރު 40 ގައުމަކަށް އެތެރެކުރާ އެއްޗެއް ކަމަށާއި، މި އުފައްދަނީ މެޑިކަލް ބޭހަށް އެކްސަސް ނުވާ ނިކަމެތި ފަގީރު ގައުމުތަކުގެ މީހުން ބޭނުން ކުރުމަށް ކަމަށެވެ. އެހެންކަމުން ރާއްޖެއަކީ އެފަދަ ދަރަޖާގައި އޮތް ގައުމެއް ތޯ އޭނާ ސުވާލު އުފެއްދެވިއެވެ.
ބަލްކް ޕްރޮކިއުމަންޓްގައި މިގެންނަ ބޭހަށް އިޝާރާތް ކުރައްވައި އާދިލް ވިދާޅުވީ އެއީ ރައީސް ޑރ.މުހައްމަދު މުއިއްޒު އެވިދާޅުވާ ފެންވަރު ރަނގަޅު ބޭހެއް ނޫން ކަމަށެވެ. އެހެންކަމުން ރައްޔިތުން އެކަމަށް ސަމާލުވެ އިތުރަށް ބަލަންޖެހޭ ކަމަށް އާދިލް ވިދާޅުވިއެވެ.
