އަންގާރަ ދުވަހު، އިސްރާއީލުގެ ބާރުތަކުން ބުލްޑޯޒަރުތަކާއި، ޑްރޯންތަކާއި، ހަނގުރާމަވެރި މަތިންދާބޯޓުތަކާއެކު ޖެނިން ސިޓީ އާއި އެތަނުގެ ރެފިއުޖީ ކޭމްޕަށް އަރައި، މިހާތަނަށް 10 މީހުން ޝަހީދު ކޮށްލައިފި ކަމަށް ވަފާ ނިއުސް އޭޖެންސީ އިން ބުނެފިއެވެ. އަދި 40 އާ ގާތްކުރާ އަދަދެއްގެ މީހުން ވަނީ ޒަޚަމްވެފައެވެ.
ޖެނިން ގައި އިސްރާއީލުން ހިންގަމުން ގެންދަނީ މިހާތަނަށް ނުދެކޭފަދަ ބޮޑު އަސްކަރީ ރެއިޑް އެއް ކަމަށް ރިޕޯޓުތައް ބުނެއެވެ.
އިސްރާއީލުގެ ސިފައިންގެ ފަރާތުން އަންގާރަ ދުވަހު އިޢުލާންކުރި ގޮތުގައި ޖެނިން އާއި އެތަނުގެ ރެފިއުޖީ ކޭމްޕުގައި ބޮޑު އަސްކަރީ އޮޕަރޭޝަނެއް ވަނީ ފަށާފައެވެ. މިއީ އިސްރާއީލުގެ ސަރުކާރުގެ ވަޒީރުން ހުޅަނގު އައްސޭރީ ގައި ހަމަނުޖެހުން އިތުރުކުރާނެ ކަމަށް ބުނެ ބިރުދެއްކުމަށް ފަހު ފެށި ހަމަލާތަކެކެވެ.
ފަލަސްތީން ރެޑް ކްރެސެންޓް ސޮސައިޓީ (ޕީއާރްސީއެސް) އިން ހާމަ ކޮށްފައިވާ ގޮތުގައި ޖެނިން ސިޓީއާއި އެތަނުގެ ރެފިއުޖީ ކޭމްޕަށް އިސްރާއީލުގެ ބާރުތަކުން ދަނީ ހަމަލާދެމުންނެވެ. މިގޮތުން ބުދަ ދުވަހު އިސްރާއީލުގެ ބާރުތަކުން ލައިވް ވަޒަން ޖަހާ ހަމަލާދިނުމުގެ ސަބަބުން 4 ފަލަސްޠީނު މީހުން ވަނީ ޒަޚަމްވެފައެވެ. އޭގެ ތެރެއިން އެކަކުގެ ހާލަތު ވަނީ ނުރައްކާވެފައެވެ.
ޒަޚަމްވި މީހުން ވަނީ ފަރުވާ ދިނުމަށްޓަކައި ހޮސްޕިޓަލަށް ގެންގޮސްފައެވެ.
ހިފާފައިވާ ހުޅަނގު އައްސޭރިއަށް އިސްރާއީލުން ދެމުންދާ ހަމަލާތަކުގެ ސަބަބުން ޖެނީން ރެފިއުޖީ ކޭމްޕް ވަނީ "ދިރިއުޅެން އެއް ގޮތަކަށް ވެސް ކަމުނުދާ ހާލަތަކަށް" ގޮސްފައި ކަމަށް ބުނެ އދ އިން ވަނީ ކަންބޮޑުވުން ފާޅު ކޮށްފައެވެ. އަދި އެތަނުގައި ހުރި މައި ހޮސްޕިޓަލުން ފެނާއި ކަރަންޓު ވަނީ ކަނޑާލާފައި ކަމަށްވެސް އދ އިން ވަނީ ބުނެފައެވެ.
