"އެކްސްޕެޓް ސިސްޓަމް ބަދަލުކުރަން އުޅުނީ ސީދާ ޕީއެންސީ އަށް ބައި އަޅާތީ ކަމަށް އަޑު އިވޭ"
ކޮރަޕްޝަންގެ ބޮޑެތި ތުހުމަތުތަކެއް ކުރެވިފަވާ، "ބްލެކްލިސްޓް" ވެފައިވާ މެލޭޝިއާ ގެ ބެސްޓިނެޓް ނަމަކަށް ކިޔާ ކުންފުންޏަކާ މަސައްކަތް ހަވާލުކުރި ސަބަބު ސާފެއް ނޫން
ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް
ރާއްޖޭގެ އެކްސްޕެޓް ސިސްޓަމް ބަދަލުކުރަން އުޅުނީ ސީދާ ޕީއެންސީ އަށް ބައި އަޅާތީ ކަމަށް އަޑު އިވޭ ކަމަށާއި އެއީ ވަރަށް ބޮޑު ކަންބޮޑުވުމެއް ކަމަށް ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
އެ ޕްރޮގްރާމްގައި މީކާއިލް ވަނީ ހޯމް މިނިސްޓަރ އަލީ އިހުސާންގެ އިތުބާރު ނެތްކަމުގެ މައްސަލަ ހުށަހަޅަން ޖެހުނު ސަބަބުތަކާއި މެދު ވާހަކަދައްކަވާފައެވެ.
އެގޮތުން ޤާނޫނާއި އުސޫލުތަކާއި ޚިލާފަށް އިހުސާން ގިނަ ކަންތައްތަކެއް ކުރައްވަމުން ގެންދަވާކަމަށް ފާހަގަކުރައްވާ މީކާއިލް ވަނީ އެކަންކަމަށް ފާޑު ވިދާޅުވެފައެވެ. އަދި އެކްސްޕެޓް ސިސްޓަމްގެ މަސައްކަތް ވަކި ބަޔަކަށް ފައިދާ ވާ ގޮތަށް ކުރުމަކީ ކޮރަޕްޝަންގެ ޢަމަލެއް ކަމަށް ތުހުމަތުކުރައްވާ މީކާއިލް ވިދާޅުވީ އެކަމުގެ ހަގީގަތް މިނިސްޓަރ އިހުސާން ވީ އެންމެ އަވަހަކަށް އާއްމުންނަށް ސާފުކޮށްދެއްވަންޖެހޭ ކަމަށް ޤަބޫލުކުރައްވާ ކަަމަށެވެ. އާއްމުންގެ އިތުބާރު ވަޒީރަށް ލިބޭނީ އެގޮތަށް ޢަމަލުކޮށްގެން ކަަމަށް މީކާއިލް ވަނީ ވިދާޅުވެފައެވެ.
ދިވެހިރާއްޖޭގައި ވަޒީފާ އަދާކުރާ ބިދޭސީންގެ ކަންކަން ބެލެހެއްޓުމަށްޓަކައި މޯލްޑިވްސް އިމްގްރޭޝަން އިން ބޭނުންކުރުމަށް ދިވެހިރާއްޖޭގެ ކުންފުންޏަކުން އޮންލައިން އެކްސްޕެޓް ސިސްޓަމެއް ގާއިމުކޮށްފައި ވަނިކޮށް އަލުން އެކަން ކުރަން ޖެހުނު ސަބަބާއި މެދު މީކާއިލް ސުވާލު އުފެއްދެވިއެވެ. އެގޮތުން އެ ނިޒާމު ހުއްޓުމަކަށް ގެނެސް، ދިވެހިރާއްޖޭގައި އުޅޭ ބިދޭސީންގެ އެންމެހައި ކަންކަން ބެލެހެއްޓުމަށް ކޮރަޕްޝަންގެ ބޮޑެތި ތުހުމަތުތަކެއް ކުރެވިފަވާ، "ބްލެކްލިސްޓް" ވެފައިވާ މެލޭޝިއާ ގެ ބެސްޓިނެޓް ނަމަކަށް ކިޔާ ކުންފުންޏަކާ ހަވާލުކުރީ ކީއްވެތޯ ދިވެހިންނަށް ސާފުވާން ޖެހޭ ކަމަށް މީކާއިލް ވިދާޅުވިއެވެ.
