ބެނާތައް ނަގާ ތަކުރާރުކޮށް ހުރަސްއެޅުމުން ވެސް ދިއްދޫގައި ރައީސް މުއިއްޒުގެ އިސްތިއުފާއަށް ގޮވާ މުޒާހަރާކޮށް އަޑު އުފުލައިފި
އަންގާރަ ދުވަހު ރަސްމީ ދަތުރެއްގައި ރައީސް ޑރ. މުހައްމަދު މުއިއްޒު ހއ. ދިއްދޫއަށް ވަޑައިގަތުމުން އެ ރަށުގެ ބައެއް އާއްމުން ވަނީ އެމަނިކުފާނުގެ އިސްތިއުފާއަށް ގޮވާލާފަ
ދިއްދޫގައި ރައީސް މުއިއްޒު އާއި ދެކޮޅަށް ދަމާފައިވާ ބެނާތައް އަދި މުޒާހަރާގެ ތެރެއިން
ހއ. ދިއްދޫ އަށް ރައީސް ޑރ.މުހައްމަދު މުއިއްޒު ވަޑައިގަތުމުން އާއްމުން ނުކުމެ ރައީސާއި ދެކޮޅަށް ނުރުހުން ފާޅުކޮށް އިހުތިޖާޖުކޮށްފިއެވެ.
އަންގާރަ ދުވަހު ރަސްމީ ދަތުރެއްގައި ރައީސް ޑރ. މުހައްމަދު މުއިއްޒު ހއ. ދިއްދޫއަށް ވަޑައިގަތުމުން އެ ރަށުގެ ބައެއް އާއްމުން ވަނީ އެމަނިކުފާނުގެ އިސްތިއުފާއަށް ގޮވާލާފައެވެ. ފުލުހުން ވަނީ އެ މުޒާހަރާ އަށް ހުރަސް އަޅާ މުޒާހަރާގެ ބައިވެރިން ފަހަތަށް ޖައްސާފައެވެ.
އެ މުޒާހަރާގައި ބައިވެރިވި ދިއްދޫގެ އެމްޑީޕީގެ ހިންގާ ކޮމިޓީގަ ހިމެނިވަޑައިގަންނަވާ މަހްމޫދު ޝަފީގް (މަންޑޭ) ވިދާޅުވީ ފުލުހުން މުޒާހަރާގެ ބައިވެރިން ރައީސާއި ވީހާވެސް ދުރަށް ޖެއްސުމަށް މަސައްކަތް ކޮށްފައިވާ ކަމަށެވެ. ދިއްދޫ އަށް ރައީސް އަންގާރަ ދުވަހު އިރާކޮޅު ވަޑައިގަތުމުން އާއްމުން ވަނީ ރައީސް މުއިއްޒު އާއި މެދު ނުރުހުން ފާޅުކޮށް އެ މަނިކުފާނުގެ އިސްތިއުފާ އަށް ގޮވާފައެވެ.
މަންޑޭ ވިދާޅުވި ގޮތުގައި މުޒާހަރާ ކުރި އިރު ޕިކަޕެއްގައި އަޑުގަދަކުރާ ހަރުކޮށްގެން އާއްމުން އައީ އަޑު އުފުލަމުންނެވެ. އެހެންނަމަވެސް ފުލުހުން ވަނީ އެ އަޑު ކަނޑާލާ، އަޑުގަދަ ކުރާ ނަމަ ޕިކަޕް ފުލުހުންގެ ބެލުމުގެ ދަށަށް ގެންދާނެ ކަމަށް ބުނެ އިންޒާރުދީފައެވެ. އެ ހިސާބުން މުޒާހަރާގެ ބައިވެރިން ވަނީ ޕިކަޕް ދޫކޮށްލުމަށް ފަހު ބެނާ އާއި އެކު ރައީސް ހުންނެވި ހިސާބާއި ވީ އެންމެ ކައިރިއަކަށް ގޮސް އަޑު އުފުލާފައިކަން އޭނާ ވަނީ ފާހަގަކުރައްވާފައެވެ. މީގެ އިތުރުން އަންގާރަ ދުވަހުގެ ރޭ ދިއްދޫގައި ޕީއެންސީގެ އެއްވުން ބާއްވާ ސަރަހެއްދެއްގައި އާއްމު މީހެއްގެ ގޭގައި ބަހައްޓާފައި ހުރި އަޑުގަދަކުރާ ވެސް ނަގަން ފުލުހުން އެންގި ކަމަށް އޭނާ ވަނީ ވިދާޅުވެފައެވެ.
