2025 ވަނަ އަހަރު މިހާ ހިސާބަށް، އެންމެ ގިނަ ފަތުރުވެރިން ރާއްޖެއަށް ޒިޔާރަތްކުރި ޤައުމަކީ ރަޝިޔާ ކަމުގައި ތަފާސް ހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީން ހާމަ ކޮށްފައިވާ ހިސާބުތަކުން ފެންނަ ގޮތުގައި ޖެނުއަރީ 18 ވަނަ ދުވަހުގެ ނިޔަލަށް ރަޝިޔާ އިން 15,077 ފަތުރުވެރިން ޒިޔާރަތް ކޮށްފައިވާއިރު، މިއީ ޖުމްލަ ފަތުރުވެރިންގެ 12.8 އިންސައްތަ އެވެ.

ދެވަނަ އަށް އެންމެ ގިނަ ފަތުރުވެރިން އައި އިޓަލީ އިން 12,560 ފަތުރުވެރިން ޒިޔާރަތް ކޮށްފައިވެއެވެ.

2024 ވަނަ އަހަރު އެންމެ މަތީގައި އޮތް ޗައިނާ މިހާރު ވަނީ ތިންވަނަ އަށް ވެއްޓިފައެވެ. އެގައުމުން 11,560 ފަތުރުވެރިން (9.8%) ޒިޔާރަތްކޮށްފައެވެ.

މީގެ އިތުރުން މުހިންމު މާކެޓްތަކުގެ ތެރޭގައި އިނގިރޭސި ވިލާތާއި، (10,621 ފަތުރުވެރިން) އަދި ޖަރުމަނުވިލާތް (7,313 ފަތުރުވެރިން) ހިމެނެއެވެ.

2025 ވަނަ އަހަރުގެ ޖެނުއަރީ މަހުގެ ފުރަތަމަ 18 ދުވަހުގެ ތެރޭގައި، ރާއްޖެއަށް ޒިޔާރަތް ކުރި ފަތުރުވެރިންގެ އަދަދު، ވޭތުވެދިޔަ އަހަރުގެ މި މުއްދަތާ އަޅާބަލާއިރު 9.7  އިންސައްތަ ވަނީ އިތުރުވެފައެވެ. މިނިސްޓްރީ އޮފް ޓޫރިޒަމްގެ ތަފާސްހިސާބު ތަކުން ދައްކާގޮތުގައި، 2025 ވަނަ އަހަރުގެ ޖެނުއަރީ 18 ވަނަ ދުވަހާ ހަމައަށް ރާއްޖެ އަށް 117,532 ފަތުރުވެރިން ޒިޔާރަތްކޮށްފައިވެއެވެ. މިއީ 2024 ވަނަ އަހަރުގެ މި މުއްދަތުގައި ޒިޔާރަތްކުރި 107,119 ފަތުރުވެރިންނާ އަޅާބަލާއިރު އިތުރު އަދަދެކެވެ.

ރާއްޖެއަށް ޒިޔާރަތް ކުރި އެންމެ ގިނަ ފަތުރުވެރިންނަކީ ރިސޯޓުތަކަށް އައި މީހުންނެވެ. މިގޮތުން ޖުމްލަ ފަތުރުވެރިންގެ 69.6 އިންސައްތަ ހޭދަކޮށްފައިވަނީ ރިސޯޓުތަކުގައެވެ. ގެސްޓްހައުސް ތަކުގައި ހޭދަކުރި ފަތުރުވެރިންގެ ނިސްބަތަކީ 25.4 އިންސައްތަ އެވެ. ހޮޓާތަކާއި ސަފާރީ އުޅަނދުތަކުގައި ހޭދަކުރި ފަތުރުވެރިންގެ ނިސްބަތަކީ 2.5 އިންސައްތަ އެވެ.

2025 ވަނަ އަހަރުގެ ޖެނުއަރީ 18 ވަނަ ދުވަހާ ހަމައަށް، ރާއްޖޭގައި 1,161 ފަތުރުވެރިކަމުގެ ފެސިލިޓީ ހިންގަމުން ގެންދިޔަ އިރު އެ ފެސިލިޓީ ތަކުގައި ހުރި ޖުމްލަ އެނދުގެ އަދަދަކީ 62,512 އެވެ. އެހެން ނަަމަވެސް މީގެ ތެރެއިން އޮޕަރޭޓް ކުރަމުން އަންނަނީ 61,790 އެނދެވެ. މީގެ ތެރެއިން 43,541 އެނދު ހުރީ ރިސޯޓުތަކުގައެވެ.