ގިނަ ވައުދުފުޅުތަކާއެކު، މަޑުއްވަރީގެ ބޯހިޔާވަހިކަމުގެ މައްސަލަވެސް ހައްލުކޮށްދެއްވާނެ ކަމުގެ ޔަގީންކަން ރައީސް ދެއްވައިފި
ސިއްހީ މަރުކަޒު އަޕްގްރޭޑްކުރުމާއި، ޒުވާނުން ބޭނުންވާ ފުޓްސަލް ދަނޑާއި ހޭޑްބޯލް ކޯޓު އަޅުއްވައިދެއްވާނެ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވާހަކަފުޅުދައްކަވަނީ
ރ. މަޑުއްވަރިއަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކޮށްދެއްވާނެ ކަަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ބުދަ ދުވަހުގެ ހަވީރު މަޑުއްވަރީގައި ބޭއްވި ބަނދަރު ބައްދަލުކުރެއްވުމުގައި ރައީސް ވިދާޅުވީ، މަޑުއްވަރީގެ ތަރައްގީއަށް ބޭނުންވާ ގިނަ މަޝްރޫއުތައް އެބަހުރި ކަމަށެވެ. ރައްޔިތުން ހުށަހަޅާފައިވާ ކަންކަމަށް ބަލާއިރު، އެންމެ ބޮޑު މައްސަލައެއްގެ ގޮތުގައި ފާހަގަކުރެވެނީ ބޯހިޔާވަހިކަމަށް ދިމާވެފައިވާ ދަތިކަމުގެ މައްސަލަކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ، ކުރިއަށް އޮތް ދައުރަށް އިންތިޚާބު ވެވަޑައިގެންފިނަމަ ބޯހިޔާވަހިކަމަށް ދިމާވެފައިވާ މައްސަލަ ރައްޔިތުން އެދޭ ގޮތަށް ހައްލުކޮށްދެއްވާނެ ކަމަށެވެ.
ރައީސް ވިދާޅުވީ ކުރިއަށް އޮތް ދައުރުގައި ރައްޔިތުން އެދިފައިވާ ގޮތަށް ސިއްހީ މަރުކަޒު އަޕްގްރޭޑް ކުރުމާއި، ޒުވާނުން ބޭނުންވާ ފުޓްސަލް ދަނޑާއި ހޭޑްބޯލް ކޯޓު އަޅުއްވައިދެއްވާނެ ކަމަށެވެ.
އެއީ މަސްވެރި ރަށެއްކަން ފާހަގަކުރައްވައި ރައީސް ވިދާޅުވީ، މަސްދޯނިފަހަރު އެހެލާނެ ސަރަހައްދެއް ކަނޑައަޅުއްވައި، އެރަށުގެ އިންޖީނުގެ މީހުން ދިރިއުޅޭ ސަރަހައްދާ ދުރަށް ގެންދަވައި، އިންޖީނުގެ އަޕްގްރޭޑް ކުރައްވާނެ ކަމަށެވެ. އަދި ވިދާޅުވީ ބަނދަރަށް އިތުރު ބަދަލެއް ގެންނަން ރައްޔިތުން އެދޭނަމަ އެކަންވެސް ކޮށްދެއްވާނެ ކަމަށެވެ.
މަޑުއްވަރީ ސްކޫލުގައި މިދައުރުގެ ތެރޭގައި 8 ކްލާސްރޫމް ވަނީ އަޅާފައެވެ. އެކަމަށް އިޝާރާތް ކުރައްވައި ރައީސް ވިދާޅުވީ، ކުރިއަށް އޮތް ދައުރުގައި އިތުރު ކްލާސްރޫމްތަކާއި، އެޑްމިން އިމާރާތްވެސް އަޅުއްވައިދެއްވާނެ ކަމަށެވެ.