އެ އަޑުގަދަކުރާ އަކީ ރައީސް މުއިއްޒު ވަޑައިގެންނެވުމުގެ ކުރީއްސުރެ ހަރުކޮށްފައި ހުރި ސައުންޑަކަށް ވީ ނަމަވެސް އެ އަޑުގަދަކުރާ އެއްވެސް ވަރަކަށް ޖަލްސާ ކުރިއަށް ދާއިރު ބޭނުން ނުކުރުމަށާއި، ބޭނުން ކުރާ ނަމަ ފުލުހުން އެ ގެއަށް ވަދެ ވެސް އެކަން ހުއްޓުވާނެ ކަމަށް އިންޒާރު ދީފައިވާ ކަމަށް އޭނާ ވިދާޅުވިއެވެ. މީގެ އިތުރުން ރޭ ފަތިހު ފުލުހުން ވަނީ ޝުއޫރު ފާޅު ކުރަން އެ ރަށުގެ މަގުމަތީގައި ދަމާފައިވާ ބެނަރ ތަކުގެ ތެރެއިން 'ބަހުލޫލު' ޖަހާފައިވާ ބެނަރ ނަގާފައި ކަމަށް އޭނާ ވިދާޅުވިއެވެ.
އެކަން ކޮށްފައި ވަނީ ފަތިހުގެ ވަގުތުގައި ކަމަށާއި ފަހުން ރަށުތެރޭ ހުރި ހުރިހާ ބެނާއެއް ކައުންސިލް މުވައްޒަފުންނަށް އަންގައިގެން ދިއްދޫ ކައުންސިލުން ވަނީ ނަގާފައި ކަމަށް އޭނާ ވިދާޅުވިއެވެ.
ފުލުހުން އެ ބެނާތައް ނަގާފައި ވަނީ 'ބަހުލޫލު' އެއީ "އިޖުތިމާއީ މިންގަނޑުތަކަށް ނުފެތޭ އެއްޗެއް" ކަމަށް ބުނެކަމަށް ވެސް އޭނާ ވަނީ ފާހަގަކުރައްވާފައެވެ.
ރައީސް ޑރ. މުހައްމަދު މުއިއްޒު ހއ. ދިއްދޫ އަށް ވަޑައިގަންނަވާތީ އެރަށުގައި މުއިއްޒު އާ ދެކޮޅަށް ސުލްހަވެރިކަމާއެކު ޝުއޫރު ފާޅުކުރުން ހުއްޓުވުމަށް ވަނީ ތަކުރާރުކޮށް މަސައްކަތްކޮށްފައެވެ. ފުލުހުންނާއި ކައުންސިލް މެދުވެރިކޮށް އިދިކޮޅު ހަރަކާތްތަކަށް އެ ރަށުގައި ދަނީ ހުރަސް އަޅަމުންނެވެ.
އެގޮތުން މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ދިއްދޫ ދާއިރާގެ އިސް ދެ އޮފިޝަލަކު އާދިއްތަ ދުވަހުގެ ރޭ ފުލުހަށް ވަނީ ހާޒިރުކޮށްފިއެވެ. އަދި ދިއްދޫ ދާއިރާގެ އިސް ދެ އޮފިޝަލަކު ފުލުހަށް ހާޒިރު ކޮށް މައުލޫމާތު ސާފު ކޮށްފައިވާއިރު، ރައީސް މުއިއްޒު ދިއްދޫ އަށް ކުރައްވާ ދަތުރުފުޅަށް ހުރަސް އެޅޭ އެއްވެސް ކަމެއް ނުކުރުމަށް ދިއްދޫ ކައުންސިލުން އެމްޑީޕީ އަށް ވަނީ އަންގައިފައެވެ.
ޖެނުއަރީ މަހުގެ 28 ވާ އަންގާރަ ދުވަހުން 30 ވާ ބުރާސްފަތި ދުވަހުގެ ނިޔަލަށް މުއިއްޒު ކުރައްވާ މި ދަތުރުފުޅުގައި ހއ. ގެ 10 ރަށަކަށް ވަޑައިގަތުމަށް ވަނީ ހަމަޖެހިފައެވެ.
