ޕަބްލިކް ވަރކް ސައިޓްތައް ހެދުމަކީ އިންވެސްޓްމަންޓެއް ކަމަށާއި، މި ހިނގާ 2025 ވަނަ އަހަރުގެ ތެރޭގައި ރާއްޖޭގެ ކޮންމެ އަތޮޅެއްގައި ޕަބްލިކް ވަރކްސް ޔުނިޓެއް ގާއިމްކުރާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރ.އަތޮޅު މާކުރަތަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ރައީސް މުއިއްޒު ވިދާޅުވީ ރ އަތޮޅުގައި ޕަބްލިކް ވަރކްސް ޚިދުމަތް ދޭ މަރުކަޒު ގާއިމުކުރާނީ މާކުރަތުގައި ކަމަށެވެ.
ތަރައްގީއަށް ހިންގާ ގިނަ މަޝްރޫއުތަކެއްގެ ދުރު ރާސްތާއަށް ބަލާއިރު އެފަދަ ތަންތަން ބެލެހެއްޓުމަށް ޕަބްލިކް ވަރކްސް ޚިދުމަތަކީ އިންތިހާއަށް މުހިންމު ކަމެއްކަން ފާހަގަކުރައްވައި ރައީސް މުއިއްޒު ވިދާޅުވީ، މިއީ އެއްވެސް ހާލެއްގައި ބޭކާރުވެގެންދާ ޚަރަދެއް ނޫން ކަމަށެވެ. އަދި ދުރު ރާސްތާއަށް ބަލާއިރު، އުމްރާނީ ގޮތުން ރަށްރަށަށް ގެނެވޭ ތަރައްގީ ބެލެހެއްޓުމަށް ޕަބްލިކް ވަރކްސް ޔުނިޓެއް ހުރުމަކީ، އެތައް ޚަރަދެއް ސަލާމަތް ކުރެވޭނެ ކަމެއް ކަމަށް ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ ރާއްޖޭގެ ކޮންމެ އަތޮޅެއްގައި ޕަބްލިކް ވަރކްސް ޚިދުމަތް ދިނުމަށް އެންމެ މަދުވެގެން، އެއް ޔުނިޓް ގާއިމުކުރުމުގެ އިތުރުން، ރާއްޖޭގެ އުތުރު އަދި ދެކުނުގެ ސަރަހައްދު ހިމެނޭ ގޮތަށް، ހުރިހާ ވަސީލަތަކާއެކު އެއްތަނުން އަނެއް ތަނަށް އުފުލައި، ބަދަލު ކުރެވޭ މޯބައިލް ޕަބްލިކް ވަރކްސް ޔުނިޓްގެ 2 ޔުނިޓް އުފައްދާނެ ކަމަށެވެ. މި މަސައްކަތްތަކަކީ މި ހިނގާ 2025 ވަނަ އަހަރުގެ ބަޖެޓުން ޚަރަދުކޮށްގެން ކުރިއަށް ގެންދާނެ މަސައްކަތްތަކެއް ކަމަށް ރައީސް މުއިއްޒު ވިދާޅުވިއެވެ.
މީގެ އިތުރުން ރައީސް މުއިއްޒު ވަނީ މާކުރަތުގެ ތަރައްގީއަށް އިޝާރާތް ކުރައްވައި ވެސް ވާހަކަފުޅު ދައްކަވާފައެވެ. އެރަށުގެ ތަރައްގީގައި ހަގީގީ ކުލަޖެއްސުމަށް ކުރަންޖެހޭ ގިނަ ކަންތައްތަކެއް ހުރިކަން ފާހަގަކުރައްވައި ރައީސް މުއިއްޒު ވަނީ، އެކި ސަބަބުތަކާއި ހެދި މިކަންކަން ނުވެ ހުރި ކަމުގައި ވީ ނަމަވެސް، ރައްޔިތުން އެދޭފަދައިން ކަންކަން ކުރިއަށް ގެންގޮސް، ނަތީޖާ ނެރެދެއްވާނެކަމުގެ ޔަގީންކަން ދެއްވާފައެވެ. އެގޮތުން ބަނދަރުގެ މައްސަލައާއި، ރަށް ގިރުމުގެ މައްސަލަވެސް ހައްލުވާ ގޮތަށް އެ މަޝްރޫއު ފުރިހަމަކޮށް ކުރިއަށްގެންގޮސް، ޕަބްލިކް ވަރކްސް ސައިޓް ގާއިމުކުރުމަށް ފެށިފައި އޮތް މަސައްކަތް، ރައްޔިތުން އެދޭ ފެންވަރަށް މި އަހަރު ތެރޭގައި ކޮށްދޭނެ ކަމަށް ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ މާކުރަތުގެ ސިއްހީ ދާއިރާއަށް ދިމާވެފައިވާ އިންސާނީ ވަސީލަތުގެ ދަތިކަމާއި، އެ ނޫންވެސް ފަންނީ ވަސީލަތްތަކުގެ ދަތިކަން ހައްލު ކުރުމުގެ މަސައްކަތް މިއަހަރުގެ ބަޖެޓުތެރެއިން ކުރުމަށް ނިންމާފައިވާ ކަންކަމާއި، ތައުލީމީ ދާއިރާއަށް ބޭނުންވާ ތަރައްގީގެ ކަންކަންވެސް މިއަހަރު ތެރޭގައި ކޮށްދޭނެ ކަމަށެވެ. މީގެ އިތުރުން، ދުޅަހެޔޮ ސިއްހަތެއްގައި ތިބުމަށް ކުޅިވަރުކުޅެ އުޅެވޭނެ ތަރައްގީ ގެނެސްދެއްވާނެ ކަމުގެ ޔަގީންކަން ރައީސް މުއިއްޒު ވަނީ ދެއްވާފައެވެ.
އެގޮތުން މާކުރަތުގައި މި އަހަރު ތެރޭގައި އައު ފުޓްސަލް ދަނޑެއް އަޅައިދެއްވާނެ ކަމުގެ ޔަގީންކަން ވެސް ރައީސް މުއިއްޒު ދެއްވިއެވެ. އަދި ކުރިއަށް އޮތް އަހަރުތަކުގެ ތެރޭގައި އިތުރު މަޝްރޫއުތައް ހިންގަވައިދެއްވާނެ ކަމަށް އެމަނިކުފާނު ވިދާޅުވިއެވެ.
މުޅި ރާއްޖެއަށް ދިމާވެފައި އޮތް ގެދޮރުގެ ދަތިކަމުގެ މަޝްރޫއަށް އިޝާރާތްކުރައްވައި ރައީސް މުއިއްޒު ވަނީ، މާކުރަތުގައި ހައުސިންގް ޔުނިޓް އެޅުމުގެ މަސައްކަތް، 2026 ވަނަ އަހަރަށް ބަޖެޓްކޮށްގެން ކުރިއަށް ގެންދާނެކަމުގެ ޔަގީންކަން ދެއްވާފައެވެ.
މާޅޮސްމަޑުލު އުތުރުބުރިއަށް ރައީސް މުއިއްޒު ކުރެއްވި ދަތުރުފުޅު، ބުރާސްފަތި ދުވަހުގެރޭ ވަނީ ނިންމަވާލައްވައި މާލެ ވަޑައިގެންފައެވެ. މި ދަތުރުފުޅުގައި އެ އަތޮޅުގެ 11 ރަށަކަށް އެމަނިކުފާނު ވަޑައިގެންނެވިއެވެ.
