ޖަރުމަނުގެ އެއްބަސްވުން އަނެއްކާ ވެސް ނާގަލްސްމަން އައު ކޮށްފި

ޖަރުމަނު ޤައުމީ ޓީމަށް އިރުޝާދު ދެމުން އަންނަ ހޫލިއަން ނާގަލްސްމަން، އެ ޓީމާ އެކު ސޮއި ކޮށްފައިވާ އެއްބަސްވުން އަނެއްކާ ވެސް އައު ކޮށްފި އެވެ.

ޖަރުމަނު ޤައުމީ ޓީމާ ނާގަލްސްމަން ހަވާލުވީ 2023 ވަނަ އަހަރުގެ ސެޕްޓެމްބަރު މަހުގެ ތެރޭގަ އެވެ. އޭގެ ފަހުން ޖެހިގެން އައި 2024 ވަނަ އަހަރު ނާގަލްސްމަން ވަނީ ޖަރުމަނުގެ އެއްބަސްވުން އައު ކޮށްފަ އެވެ. އެ ފަހަރު އޭނާ ސޮއި ކުރި އެއްބަސްވުމުގެ މުއްދަތު ހަމަވާން އޮތީ 2026 ވަނަ އަހަރު އޮންނަ ފީފާ ވޯލްޑް ކަޕްގެ ނިޔަލަށެވެ. ޖަރުމަނުން ނާގަލްސްމަންގެ އެއްބަސްވުން އައު ކުރިއިރު، ބައެއް ކުލަބުތަކުން އޭނާ ހޯދުމަށް ޝައުޤުވެރިކަން ވެސް ފާޅު ކުރި އެވެ.

އޭގެ ފަހުން އަނެއްކާ ނާގަލްސްމަން ވަނީ އިތުރު ދެ އަހަރަށް ޖަރުމަނުގެ އެއްބަސްވުން އައު ކޮށްފަ އެވެ. ދެ ވަނަ ފަހަރަށް ޖަރުމަނާ އެކު އޭނާ ސޮއި ކުރި އައު އެއްބަސްވުމުގެ މުއްދަތު ހަމަވާނީ 2028 ވަނަ އަހަރު އޮންނަ ޔޫރޯ ފުޓުބޯޅަ މުބާރާތުގެ ނިޔަލަށެވެ. އެހެންކަމުން 2026 ވަނަ އަހަރު އެމެރިކާ، ކެނެޑާ އަދި މެކްސިކޯގައި އޮންނަ ވޯލްޑް ކަޕްގެ އިތުރުން، އިންގްލެންޑު، އަޔަލެންޑު، ސްކޮޓްލެންޑް އަދި ވޭލްސްގައި އޮންނަ ޔޫރޯގައި ޖަރުމަނަށް އިރުޝާދު ދޭނީ ނާގަލްސްމަން އެވެ.

ނާގަލްސްމަންގެ އިރުޝާދުގެ ދަށުން މިހާތަނަށް ޖަރުމަނުން ވަނީ 19 މެޗެއް ކުޅެފަ އެވެ. އޭގެ ތެރެއިން 11 މެޗުން އެ ޓީމު ވަނީ މޮޅުވެފަ އެވެ. ފަސް މެޗު އެއްވަރުވެފައިވާއިރު، ތިން މެޗަކުން ވަނީީ ބަލިވެފަ އެވެ.

ޖަރުމަނާ ހަވާލުވުމުގެ ކުރިން ނާގަލްސްމަން ވަނީ ހޮފެންހައިމް، އާރްބީ ލައިޕްޒިގް އަދި ބަޔާން މިއުނިކަށް ވެސް އިރުޝާދު ދީފަ އެވެ.