ރައީސް މުއިއްޒުގެ ރޯލް މޮޑެލް އަބްދުއްރަހީމަށް ތިޔަ ހެއްދެވީ ކިހިނެއް؟

މިއީ ރާއްޖޭގެ ސިޔާސީ މަޝްރަހަށް ބަލާނަމަ އާކަމެއް ނޫނެވެ. ހައިރާންވެ، އަންތަރީސްވެ، ތަލިން ކުޅު ހިކޭ ވަރުގެ ކަމެއްވެސް ނޫނެވެ. މިއީ އަޅުގަނޑުމެންގެ ހަޔާތުގައިވެސް ތަކުރާރުކޮށް ފެނުނު މަންޒަރެކެވެ. ކައިރި މާޒީގައި ހިނގާފައިހުރި ކަންތައްތަކެވެ. ރައީސް މައުމޫނާއި ރައީސް ޔާމީންގެ ވަކިވުމާއި، ރައީސް ނަޝީދާއި ރައީސް ސާލިހުގެ ވަކިވުމާއި، ރައީސް ޔާމީނާއި އަބްދުއްރަހީމްގެ ވަކިވުން މިއީ މިފަދަ ބައެއް މިސާލުތަކެވެ. ނަމަވެސް އަބްދުއްރަހީމް އާއި މުއިއްޒު އާ ދެމެދުގައި މި އެޅި ރެނދު މިހާ ސީރިއަސް ކަމަކަށް ވަނީ ސަބަބުތަކެއް ނެތިއެއް ނޫނެވެ.

ހެޔޮކަމެއް ކޮށްދިން މީހަކަށް ތެޔޮހަމެކޭ ބުނާތީ އަހަމެވެ. ތިޔަ ހީފުޅު ކުރެއްވީ ރަނގަޅަށެވެ. ދައްކާލެވޭތޯ މިއުޅެނީ ރައީސް މުއިއްޒު، އަބްދުއްރަހީމްގެ ދެބަފައިންނަށް ދެއްވި ބޮޑު ދޯކާގެ ވާހަކައެވެ. ހެޔޮކޮށް ހިތި މީހާއަށް ދިން ބޮޑު ތެޔޮ ހަމުގެ ވާހަކައެވެ.

ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާއި އަޅާ ބަލާއިރު ރައީސް ޑރ. މުހައްމަދު މުއިއްޒަކީ ސިޔާސީ ގޮތުން ކުރިން މާ ބޮޑު އުރަތްޕެއް ހުރި ބޭފުޅެއް ނޫނެވެ. އެހާ މަގްބޫލް ބޭފުޅެއްވެސް ނޫނެވެ. މީހުން އެހާ ދަންނަ ބޭފުޅެއްވެސް ނޫނެވެ. ރައީސް މުއިއްޒު މީހުން ދަންނަ ނަމަ ދަންނަނީ ސިޔާސީ ގޮތުން ވަކި ފިކުރެއްގައި ދެމި ނުހުރެވޭ، މަޤާމާއި، ފުރުސަތައްޓަކައި ޕާޓީ ބަދަލުކުރައްވާ، މީހުންނާ ނުގުޅޭ، އަމިއްލަ އެދުން ބޮޑު ބޭފުޅެއްގެ ގޮތުގައެވެ. ނަމަވެސް މި ހުރިހާ ކަމެއް މިހެން ހުއްޓާ، 2023 ވަނަ އަހަރުގެ ރިޔާސީ އިންތިޚާބަށް ރައީސް މުއިއްޒުގެ އަތްޕުޅުގައި ހިފައިގެން، ޕީއެންސީގެ ރިޔާސީ ޓިކެޓް ދީގެން، ރައްޔިތުންގެ ކުރިމައްޗަށް ނުކުންނަވާ، މުއިއްޒު ރައްޔިތުންނަށް ދެއްކެވީ އަބްދުއްރަހީމެވެ. އަބްދުއްރަހީމްގެ އިބާރާތުން ނަމަ، މާ ދުރާލާ ޕްލޭން ކުރައްވައިގެން، މާ ކުރިއްސުރެ ރާއްވަވައިގެންނެވެ. އެކަމަށްޓަކައި އަބްދުއްރަހީމްގެ ސިޔާސީ ގިބުލަ ކަމުގައި ބެއްލެވި ރައީސް ޔާމީނާއި، އެ ޕާޓީވެސް ފަހަތަށް ދޫކޮށްލައްވާފައެވެ. އެއީ ހަމަ ހަގީގަތުގައިވެސް މީހަކު މީހަކަށްޓަކައި، މީހަކު މީހަކަށް ހެޔޮ އެދިގެން ވާނެ އެންމެ ބޮޑު އެއް ގުރުބާނީ އެވެ.

