ޑޮލަރުން އާމްދަނީ ލިބޭ ވިޔަފާރިތަކުން ޑޮލަރު މާރުކުރަން ލާޒިމު ކުރި ގާނޫނަށް އަމަލު ކުރަން ފެށުމާއެކު ރިސޯޓުތަކުގައި މަސައްކަތް ކުރާ މުވައްޒަފުންގެ މުސާރަ އާއި ސަރވިސް ޗާޖު ދިވެހި ރުފިޔާ އިން ދޭން ފެށުމުން މުވައްޒަފުންގެ އާމްދަނީ ދަށަށް ހިނގައްޖެއެވެ.

ޓޫރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް) އިން ފާހަގަ ކުރި ގޮތުގައި، ޑޮލަރުން މުސާރަ ލިބެމުން އައި މުވައްޒަފުންނަށް ރުފިޔާ އިން މުސާރަ ދޭން ފެށުމުން 3،000 ރުފިޔާ އިން ފެށިގެން 5،000 ރުފިޔާއާ ހަމައަށް މަހަކަށް ޖެހޭ އާމްދަނީ މަދުވެގެންދާނެއެވެ.

ޓީމް އިން ފާހަގަ ކުރާ ގޮތުގައި މި ކަމުގެ ސަބަބުން މުދަލުގެ އަގާއި ދިރިއުޅުމުގެ ޚަރަދުތައް އިތުރުވަމުން ދިއުމުގެ ސަބަބުން މުވައްޒަފުންނަށް ކުރިމަތިވެފައިވާ މާލީ ބުރަ އިތުރަށް ބޮޑުވެގެން ދާނެއެވެ.

މީގެ އިތުރުން، ޓޫރިޒަމް ދާއިރާގެ މަސައްކަތްތެރިންގެ ގާތްގަނޑަކަށް 70 އިންސައްތައަކީ ބިދޭސީން ކަމަށްވާތީ، އެ މީހުންނަށް ކުރިމަތިވެފައިވާ ގޮންޖެހުންތައް ވެސް ޓީމްއިން ވަނީ ފާހަގަ ކޮށްފައެވެ. މި މުވައްޒަފުންގެ ތެރެއިން ގިނަ މީހުންނަކީ އެމެރިކާ ޑޮލަރުން ލިބޭ އާމްދަނީ އަށް ބަރޯސާވާ މީހުން ކަމަށާއި އެމީހުންގެ ޢާއިލާތަކަށް ރާއްޖެއިން ބޭރަށް ފައިސާ ފޮނުވަމުން ގެންދާތީ، ފައިސާ މާރުކުރަން ޖެހުމުގެ ސަބަބުން އެ މުވައްޒަފުންނަށް އިތުރު ދަތިތަކެއް ކުރިމަތިވެފައިވާ ކަމަށް ވެސް ޓީމް އިން ބުނެފައިވެއެވެ.

މިކަންކަން މިހެން ހުރުމާއެކު ޓީމް އިން ވަނީ ފޮރިން އެކްސްޗޭންޖް ގާނޫނަށް ގެނެވުނު ބަދަލުތަކުގެ ސަބަބުން ރިސޯޓު މުވައްޒަފުންގެ މުސާރަ އާއި ސަރވިސް ޗާޖު އެމެރިކާ ޑޮލަރުން ދިވެހި ރުފިޔާއަށް ބަދަލުވެގެން ދިއުމާ ގުޅިގެން ކަންބޮޑުވުން ފާޅުކޮށްފައެވެ.

މި ހިނގާ ޖަނަވަރީ މަހުން ފެށިގެން ޢަމަލުކުރަން ފަށާފައިވާ ގާނޫނަށް ގެނައި ބަދަލުތަކުގެ ދަށުން، ރިސޯޓުތައް ހިމެނޭ ގޮތަށް ބޭރު ފައިސާ ލިބޭ ވިޔަފާރިތަކުން ކޮންމެ ފަތުރުވެރިއަކަށް 500 ޑޮލަރު ނުވަތަ އާމްދަނީގެ 20 އިންސައްތަ ދިވެހި ރުފިޔާއަށް މާރު ކުރަން ޖެހެއެވެ.

މީގެ ނަތީޖާއެއްގެ ގޮތުން، ބައެއް ރިސޯޓުތަކުން ވަނީ މުސާރަ އާއި ސަރވިސް ޗާޖު އެމެރިކާ ޑޮލަރުގެ ބަދަލުގައި ދިވެހި ރުފިޔާ އިން ދޭން ފަށާފައެވެ.

މި ބަދަލުތަކުގެ ސަބަބުން މުވައްޒަފުންނަށް ކުރިމަތިވެފައިވާ މާލީ ދަތިތަކަށް ހަވާލާދީ ސަރުކާރުން މިކަމަށް އަވަސް ފިޔަވަޅު އަޅައިދިނުމަށް ޓީމް އިން ގޮވާލާފައިވެއެވެ.

މުސާރައާއި ސަރވިސް ޗާޖު ދިވެހި ރުފިޔާއަށް ބަދަލުކުރުން ހުއްޓާލުމަށް ވެސް ޓީމް އިން ވަނީ ސަރުކާރަށް ގޮވާލާފައެވެ. މީގެ އިތުރުން، ވަޒީފާގެ އެއްބަސްވުމުގައި ހިމެނިފައިވާ އަސްލު ޝަރުޠުތައް ދެމެހެއްޓުމުގެ މުހިންމުކަން ޓީމް އިން ފާހަގަކޮށްފައިވެއެވެ. އެގޮތުން، މުސާރަ އާ ބެހޭ ގޮތުން ފުރަތަމަ އެއްބަސްވި ގޮތައް ބަދަލު ގެނައުމަކީ ޓޫރިޒަމް ދާއިރާގައި މަސައްކަތްކުރާ މުވައްޒަފުންގެ މާލީ ރައްކާތެރިކަމަށް އުނިކަމެއް ގެނުވާ ކަމެއް ކަމަށް ޓީމް އިން ބުނެފައިވެއެވެ.

ޓީމް އިން ފާޅުކޮށްފައިވާ ކަންބޮޑުވުންތަކާ ގުޅިގެން، ސަރުކާރުން އަދި އެއްވެސް އެއްޗެއް ބުނެފައެއް ނުވާ ކަމަށާއި، ބޭރު ފައިސާގެ ގާނޫނަށް ގެނައި ބަދަލާ ގުޅިގެން ފަތުރުވެރިކަމުގެ ދާއިރާގައި މަސައްކަތް ކުރާ މުވައްޒަފުންގެ އާމްދަނީ އަށް ކޮށްފާނެ އަސަރާ ބެހޭ ގޮތުން ވެސް އެއްވެސް ކަމެއް ސާފުކޮށްދީފައި ނުވާ ކަމަށް ވެސް ބުނެފައިވެއެވެ.