ރާއްޖެ އެތެރެކުރާ ބިސް އެމްއެފްޑީއޭއިން މޮނީޓަރ ކުރަން ފަށައިފި
12 އޯގަސްޓު 2017 | ހޮނިހިރު 06:26މިކަމާގުޅިގެން އަޅަންޖެހޭ ފިޔަވަޅުތައް އަޚަމުންދާނެ ކަމަށް އެމްއެފްޑީއޭ އިން ބުނޭ
ފިޕްރޯނިލްގެ އަސަރުހުރުމުން މިލިއައަނަށް ވުރެ ގިނަ ބިސް ވަނީ ނައްތާލާފަ--ފޮޓޯ: ސީބީސީ ނިއުސް
ޔޫރަޕްގެ ބައެއް ގައުމުތަކާއި ހޮންގްކޮންގް އަށް އެތެރެކުރި ބިސްތަކަކުން ފިޕްރޯނިލް ހުރިކަން ހާމަކޮށްފައި ވާތީ، ރާއްޖެ އެތެރެކުރާ ބިސްތަކުގައި އޭގެ އަސަރު ހުރިތޯ ބެލުމަށް މޯލްޑިވްސް ފުޑް އެންޑް ޑްރަގް އޮތޯރިޓީން މޮނީޓަރ ކުރަން ފަށައިފި އެވެ.
އެމްއެފްޑީއޭއިން ކޮށްފައިވާ ޓްވީޓެއްގައި ބުނެފައިވަނީ ޔޫރަޕްގެ ބައެއް ގައުމުތަކަށް އެތެރެ ކޮށްފައިވާ ބިސްތަކަކުން ފިޕްރޯނިލްގެ އަސަރުހުރި ކަން ފެނިފައިވާތީ ރާއްޖެއަށް އެތެރެކުރާ ބިސްތަކުގައި އޭގެ އަސަރު ހުރިތޯ މޮނީޓަރކޮށް ވަރަށް ގާތުން ބަލަމުންދާ ކަމަށެވެ. އަދި އަޅަންޖެހޭ ފިޔަވަޅުތައް އަޅަމުންދާނެ ކަމަށްވެސް އެމްއެފްޑީއޭއިން ބުނެފައި ވެއެވެ.
ފިޕްރޯނިލްއަކީ ފަނިފަކްސާ ފަދަ ތަކެތި މެރުމަށް ބޭނުންކުރާ ކެމިކަލް އެކެވެ. ކުކުޅުގައި ފަނިފަކްސާ ފަދަ ތަކެތި އެޅުމުން އެކަމުން ސަލާމަތް ކުރުމަށް ފިޕްރޯނިލް ބޭނުން ކޮށްފައި ވާތީ އޭގެ އަސަރު ބިހަށް ކުރާނެ ކަމަށް ތަޖުރިބާކާރުން ބުނެއެވެ. އަދި ފިޕްރޯނިލް ފަދަ ކެމިކަލްތަކަކީ ވަކިވަރަކަށް ވުރެ ގިނައިން އިންސާނާގެ ހަށިގަނޑުގެ ތެރެއަށް އަސަރުކޮށްފިނަމަ އިންސާނާއަށް ސިއްހީ ބޮޑެތި ގެއްލުންތަކެއް ލިބޭނެ ކަމެއްކަމަށް ވެސް ސިއްހީ މާރުން ބުނެއެވެ.
ޔޫރަޕްގެ 15 ގައުމަކަށް އެތެރެކުރި ބިސްތަކަކުން ފިޕްރޯނިލްގެ އަސަރު ފެނިފައިވާއިރު، އެންމެ ގިނައިން ފެނިފައި ވަނީ ނެދަލޭންޑުން އެތެރެކުރި ބިސްތަކަކުން ކަމަށް ވެއެވެ.
ފިޕްރޯނިލް މައްސަލަ އާއި ގުޅިގެން ސެޕްޓެމްބަރު މަހުގެ ތެރޭގައި ޔޫރަޕްގައި މިކަންކަން ރެގިއުލޭޓް ކުރާ ފަރާތްތަކުން ވަނީ ބައްދަލު ކުރުމަށް ނިންމާފަ އެވެ.
