ޤާނޫނުއަސާސީ ވުޖޫދުގައި އޮތަސް، އެއީ ނެތް އެއްޗަކަށް މި ސަރުކާރުން ހަދައިފި - ޝިފާޒް
ޝިފާޒް ވަނީ 31 ޖެނުއަރީގައި އޮންނަ އެއްވުމަށް ވީހާވެސް ގިނަ ބަޔަކު އެއްވެ ޤާނޫނުއަސާސީގެ ދިފާއުގައި އަޑު އުފުލުމަށް ގޮވާލާފަ
ޕީޓްރަލް ޕާކް ކަންމަތީ ޖަލްސާގައި އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒް ވާހަކަ ދައްކަވަނީ
ޤާނޫނުއަސާސީ ވުޖޫދުގައި އޮތަސް، ޤާނޫނުއަސާސީ އަކީ ނެތް އެއްޗަކަށް މި ސަރުކާރުން ހަދާފައިވާ ކަމަށް އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒް ވިދާޅުވެއްޖެއެވެ.
ޝިފާޒް އެފަދައިން ވިދާޅުވީ އެމްޑީޕީން ބުރާސްފަތި ދުވަހުގެ ރޭ ބޭއްވި ޕީޓްރަލް ޖަލްސާގައި ވާހަކަދައްކަވަމުންނެވެ.
ރައްޔިތުން ބުރަ މަސައްކަތުން ހޯދި ޤާނޫނުއަސާސީ އަށް 18 ވަރަކަށް އަހަރުވީ އިރު މި ސަރުކާރުން އެއީ ނެތް އެއްޗަކަށް ހަދާފައިވާ ކަމަށާއި މިއަދު ޤާނޫނުއަސާސީގެ ދިފާއުގައި ނުކުންނަން ޖެހުނު ސަބަބަކީ އެއީ ކަމަށް ޝިފާޒް ވިދާޅުވިއެވެ. ޝިފާޒް ވިދާޅުވީ ބޭސްފަރުވާ އަށް ސަލާންޖަހަން ޖެހުމާއި، ފޮތް ލިސްޓާއި ޔުނިފޯމް ހޯދުމަށް މެމްބަރުން ކައިރީގައި އާދޭސްކުރަން ޖެހުމާއި، އިޖުތިމާއީ ހައްގުތައް ރައްކާތެރި ނުވެގެން ސަލާންޖެހުން ޤާނޫނުއަސާސީ އާއި އެކު ނިމުމަކަށް ގެނެވުނު ކަމަށެވެ. އެހެންނަމަވެސް މިހާރު އަނެއްކާވެސް އެ ވާހަކަ ދައްކަން ޖެހުނީ މި ސަރުކާރުން ޤާނޫނުއަސާސީގެ ބާރުކަނޑުވާލާ އެއީ ނެތް އެއްޗަކަށް ހަދަމުންދާތީ ކަމަށް އޭނާ ވަނީ ވިދާޅުވެފައެވެ. ބުރަ މަސައްކަތުން ޤާނޫނުއަސާސީ ހޯދި ރައްޔިތުން ދުނިޔޭގަ ތިބެ ޤާނޫނުއަސާސީ ބީވެދާތަން ބަލަން ނުތިބޭނެކަމަށް އޭނާ ވިދާޅުވިއެވެ.
ޤާނޫނުއަސާސީގައި ބަޔާންކުރާ އެންމެ މުހިންމު އެއް ކަމަކީ ތިން ބާރު ވަކިވެފައިވާ ނިޒާމެއް ކަމަށް ވާއިރު، ރައްޔިތުންގެ މަޖިލީހުގައި ތިބީ ރައީސުލްޖުމްހޫރިއްޔާގެ މެމްބަރުން ކަމަށް ނިންމާފައިވާ ކަމަށް ވެސް ޝިފާޒް ވިދާޅުވިއެވެ. މަޖިލީހުގައި ތިބީ ރައްޔިތުންގެ މަންދޫބުން ނޫންކަމަށް މަޖިލީހުން ނިންމާފައިވާ ކަމަށާއި މަޖިލީހުގައި 80% ހިއްސާކުރަނީ ރައީސްގެ މެމްބަރުންކަަމށް އެ މަޖިލީހުން ބުނަމުންދާ ކަމަށް އޭނާ ވިދާޅުވިއެވެ. ޤާނޫނުއަސާސީގެ ދިފާއުގައި އަނެއްކާވެސް ނުކުންނަން ޖެހުނީ އެ ސަބަބާއި ހުރެ ކަމަށް ޝިފާޒް ވިދާޅުވިއެވެ.
ޝިފާޒް ވިދާޅުވީ ރައްޔިތުންނަށް ޤާނޫނުއަސާސީ އާއި އެކު ކަށަަވަރުކޮށްދިން އެންމެ މުހިންމު އަނެއްކަމަކީ އިޖުތިމާއީ ރައްކާތެރިކަންކަމަށެވެ. އެގޮތުން އުމުރުން ދުވަސްވީ މީހުންނަށް އިނާޔަތް ދިނުމާއި، އެކަނިވެރި މައިންނަށް އިނާޔަތް ދިނުމާއި، އާސަންދަ ފަދަ ޚިދުމަތްތައް ހޯދާދެވުނުކަން އޭނާ ފާހަގަކުރެއްވިއެވެ. ނަމަވެސް މިއަދު އިޖުތިމާއީ ރައްކާތެރިކަން ހޯދާދޭން އޮތް އިދާރާއިން ދަނީ ޓީވީ ސްޓޭޝަންތައް ޤާއިމްކުރަމުންކަމަށާއި އެއީ ބަލައިގަނެވޭ ކަމެއް ނޫންކަމަށް ޝިފާޒް ވިދާޅުވިއެވެ. އެތައް މިލިއަން ރުފިޔާ އެއް އެކަމަށް ހޭދަކުރި އިރު ދައުލަތުގެ ބަޖެޓަށް ވީ ގޮތެއް ސާފު ނުވާ ކަމަށް ޝިފާޒް ވަނީ ފާހަގަކުރައްވާފައެވެ. ނަމަވެސް މިހާރު އޮތް މަޖިލީހުން އެކަންކަން ސާފުކޮށް ނުދެއްވާނެކަން ޔަޤީންވާކަމަށް ޝިފާޒް ވިދާޅުވިއެވެ.
ޝިފާޒް ވަނީ 31 ޖެނުއަރީގައި އޮންނަ އެއްވުމަށް ވީހާވެސް ގިނަ ބަޔަކު އެއްވެ ޤާނޫނުއަސާސީގެ ދިފާއުގައި އަޑު އުފުލުމަށް ގޮވާލާފައެވެ. 31 ޖެނުއަރީގައި ބޮޑު އެއްވުމެއް ބާއްވަން އެމްޑީޕީން ދަނީ ތައްޔާރުވަމުންނެވެ. މި ހަރަކާތް ބާއްވަނީ ފުދިއްޖެ، ފުނޑިއްޖެ މި ނަމުގައެވެ.