2023 ވަނަ އަހަރުގެ ރިޔާސީ އިންތިޚާބުގައި ރައީސް މުއިއްޒުގެ އަތްޕުޅުގައި ހިފައިގެން ނުކުމެ ރައްޔިތުންނަށް ދައްކަވާފައި ނިންމަވާލެއްވީ އެއް ނޫނެވެ. އިންތިހާޔަށް ކެމްޕެއިން ވެސް ކުރެއްވީއެވެ. އެހާ މަގްބޫލް ނޫން ޝަހްސިއްޔަތެއް ވިއްކަވަން ނުކުމެ މުޅި ރާއްޖޭގައި ދަތުރު ކުރެއްވީއެވެ. ރިޔާސީ އިންތިޚާބު ރައީސް މުއިއްޒުއަށް ކާމިޔާބު ކޮށްދެއްވުމަށް ފަހުވެސް އަބްދުއްރަހީމް މުއިއްޒު ދޫކޮށެއް ނުލައްވައެވެ. ރައްޔިތުންގެ މަޖިލީހުގެ ސުޕަ މެޖޯރިޓީ ހޯއްދަވާ ދެއްވުމަށް ގަދަ އަޅާ މަސައްކަތް ކުރެއްވީއެވެ. އަބްދުއްރަހީމަށް ރައީސް ޔާމީން ހައްދަވައިދެއްވި ޕީއެންސީގެ ރައީސް ކަމުގައި ހުންނަވާ، އެ މަގާމު ދޫކޮށްލައްވާ، ރައީސް މުއިއްޒުއަށް ޕީއެންސީގެ ރައީސްކަންވެސް ދެއްވީއެވެ.

މި ހުރިހާ ކަމެއްގެ ބަދަލުގައި ރައީސް މުއިއްޒު ވިދާޅުވަމުން ގެންދެވީ އަބްދުއްރަހީމް އަކީ އެމަނިކުފާނުގެ ރޯލް މޮޑެލް ކަމަށެވެ. ދުވަހަކު އަބްދުއްރަހީމް ދޫކޮށް ނުލައްވާނެ ކަމަށެވެ. މިކަން ސާބިތުކޮށްދެއްވުމަށް އަބްދުއްރަހީމްގެ ދަރިކަލުންނަށް ޓުއަރިޒަމް މިނިސްޓަރުކަން ދެއްވާ، އަބްދުއްރަހީމަށް ރައްޔިތުންގެ މަޖްލީހުގެ ރައީސްކަންވެސް ދެއްވީއެވެ.

ކޮންމެއަކަސް، ރައީސް މުއިއްޒު ވެރިކަމަށް ގެނައުމަށް ކުރެވުނު ބޮޑު މަސައްކަތުގައާއި، ރައީސް މުއިއްޒަށް މަޖްލީހުގެ ސުޕަ މެޖޯރިޓީ ހޯދައިދޭން ކުރެވުނު ބުރަ މަސައްކަތުގައާއި، ސަރުކާރު އުފެދުނީއްސުރެ އިއްޔެ މެންދުރާ ހަމައަށް، ސަރުކާރާއި ރައީސް މުއިއްޒު ދިފާއު ކުރެއްވުމާއި ޕްރޮމޯޓް ކުރެއްވުމުގެ އެންމެ ކުރީ ސަފަށް ނުކުމެ އަބްދުއްރަހީމްގެ ދެބަފައިން ގުރުބާން ވަމުން ދިޔައީ އިޚްލާސްތެރިކަމާއެކުގައި ކަމާމެދަކު ޝައްކެއް ނެތެވެ. ސިޔާސީ ޕޯޑިއަމް ތަކުގައާއި ޓީވީ ޕްރޮގްރާމްތަކުގައިވެސް ރައީސް މުއިއްޒަށް ތައުރީފް ކުރުމުގައި އަބްދުއްރަހީމާއި ދަރިކަލުން ފައިސަލް އުޅުއްވީ އެހެން މީހުންނަށްވުރެ މާ ކުރީގައެވެ. ރައީސް މުއިއްޒުގެ ހިތްޕުޅަށް އެއްވެސް ކިލަނބުކަމެއް އަތުވެދާނެ ކަމަށްޓަކައި ރައީސް މުއިއްޒަށް ދެވަނަ ދައުރެއް ދޭންޖެހޭ ވާހަކައާއި، ރައީސް މުއިއްޒު ދިހަ އަހަރު ވެރިކަމުގައި ހުންނަވާނެ ވާހަކައާއި، ރާއްޖޭގެ ވެރިކަމަށް އަބްދުއްރަހީމް ޝައުގުވެރި ނުވާ ވާހަކައާއި، ބަޔަކު ގަދަކަމުން ހަވާލުކުރަން އުޅުނަސް، އެކަމާ ހަވާލު ނުވާނެ ވާހަކަ ފަދަ އެތައް ވާހަކައެއް، އެތައް ފަހަރަކު އަބްދުއްރަހީމް ދައްކަވަމުން ގެންދެވީ މުއިއްޒަށް ވަފާތެރިކަމާއެކުގައި ކަމާމެދަކުވެސް ޝައްކެއް ނެތެވެ.

