އަޅުގަޑުގެ ދަތުރުތަކުގައި ވަޒީރުން ބައިވެރިކުރުވަނީ ރަށްރަށުގައި ވަރަށް އަވަހަށް މަސައްކަތްތައް ހިނގައިގަންނަން ބޭނުންވާތީ - ރައީސް
ސަރުކާރުގެ ނިޒާމުގެ ތެރޭގައި ވަރަށް ގިނަ ފަހަރަށް، ސިޓީބިޓީ ބަދަލުކުރުމާއި ބިއުރޯކްރަސީގެ ތެރެއިން ކަންކަން ތާށިވޭ
ރައީސް އަނގޮޅިތީމު ރައްޔިތުންނާއި ބައްދަލުކުރައްވާ ވާހަކަ ދައްކަވަނީ
ދަތުރުފުޅުތަކުގައި ރަށްރަށުގެ މަޝްރޫޢުތަކާއި އެންމެ ގުޅުންހުރި ދާއިރާތަކުގެ ވަޒީރުން ބައިވެރިކުރައްވަނީ ރަށްރަށުގައި ވަރަށް އަވަހަށް މަސައްކަތްތައް ހިނގައިގަންނަން ބޭނުންފުޅުވާތީ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މާޅޮސްމަޑުލު އުތުރުބުރީގެ ބައެއް ރަށްތަކަށް މިހާރު ކުރައްވަމުންގެންދަވާ ޒިޔާރަތުގެ ތެރެއިން، އަނގޮޅިތީމު ރައްޔިތުންނާ ބައްދަލުކުރައްވައި ރައީސް ވަނީ ފެނާ ނަރުދަމާގެ މައްސަލަ ޙައްލުކޮށްދެއްވުމަށް ވަޢުދުވެވަޑައިގެންފައެވެ.
ރައީސުލްޖުމްހޫރިއްޔާގެ ވާހަކަފުޅުގައި، އެ މަނިކުފާނުގެ ދަތުރުފުޅުތަކުގައި ރަށްރަށުގެ މަޝްރޫޢުތަކާއި އެންމެ ގުޅުންހުރި ދާއިރާތަކުގެ ވަޒީރުން ބައިވެރިކުރައްވަނީ ރަށްރަށުގައި ވަރަށް އަވަހަށް މަސައްކަތްތައް ހިނގައިގަންނަން ބޭނުންފުޅުވާތީ ކަމަށާއި އެ ގޮތުން ރަށްރަށުގެ ކައުންސިލާއި އެހެނިހެން މުއައްސަސާތަކާއި ވަޒީރުންނާއި ބައްދަލުވެ، ވާހަކަ ދެކެވިގެން، މައްސަލަތައް ހައްލުކުރެވި، އަވަހަށް ކުރިއަށް ދެވޭނެގޮތާއި ނަތީޖާއާ ހަމައަށް ދެވޭނެގޮތް ކުޑަ ވަގުތުކޮޅެއްގެ ތެރޭގައި ވުމަކީ އެ މަނިކުފާނު އެދިވަޑައިގަންނަވާގޮތްކަން ހާމަކުރެއްވިއެވެ.
އަދި ސަރުކާރުގެ ނިޒާމުގެ ތެރޭގައި ވަރަށް ގިނަ ފަހަރަށް، ސިޓީބިޓީ ބަދަލުކުރުމާއި ބިއުރޯކްރަސީގެ ތެރެއިން ކަންކަން ތާށިވާކަމަށާއި، މިއީ ސަރުކާރުތަކުގައި ދިވެހިރާއްޖެ ނޫނަސް އެކަން ހިނގާ އާންމު އުސޫލުކަން އެ މަނިކުފާނުގެ ވާހަކަފުޅުގައި ފާހަގަކުރެއްވިއެވެ. އެހެން ނަމަވެސް އެ މަނިކުފާނު ބޭނުންފުޅުވަނީ ރަށްރަށަށް ވަޒީރުންނާއެކު ވަޑައިގެން، މަސައްކަތްތައް ހަލުވިކުރުވަން ކަމުގައި ވިދާޅުވިއެވެ.
އަނގޮޅިތީމުގެ ބަނދަރުގެ މަސައްކަތް ނުނިމި ދިގުލައިގެންގޮސްފައިވާ ކަމަށާއި އެ މަނިކުފާނު ވަޢުދުވެވަޑައިގެންނެވި ގޮތަށް އެރަށުގެ ބަނދަރުގެ މަސައްކަތްވެސް، ޖެޓީގެ މަސައްކަތްވެސް ނިމޭއިރު މޫދަށް އެރޭނެ ސަރަޙައްދަކާއެކު ތަރައްޤީ ކުރެވިގެންދާނެ ކަމުގައި ވިދާޅުވިއެވެ. އަދި ޞިއްޙީ އަދި ތަޢުލީމީ ދާއިރާއަކީ ކޮންމެ ރަށެއްގައިވެސް އަޅާނުލެވި ހުރި ދާއިރާތަކެއްކަން ފާހަގަކުރައްވައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މި އަހަރުގެ ބަޖެޓުގެ ތެރޭގައި މި ދެ ދާއިރާއަށް ވަރަށް ބޮޑު އިސްކަމެއް ދެއްވާނެ ކަމުގައި ވިދާޅުވިއެވެ. އެ ގޮތުން އަނގޮޅިތީމުގެ ސްކޫލަށް ބޭނުންވާ ކަންތައްތައް ފަހިކޮށްދެއްވާނެ ކަމަށާއި ރަށުގެ ޞިއްޙީ މަރުކަޒުގެ ތަރައްޤީއަށް ބޭނުންވާ ކަންކަން ކޮށްދެެއްވާނެކަމުގެ ޔަޤީންކަން އެ މަނިކުފާނު ދެއްވިއެވެ.
އެ މަނިކުފާނުގެ ވާހަކަފުޅުގައި، ޞިއްޙީ ދާއިރާގެ ތަރައްޤީއަށް ސަރުކާރުން ގެންގުޅުއްވާ ބައެއް ވިސްނުންފުޅުތައް ހިއްސާކުރެއްވިއެވެ. އެ ގޮތުން ޞިއްޙީ މަރުކަޒުތަކުގައި ހުންނަ އިކުއިޕްމަންޓްތަކަކީ ނުހުއްޓި ހިންގޭނެ ގޮތަށް އޭގެ ބޭނުން ހިފޭނެ ތަކެތިކަމަށް ހެއްދެވުމަށްޓަކައި އެތަކެއްޗަށް ބޭނުންވާ ރިއޭޖަންޓްސް ނުވަތަ އެހެން ވަސީލަތްތައްވެސް ހުސްނުވެ ބަރާބަރަށް ލިބޭނެ ގޮތަށް އިންތިޒާމުތައް ރާއްވަވާނެކަމުގައި ވިދާޅުވިއެވެ.
ފެނާ ނަރުދަމާގެ މަސައްކަތް ނުނިމި މަގު ނުހެދޭނެ ކަމަށާއި، ފެނާ ނަރުދަމާގެ މަސައްކަތް ނިމުނުހާ އަވަހަކަށް އަނގޮޅިތީމުގެ މަގުތައް ތަރައްޤީކުރަން ފައްޓަވާނެކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ. މި އަހަރުގެ ބަޖެޓުގެ ތެރެއިން ޒުވާނުންނަށް ބޭނުންވާ ކުޅިވަރުގެ ވަޞީލަތްތައް ޤާއިމުކުރުމަށް ވަރަށް ބޮޑު އިސްކަމެއް ދެއްވާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.
