ޕޮސްޓެކޮގްލޫ އަށް ޕްރެޝަރު ބޮޑުވަނީ!

ޓޮޓެންހަމްގެ ނަތީޖާތައް އިންތިހާ އަށް ދަށްވެފައިވާއިރު، އެ ޓީމަށް އިރުޝާދު ދެމުން އަންނަ އަންގޭ ޕޮސްޓެކޮގްލޫ އަށް ޕްރެޝަރު ބޮޑުވަމުން އަންނަ ކަމަށް މީޑިއާ ތަކުގައި ރިޕޯޓުކޮށްފި އެވެ.

އިނގިރޭސި ޕްރިމިއަރ ލީގުގައި އެންމެ ފަހުން އެވަޓަންއާ ދެކޮޅަށް ކުޅުނު މެޗުން ވެސް ޓޮޓެންހަމް ވަނީ ބަލިވެފަ އެވެ. އެ މެޗުން ޓޮޓެންހަމް ބަލިވެފައިވާއިރު، މިވަގުތު އެ ޓީމު އޮތީ ވެސް ލީގު ތާވަލްގެ 15 ވަނަ މަގާމުގަ އެވެ. މި ސީޒަންގެ މިހާތަނަށް ޓޮޓެންހަމް ވަނީ 12 މެޗުން ބަލިވެފަ އެވެ.

އެވަޓަން މެޗުގެ ފަހުން ނޫސްވެެރިންނާ ވާހަކަ ދައްކަމުން ޕޮސްޓެކޮގްލޫ ބުނީ މިއީ އޭނާގެ މުސްތަޤުބަލާ ގުޅޭ ގޮތުން ވާަހަކަ ދައްކަންވީ ވަގުތު ނޫން ކަމަށެވެ. އެހެން ނަމަވެސް އޭނާ އަށް ބޮޑު ޒިންމާއެއް އޮތްކަން ފާހަގަ ކުރަމުން ޕޮސްޓެކޮގްލޫ ބުނީ، އޭނާ އަށް އޮތީ ޓީމާއި ކުޅުންތެރިންގެ މައްޗަށް އޮތް ޒިންމާއެއް ކަމަށެވެ. ކޮންމެ ކަމަކަށް ފޯކަަސް ކުރަން ޖެހުނު ނަމަވެސް، އޭނާ އަށް އޮތް ޒިންމާގެ މަތިން ހަނދާން ނައްތާލައިގެން ނުވާނެ ކަމަށް ވެސް ޕޮސްޓެކޮގްލޫ ވަނީ ބުނެފަ އެވެ.

އިނގިރޭސި މީޑިއާ ތަކުގައި ބުނެފައިވާ ގޮތުން ޓޮޓެންހަމްގެ ނަތީޖާތައް ދަށްވުމުގެ ސަބަބުން، ޕޮސްޓެކޮގްލޫ އަށް އަންނަނީ ޕްރެޝަރު ބޮޑުވަަމުންނެވެ. އެގޮތުން ޓޮޓެންހަމްގެ ޗެއާމަން ޑެނީ ލެވިސް ވެސް ވަނީ، ކުލަބުގެ މުސްތަޤުބަލަށް މުހިންމު ނިންމުންތަކެއް ނިންމަން ޖެހޭ ފަދަ މޭރުމަކުން ވާހަކަ ދައްކާފައި ކަަމަށް، މީޑިއާ ތަކުގައި ވަނީ ބުނެފަ އެވެ.

ޓޮޓެންހަމްގެ ކޯޗުކަމާ ޕޮސްޓެކޮގްލޫ ހަވާލުވީ 2023 ވަނަ އަހަރު އެވެ. އޭގެ ފަހުން މިހާަތަނަށް ޔުނައިޓެޑުން ވަނީ 74 މެޗު ކުޅެފަ އެވެ. އޭގެ ތެރެއިން 36 މެޗުން އެ ޓީމު މޮޅުވެފައިވާއިރު، 12 މެޗުން ވަނީ އެއްވަރުވެފަ އެވެ. އަދި 26 މެޗަކުން ޓޮޓެންހަމް ވަނީ ބަލިވެފަ އެވެ.