ރެލިގޭޝަންގެ ބިރުވެރިކަމުގައި އޮތް ގެޓާފޭ ކައިރިން ބާސެލޯނާ އެއްވަރު

ސްޕެނިޝް ލީގުގައި ގެޓާފޭއާ ދެކޮޅަށް ކުޅުނު މެޗުން އެއްވަރުވެ، ބާސެލޯނާ އިން އަނެއްކާ ވެސް ފުރުސަތު ނަގާލައިފި އެވެ.

ރެލިގޭޝަންގެ ބިރުވެރިކަމުގައި އޮތް ގެޓާފޭއާ ދެކޮޅަށް ހޮނިހިރު ދުވަހުގެ ރޭ ބާސެލޯނާ ކުޅުނު މެޗު ނިމުނީ، ދެ ޓީމު 1-1 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ބާސެލޯނާ އިންނެވެ. ނަމަވެސް ގެޓާފޭ އިން ވަނީ ފަހަތުން އަރައި ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.

މެޗު ފަށައިގެން ނުވަ ވަނަ މިނެޓުގައި ބާސެލޯނާ އަށް ލީޑު ނަގައިދިނީ ޖޫލްސް ކޫންޑޭ އެވެ. އޭގެ ފަހުން ވެސް މެޗުގައި ބާސެލޯނާ އިން ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. ކޫންޑ ހުރަސްކޮށްދިން ފުރުސަތެއްގައި ބާސެލޯނާގެ ރަފީނިއާ ބޮލުން ފޮނުވާލި ބޯޅަ ދިޔައީ ބޭރަށެވެ.

މެޗުގެ ފުރަތަމަ ހާފުގެ 34 ވަނަ މިނެޓުގައި ގެޓާފޭ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ބާސެލޯނާގެ އޭރިޔޭ ތެރެއިން، ގެޓާފޭގެ ކޮބާ ގޯމްސް ޑާ ކޮސްޓާ ފޮނުވާލި ބޯޅަ ބާސެލޯނާގެ ގޯލުގައި ހުރި އިނާކީ ޕެނާގެ އަތުގައި ޖެހިފައި ރީބައުންސަށް އައި ވަގުތު، އެ ބޯޅަ ގޯލަށް ވައްްދާލީ މައުރޯ އަރަމްބަރީ އެވެ.

މެޗު އެއްވަރުވީއިރު، ބާސެލޯނާ އޮތީ ލީގު ތާވަލްގެ ތިން ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ 20 މެޗުން 39 ޕޮއިންޓާ އެކު އެވެ. ދެ ވަނައިގައި އެންމެ ފަހުގެ ޗެމްޕިއަން ރެއާލް މެޑްރިޑަށް 43 ޕޮއިންޓު ލިބެނީ ބާސެލޯނާ އަށް ވުރެ އެއް މެޗު މަދުން ކުޅެގެންނެވެ. އެއް ވަނައިގައި އޮތް އެތުލެޓިކޯ މެޑްރިޑަށް 20 މެޗުން ލިބެނީ 44 ޕޮއިންޓެވެ.