އެކަމަކު އާޚިރުގައި ކަން ހިނގިގޮތް ބައްލަވާށެވެ. ވެރިކަމަށް ރަނގަޅު އެއް އަހަރު ކިރިޔާ ހަމަވީތަނާހެން އެފަދަ އަބްދުއްރަހީމް ދުރުކުރައްވަން ފެއްޓެވީއެވެ. ވަފާތެރިކަމާ، އިޚްލާސްތެރިކަމާއެކު ކޮށްދިން ކަންކަން ހަނދުމަފުޅު ނެތި އަބްދުއްރަހީމް ބޭކާރު ކޮށްލައްވަން ފެއްޓެވީއެވެ. އެންމެ ފަހުންގޮސް ނުފެނި ނުދާނެ މަންޒަރުވެސް ފެނުނީއެވެ. އަބްދުއްރަހީމްގެ ދަރިކަލުން ފައިސަލް ޓުއަރިޒަމް މިނިސްޓަރު ކަމުގެ މަގާމުން ވަކި ކުރެއްވީއެވެ. އަބްދުއްރަހީމް ވިދާޅުވަނީ ވީގޮތެއް ނޭނގޭ ކަމަށެވެ. ރައީސް މުއިއްޒު އެކަން އެހެން ކުރައްވަންޖެހޭ ސަބަބެއްވެސް ނުއޮންނާނެ ކަމަށެވެ. އެ ދެބަފައިންވެސް މަސައްކަތް ކުރަމުން އައީ ވަފާތެރިކަމާއި އިހްލާސްތެރިކަމާއެކުގައި ކަމަށެވެ. އެކަމަކު އަބްދުއްރަހީމަށް ވެސް އެނގިވަޑައިގަންނަވާ ކަމެއް އެބަ އޮތެވެ. އެއީ އަބްދުއްރަހީމާއި ރައީސް މުއިއްޒުއާ ދޭތެރޭ އޮތް ގުޅުން ރަނގަޅުނަމަ ރައީސް މުއިއްޒު އެކަން އެގޮތަށް ނުކުރެއްވީސް ކަމެވެ.

ކޮންމެއަކަސް ގެންދަވާނީ ދައްކަވަންހުރި ތަނެއް ދައްކަވާފައޭ ބުނާތީ އަހަމެވެ. މިއީވެސް ދެއްކެވި މަންޒަރެކެވެ. ރައީސް މުއިއްޒު މީގެ ކުރިން އެއްލަވާލެއްވީ އެމަނިކުފާނުގެ އެއް އަތް ކަމުގައި ބުނެއުޅުނު ރަމީޒެވެ. މިފަހަރު އައިސް މި ލައްވާލީ އަބްދުއްރަހީމްގެ ގައިގައެވެ. ތިމާއަށް ޕާޓީގެ ޓިކެޓް ހޯދައިދީ، ތިމާ ޕްރޮމޯޓް ކުރަން އިޝްތިހާރުކޮށްދީ، ތިމާއަށް ތާއިދާއި ވޯޓު ހޯދަދީ، ތިމާ ރާއްޖޭގެ ރައީސްކަމަށް ހަދައިދިން އަބްދުއްރަހީމާއި އޭނާގެ ދަރިކަލުން މިއަދު ރައީސް މުއިއްޒު އެއްލަވާލެއްވުމުން އެއީ އެ މަނިކުފާނުގެ ފިތުރަތޭ ބުނެ ނިންމާލެވިދާނެތޯއެވެ؟ މީހެއްގެ ވިއްޔާ ގޮތެއްވެސް ހުންނަން ވާނެ ނޫންތޯއެވެ؟ އިހްސާންތެރި ކަމަކީވެސް އޮންނަ އެއްޗެކެވެ. އިންސާނިއްޔަތު ކަމަކީވެސް އޮންނަ އެއްޗެކެވެ. އެކަމަކު ރައީސް މުއިއްޒަށް މިހާވަރުވެސް ނުވި ދެއްތޯއެވެ.