ރ. މަޑުއްވަރީގެ އިހްތިސާސްގައި އުފުލަންދޫ، މީދޫގެ އިހްތިސާސްގައި ތާވަތާ ހިމެނުމަށް ނިންމައިފި
މަޑުއްވަރީގެ ބިން ހިއްކުމުގެ މަޝްރޫއު މިއަހަރު ފަށާނެ
ރ. މަޑުއްވަރީގެ ރައްޔިތުންނާއި ބައްދަލުކުރައްވައި ރައީސް ޑރ.މުހައްމަދު މުއިއްޒު ވާހަކަފުޅު ދައްކަވަނީ
މާޅޮސްމަޑުލު އުތުރުބުރީ މަޑުއްވަރީގެ އިހްތިސާސްގައި އުފުލަންދޫ، އަދި އެ އަތޮޅު މީދޫގެ އިހްތިސާސްގައި ތާވަތާ ހިމެނުއްވުމަށް ނިންމަވައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެކަން އިއުލާންކުރައްވައިފިއެވެ.
ރައީސް މުއިއްޒު މިކަން އިއުލާންކުރެއްވީ މަޑުއްވަރީ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރަށަށް ދިމާވެފައިވާ ޖާގައިގެ ދަތިކަމަށް ގެނެވިދާނެ ހައްލުތަކުގެ މައްޗަށް އަލިއަޅުއްވާލައްވަމުން އެ މަނިކުފާނު ވަނީ، ރަށުގެ ބިން ފުރިފައިވާކަމާއި، ފަޅުގައިވެސް ޖާގަ ނެތުމުން، ހިއްކުނަސް ހިއްކޭނީވެސް ނިސްބަތުން ކުޑަ ސަރަހައްދެއްކަމަށް ވިދާޅުވެފައެވެ. ނަމަވެސް މަޑުއްވަރީގެ ބިން ހިއްކުމުގެ މަޝްރޫއު މި އަހަރުގެ ބަޖެޓުގައި ހިމަނައި، ކަމާ ގުޅޭ ވުޒާރާތަކާއި ކައުންސިލުން މަޝްވަރާކުރުމަށްފަހު މި އަހަރު އަމަލީ މަސައްކަތް ފަށާނެ ކަމަށް އެމަނިކުފާނު ވިދާޅުވިއެވެ.
މީގެ އިތުރުން ރައީސް މުއިއްޒު ވިދާޅުވީ ކުރިން ހަދާފައިވާ ބަނދަރު ބެކްފިލްނުކޮށް ހުރުމުން ދިމާވާ މައްސަލަ އާއި، ގިރާ ސަރަހައްދު ހިމާޔަތް ނުކޮށް އޮތް މައްސަލަ އާއި، ބަނދަރުގެ ބޭރު ތޮށި ވެހިކަލަށް ވަދެވޭ ގޮތަށް ހަދާފައި ނެތް މައްސަލަ މިދައުރުގެ ތެރޭގައި ހައްލުކޮށްދެއްވާނެ ކަމަށެވެ. ނަމަވެސް ރަށަށް އެންމެ ހައެއްކަ ހެކްޓަރު އިތުރުކޮށްގެން ބިމުގެ މައްސަލައަށް ހައްލެއް ނޯންނާނޭކަމަށް ވިދާޅުވެ، ރަށުގައި އިގްތިސާދީ މަސައްކަތްތައް ކުރާ ތަންތަން ރަށުން ބޭރަށް ބަދަލުކުރުމަކީ، އާންމު ސިއްހަތަށްވެސް އޮތް އެންމެ ރަނގަޅު ހައްލުކަމަށް އެމަނިކުފާނު ވިދާޅުވިއެވެ.
އެގޮތުން މަޑުއްވަރީގެ އިހްތިސާސްގައި އުފުލަންދޫ، އަދި މީދޫގެ އިހްތިސާސްގައި ތާވަތާ ހިމެނުއްވުމަށް ނިންމަވާފައިވާކަން ރައީސް މުއިއްޒު އިއުލާންކުރެއްވިއެވެ. އަދި އެކަމާ ގުޅޭ ގާނޫނީ ލިޔެކިޔުމުގެ ކަންކަން ހަމަޖެހުމުން، މީހުން ދިރިއުޅޭ ސަރަހައްދެއްގައި ހުންނަން ނުޖެހޭ ހުރިހާ ތަނެއް އެރަށްތަކަށް ބަދަލުކުރެއްވުމަށް ވެސް ރައީސް މުއިއްޒު ވަނީ އެދިވަޑައިގެންފައެވެ.
ހައުސިންގ މަޝްރޫއުތަކަށް އަލިއަޅުއްވާލައްވައި ރައީސް މުއިއްޒު ވިދާޅުވީ އެ ރަށުގެ ހައުސިންގް ޔުނިޓްތައްވެސް ހިމެނޭ ގޮތަށް، ހައުސިންގ މަޝްރޫއު ހިންގައިދޭނޭ ފަރާތެއް ހޯދުމަށް، މި މަހުގެ ބާކީ މިއޮތް ދުވަސްތަކުގެ ތެރޭގައި އިއުލާން ކުރާނެ ކަމަށެވެ.
