މަޑުއްވަރީގެ ބަނދަރު ހެދޭނީ ރައްޔިތުންގެ ޚިޔާލާއި މަޝްވަރާއާއެކު، ރައްޔިތުން ބޭނުންވާގޮތަށް: ރައީސް ޞާލިޙް

މަޑުއްވަރީގެ ބަނދަރު ހެދޭނީ މަޑުއްވަރީގެ ރައްޔިތުންގެ ޚިޔާލާއި މަޝްވަރާއާއެކު, ރައްޔިތުން ބޭނުންވާގޮތަށް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ރައީސުލްޖުމްހޫރިއްޔާ މުލަކަތޮޅު މަޑުއްވަރީ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީއާ ހޮނިހިރު ދުވަހު ވަނީ ބައްދަލުކުރައްވާފައެވެ. މިބައްދަލުކުރެއްވުމުގައި އެންމެ ބޮޑަށް މަޝްވަރާކުރެވިފައި ވަނީ، މަޑުއްވަރީގެ ބަނދަރާ ގުޅޭގޮތުންނެވެ. މަޑުއްވަރީގެ ބަނދަރުގެ މަސައްކަތް އެމްޓީސީސީއާ ހަވާލުކުރެވިފައިވީ ނަމަވެސް އެމަސައްކަތް ނުފެށި އޮތީ، ބަނދަރުގެ ކުރެހުމާމެދު މަޑުއްވަރީގެ ރައްޔިތުންގެ މެދުގައި ޚިޔާލު ތަފާތުވުމުންނެވެ.

Advertisement

މިބައްދަލުކުރެއްވުމުގައި ކައުންސިލުން ވަނީ، ސަރުކާރުން މަޑުއްވަރީގައި މީގެ ކުރީގެ އެއްވެސް ސަރުކާރަކުން ހިންގާފައި ނުވާހައި ގިނަ މަޝްރޫއުތަކެއް ހިންގަމުންދާކަން ފާހަގަކުރައްވައި ރައީސުލްޖުމްހޫރިއްޔާއަށާއި ސަރުކާރަށް ޝުކުރު ދަންނަވާފައެވެ. އަދި މަޑުއްވަރިއަށް ދިމާވެފައިވާ މައްސަލަތަކާއި ހުރި ދަތިތަކާއި ގުޅޭގޮތުން ކައުންސިލުން ތައްޔާރުކޮށްފައިވާ ވީޑިއޯއެއް ވަނީ މި ބައްދަލުވުމުގައި ދައްކާފައެވެ. މިގޮތުން މަޑުއްވަރީގެ ބަނދަރުގައި ނިވާކަމެއް ނެތުމުގެ ސަބަބުން ކުރިމަތިވާ ދަތިތަކާއި، ދެ މޫސުމަށް އުދައެރުމާއި، ރަށްގިރުމާއި، ކުނީގެ މައްސަލައާއި، ޒުވާނުންގެ މަރުކަޒެއް ނެތުމާއި، ސްކޫލްގެ ޖާގައިގެ ދަތިކަން ކައުންސިލުން ފާހަގަކޮށްފައިވެއެވެ.

މަޑުއްވަރީގައި މިހާރު ކުރިޔަށްދާ މަޝްރޫއުތަކުގެ ތެރޭގައި ފެނާއި ނަރުދަމާގެ މަސައްކަތް ހިމެނެއެވެ.

މަޑުއްވަރީގެ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީއާ ބައްދަލުކުރެއްވުމަށްފަހުގައި ރައީސުލްޖުމްހޫރިއްޔާ ވަނީ މަޑުއްވަރީގެ ރައްޔިތުންނާ ބައްދަލުކުރައްވާފައެވެ. ރައީސުލްޖުމްހޫރިއްޔާ މ. މަޑުއްވަރީއަށް ވަޑައިގެންނެވުމުން އެރަށުގެ ރައްޔިތުންގެ ފަރާތުން ވަނީ ވަރަށް ހޫނު މަރުހަބާއެއް ދަންނަވާފައެވެ. މުލަކަތޮޅުގެ 5 ރަށަށް ރައީސުލްޖުމްހޫރިއްޔާ ފެއްޓެވި ދަތުރުފުޅުގައި މިއަދު ހަވީރު ވަޑައިގަންނަވާނީ މ. ދިއްގަރަށެވެ.