ޔުވެންޓަސް ކައިރިން އެޓަލަންޓާ އެއްވަރު

އިޓާލިއަން ލީގުގައި ޔުވެންޓަސްއާ ދެކޮޅަށް ކުޅުނު މެޗު އެއްވަރުވެ، ފަރަގު ކުޑަ ކުރަން ލިބުނު ފުރުސަތު އެޓަލަންޓާ އިން ނަގާލައިފި އެވެ.

އެޓަލަންޓާގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ޔުވެންޓަސް އިންނެވެ. ނަމަވެސް އެޓަލަންޓާ އިން ވަނީ ފަހަތުން އަރައި ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.

މެޗުގެ ދެ ވަނަ ހާފު ފަށައިގެން ނުވަ ވަނަ މިނެޓުގައި ޔުވެންޓަސް އަށް ލީޑު ނަގައިދިނީ ޕިއެރޭ ކަލޫލޫ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ވެސްޓަން މެކްނީ އެވެ. މެޗުގައި ލަނޑު ޖެހުމަށް އެޓަލަންޓާ އިން ކުރަމުން އައި މަސައްކަތް ކާމިޔާބު ކުރެވުނީ 78 ވަނަ މިނެޓުގަ އެވެ. އެ ލަނޑު އެޓަލަންޓާ އަށް ޖަހައިދިނީ މެޗުގައި ބަދަލު ކުޅުންތެރިޔެއްގެ ގޮތުގައި ކުޅެން ނިކުތް މަތެއޯ ރަޓެގުއި އެވެ.

ނަތީޖާ އާއެކު އެޓަލަންޓާ އޮތީ ލީގު ތާވަލްގެ ތިން ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ 20 މެޗުން 43 ޕޮއިންޓާ އެކު އެވެ. ލީގު ތާވަލްގެ ފަސް ވަނައިގައި ޔުވެންޓަސް އޮތީ 20 މެޗުން 34 ޕޮއިންޓާ އެކު އެވެ. އެއް ވަނައިގައި ނަޕޯލީ އަށް 47 ޕޮއިންޓު ލިބޭއިރު، ދެ ވަނައިގައި އޮތް އިންޓަރ މިލާނަށް ލިބެނީ 43 ޕޮއިންޓެވެ.