ހަމައެހެންމެ މި އެއްބަސްވުމުގެ ދަށުން އެ ކުންފުންޏަށް އަހަރަކު 460 މިލިއަން ރުފިޔާގެ ކޮންޓްރެކްޓެއް އެވޯޑްކޮށްފައިވާތީ އެކަމުގެ ކަންބޮޑުވުން ވެސް މީކާއިލް ވަނީ ހިއްސާކުރައްވާފައެވެ. އެއްބަސްވުން އެކުލަވާލަން ޖެހުނު ސަބަބާއި މެދު ވަޒީރު ދައްކަވާ ވާހަކަތައް ވެސް ދިމާ ނުވާކަމަށް މީކާއިލްގެ ވާހަކައިގައި ފާހަގަކުރައްވާފައިވެއެވެ. އެގޮތުމް 2013-2018 ގެ ސަރުކާރުން ބެސްޓިނެޓާއެކު ވެފައިވާ އެއްބަސްވުމަށް އަމަލުނުކޮށްފިނަމަ، ބެސްޓިނެޓަށް، 13.7 މިލިއަން ޑޮލަރުގެ ގެއްލުމުގެ ބަދަލު ދޭންޖެހުމުގެ ފުރުސަތު އޮތް ކަމަށް މިނިސްޓަރ ޢަލީ އިޙްސާން ވިދާޅުވި ނަމަވެސް އެކަން އޮތީ އެހެން ނޫން ކަމަށް މީލާއިން ވިދާޅުވިއެވެ. ސަބަބަކީ 2013-2018 ގެ ސަރުކާރާ ބެސްޓިނެޓް ކުންފުންޏާއެކު ގާނޫނީ ގޮތުން ބަނދެވިގެންވާ އެއްބަސްވުމެއް އެކުލަވާލާފައިނުވުމާއި އެ ކުންފުންޏަށް ލިބެންޖެހޭ ކަމަށް ބުނާ ގެއްލުމުގެ ބަދަލާ ގުޅިގެން އެއްވެސް ޝަކުވާއެއް އަދި ދައުވާއެއްވެސް ހުށަހަޅާފައި ނެތުން ކަމަށް މީކާއިލް ވިދާޅުވިއެވެ.
އެކްސްޕެޓް ސިސްޓަމް މެދުވެރިކޮށް ރާއްޖޭގައި ވަޒީފާ އަދާކުރާ ބިދޭސީންނަށް ބޭނުންވާ ހުއްދަ ދޫކުރަމުން ދާއިރު އެ ނިޒާމްގެ ބޭނުމަކީ އެ ބިދޭސީންގެ ކަންކަން ހަރުދަނާގޮތެއްގައި ބެލެހެއްޓުމެވެ. މިދިޔަ ފެބްރުއަރީ މަހުގެ 26 އިން މާރޗް 11 ގެ ނިޔަލަށް މިނިސްޓްރީން ވަނީ އެކްސްޕެޓް ސިސްޓަމުން ދެމުންދިޔަ ބައެއް ޚިދުމަތްތައް މެދުކަނޑާލާފައެވެ. އެހެންނަމަވެސް ދެމަސް ދުވަސް ތެރޭގައި އަލުން މަސައްކަތް ފަށާނެ ކަމަށް ހޯމް މިނިސްޓްރީން ވަނީ ހާމަކޮށްފައެވެ. އެ ނިޒާމް އެކުލަވާލުމުގައި ވަކި ބަޔަކަށް ފައިދާ ވާ ގޮތަށް އަމަލުކުރަނީ ވަކި ބަޔަކަށް މާލީ މަންފާތަކެއް ހޯދާދިނުމަށް ކަމަށް އިދިކޮޅު ފަރާތްތަކުން ދަނީ ތުހުމަތުކުރަމުންނެވެ.
ދައުލަތަށް ލިބެން އޮތް ފައިދާއަކަށް އުނިކަމެއް ލިބޭގޮތަށް ޢަމަލުކުރުމަކީ ދިވެހިރާއްޖޭގެ ޤާނޫނުލްޢުޤޫބާތުގެ 517 ވަނަ މާއްދާގައި ބުނާ ޖިނާއީ ކުށުގެ އަމަލެކެވެ.
މިނިސްޓަރ އިހުސާންގެ އިތުބާރު ނެތްކަމުގެ މައްސަލަ ހުށަހެޅީ ނިމިދިޔަ ހަފްތާގެ ހުކުރު ދުވަހުއެވެ. އެ މައްސަލަ ހުށަހަޅާފައި ވަނީ އެމްޑީޕީގެ 12 މެމްބަރުންގެ ސޮޔާއި އެކުގަ ކަމަށް ވާއިރު އެ މައްސަލައިގެ ސޮއިކުރުމުގެ މަސައްކަތް ކުރީ ޖެނުއަރީ 16ގައެވެ.
