ވަގު ފޯމު ހުށަހަޅައިގެން ގިނަ އަދަދެއްގެ ބަޔަކު ރައީސް މުއިއްޒުގެ ޕާޓީ ޕީއެންސީ އަށް ވައްދަމުންދާ މައްސަލައިގައި، ބޭނުން ކުރަމުންދަނީ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގެ ޑޭޓާބޭސް ކަމަށް ވެފައިވާތީ، އެތަން ހިމާޔަތް ކުރުމަކީ ގައުމީ ސަލާމަތައް މުހިންމު ކަމެއް ކަމުގައި އެމްޑީޕީގެ ގާނޫނީ ޓީމުން ފުލުހުންނަށް ދަންނަވައިފިއެވެ.
މި މައްސަލައިގެ ތަހުގީގު ކުރިއަށްދާ ގޮތުގެ މައުލޫމާތު ހޯދުމަށް ބުދަ ދުވަހުގެ މެންދުރު ކުރިން ފުލުހުންގެ އިދާރާއަށް އެމްޑީޕީގެ ގާނޫނީ ޓީމުން ވަނީ ޒިޔާރަތް ކޮށްފައެވެ.
ފުލުހުންގެ އިދާރާ އަށް ކުރެއްވި ޒިޔާރަތާ ގުޅޭގޮތުން އެއިދާރާގެ ބޭރުގައި ނޫސްވެރިންނަށް މައުލޫމާތު ދެއްވަމުން ގާނޫނީ ޓީމުގައި ހިމެނިވަޑައިގަންނަވާ އަދި އެމްޑީޕީގެ ތަރުޖަމާނު އަނަސް އަބްދުއްސައްތާރު ވިދާޅުވީ، ޑީއެންއާރުގައި ތިބި ސިޔާސީ މުވައްޒަފުން އެތަނަށް އެއްވެސް އިހްތިރާމެއް ނުކުރާކަން ހާމަވެފައިވާ ކަމަށެވެ.
އަނަސް އިޝާރާތް ކުރެއްވީ، އަންގާރަ ދުވަހު ޑީއެންއާރުގައި ބޭއްވި ނޫސްވެރިންގެ ޕިއްޒާ ބައްދަލުވުމަށެވެ. އެ ބައްދަލުވަށް ދިޔަ ނޫސްވެރިން ޑީއެންއާރުގެ ތެރޭގައި ޕީއެންސީ އަށް ފޯމު ފުރި މައްސަލައިގައި ކުރަމުން ދިޔަ ސުވާލުތަކަށް ޖަވާބު ނުދީ ސިޔާސީ މަގާމުތަކުގައި ތިއްބެވި ފަރާތްތަކުން ނޫސްވެރިން ދޫކޮށްލުމަށްފަހު ވަނީ ފިއްލަވައިގެން ވަޑައިގެންފައެވެ.
"އިސްވެ ދައުވަތު ދީގެން (ނޫސްވެރިން) ގެންގޮސްފައި ދޮރުތަކާ އެއްޗެހި ހުޅުވާލާފައި، ސުވާލެއް ކުރީމަ ޖަވާބުދޭން ނުކެރިގެން ތިބޭފުޅުންގެ ތެރޭގައި ދޮރުތައް ހުޅުވާލަފައި ހަމަ ދިޔައީ." އަނަސް ވިދާޅުވިއެވެ.
އަނަސް ވިދާޅުވީ މިހާތަނަށް އެ މުއައްސަސާ އަށް ނުކުރެއްވި އިހްތިރާމެއް ދެންވެސް ނުކުރައްވާނެ ކަމަށެވެ.
"އަޅުގަނޑުމެން އެދުނިން އެތަން ހިމާޔަތް ކޮށްދިނުމަށްޓަކައި ފުލުހުން ކުރައްވަންޖެހޭ މަސައްކަތް ކޮށްދިނުމަށް."
އަނަސް ވިދާޅުވީ ފުލުހުން ބުދަ ދުވަހުގެ ބައްދަލުވުމުގައި އެމްޑީޕީ އިން ފާހަގަ ކުރި ކަންތައްތަކުގެ އިތުރުން ޕާސްޕޯޓަށް ވެސް "ސެކިއުރިޓީ ބްރީޗަކަށް" މިކަންތައް ވާނެ ކަމަށް ދެކޭ ކަން ފާހަގަ ކުރި ކަމަށެވެ.
"އެބޭފުޅުން ވަރަށް ޔަގީންކަން ދެއްވި އެ މުއައްސަސާގެ މުހިންމު ކަމާ، ހައްސާސްކަން ފާހަގަ ކުރެއްވި، އަދި މިމައްސަލަ އަކީ ސީރިއަސް މައްސަލައެއް ކަމާއި އެކަން ބަލަމުންދާކަމަށް ވެސް ފުލުހުން ވިދާޅުވި؛" ކަމަށް އަނަސް ވިދާޅުވިއެވެ.
އަނަސް ވިދާޅުވީ އިލެކްޝަންސް ކޮމިޝަނުން ޕީއެންސީ ގައި 68 ހާހަށް ވުރެ ގިނަ މެމްބަރުން ތިބި ކަމަށް އިއުލާނު ކޮށްފައިވާއިރު އެއީ ވަގު ފޯމު ފުރައިގެން ކޮށްފައިވާ ކަމެއްކަން އެންމެންނަށް ވެސް އެނގޭ ކަމަށެވެ.
"ކޮށްގެން މިއުޅެނީ ދައުލަތުން އެ ޕާޓީ އަށް ފައިސާ ހޯދުނު ގޮތަކަށް ހޯދުން؛" އަނަސް ވިދާޅުވިއެވެ.
އަނަސް ވިދާޅުވީ، ޝަކުވާ ހުށަހަޅާފައިވާ ފަރާތްތަކުން ނަގަން ޖެހޭ މައުލޫމާތު ނެގުމުގެ މަސައްކަތް ވެސް ކުރަމުން ގެންދާ ކަމަށް ބުދަ ދުވަހުގެ ބައްދަލުވުމުގައި ވިދާޅުވި ކަމަށެވެ.
