މީގެ އަހަރެއްހާ ދުވަސް ކުރިން ހައިދަރު ވިދާޅުވި ލަވަ މުއްތަލިބު ތަކުރާރު ކުރައްވައިފި

ގެދޮރުވެރިޔާ ސްކީމްގެ ދަށުން އިއުލާނު ކުރި ފްލެޓް ލިބުނު މީހުންގެ ފޯމުތައް "ވެރިފައި" ކުރަން ނިންމަވާ، އައު ހައުސިންގ މިނިސްޓަރ އެކަން ރައީސް އޮފީހުގައި ބޭއްވި ނޫސް ކޮންފަރެންސެއްގައި އަންގާރަ ދުވަހު އިއުލާނު ކުރައްވައިފިއެވެ.

ލިސްޓުގައި މައްސަލަ ހުރިކަން ކަމާ ބެހޭ މުއައްސަސާތަކުން އަންގާފައިވާތީ ލިސްޓު ވެރިފައި ކުރުމަކީ ކުރަން ޖެހޭ ކަމެއް ކަމަށް މިނިސްޓަރ ވިދާޅުވިއެވެ.

އެހެން ކަމުން ކުރީ ސަރުކާރުން އިއުލާނު ކުރި ގެދޮރުވެރިޔާ ސްކީމުގެ ޝަރުތުތަކަށް ލިސްޓުގައި ވާ މީހުން ފެތޭތޯ ނުވަތަ ނުފެތޭތޯ ބައްލަވާނެ ކަމަށް އޭނާ ވިދާޅުވިއެވެ. އޭގެ ފަހުން ލިސްޓު ގެޒެޓް ކުރެވޭނީ ކޮންމެ މީހަކަށް ޕޮއިންޓް ލިބުނު ގޮތާއި ހޮވުނިއްޔާ ހޮވުނު ގޮތާއި ނުހޮވުނިއްޔާ ނުހޮވުނު ގޮތް އެނގެން އޮންނާނެ ގޮތައް ކަމަށްވެސް މުއްތަލިބު ވިދާޅުވިއެވެ.

ކުރިން ހައުސިންގ އެންޑް އާބަން ޑިވެލޮޕްމަންޓުން މަސައްކަތް ކުރިއަށް ގެންދަން ނިންމާފައި އޮތީ ލަފާދޭ ކޮމިޓީއެއް ހަދައިގެން މަސައްކަތް ކުރިއަށް ގެންދަން ކަން މިނިސްޓަރ ފާހަގަ ކުރެއްވިއެވެ.

ކުރިން ހާމަވެފައިވާ މައުލޫމާތައް ބަލާއިރު މި ކަމަށް ދެ ކޮމިޓީއެއް އެކުލަވާލެވި އެ ދެ ކޮމިޓީންވެސް ދޭން ޖެހޭ ލަފައެއް އޮތީ ހައުސިންގ މިނިސްޓްރީ އަށް ދީފައެވެ.

ގެދޮރުވެރިޔާ ސްކީމް އަށް ލަފާދޭ ކޮމީޓީން ވަރަށް އިޚްލާސްތެރި މަސައްކަތެއް ކޮށްދެއްވާފައިވާ ކަން މުއްތަލިބު ފާހަގަ ކުރެއްވިއެވެ.

ހުރިހާ ބޭފުޅުންވެސް މަސައްކަތް ކުރައްވާފައިވަނީ އެންމެ އިންސާފުވެރިކަމާއެކު ފްލެޓް ހައްގުވާ ފަރާތްތަކަށް ފްލެޓް ދިނުމަށް ކަމަށް މުއްތަލިބު ވިދާޅުވިއެވެ.

އޭރު ގެންދިޔައީ 20،000 މީހުންގެ ރީއިވެލުއޭޝަންގެ މަސައްކަތާއި 4000 މީހުންގެ ވެރިފިކޭޝަން ޕްރޮސެސް ކަމަށް މިނިސްޓަރ ވިދާޅުވިއެވެ.

މިހާރު "މިކުރާކަމަކީ ކޮންސަންޓްރޭޓް ކޮށް މި 4000 މީހުންގެ ތެރޭގައި އެއްވެސް ފަރާތެއް ޝަރުތު ހަމަ ނުވޭތޯ ނޫންތޯ ބަލާފައި އެ ފަރާތްތަކަށް ވީހާވެސް އަވަހަކަށް ދިނުން،" ކަމަށް މުއްތަލިބު ވިދާޅުވިއެވެ.

މިނިސްޓަރު ޑރ. އަބްދުﷲ މުއްތަލިބް ވިދާޅުވީ އެކަން ކުރައްވަނީ ވީހާވެސް ބޮޑަށް ފްލެޓް ލިބުނު ކަމަށް އިއުލާނު ކުރި 4000 މީހުންގެ ހައްގުތައް ރައްކައުތެރި ކުރުމަށް ކަމަށެވެ.

މިއީ މިހާރުގެ ހައުސިންގ މިނިސްޓަރ ގެދޮރުވެރިޔާ ސްކީމްގެ މަސައްކަތް ގެންދަވާ ގޮތާ ބެހޭ ގޮތުން އަންގާރަ ދުވަހު ހިއްސާ ކުރެއްވި ބައެއް ވާހަކަފުޅުތައް ހުރި ގޮތެވެ.

މީގެ އަހަރެއްހާ ދުވަސް ކުރިއަށް ޖެހިލާއިރު، 04 ޑިސެމްބަރު 2023 ގައި ފްލެޓްތަކުގެ މައްސަލައިގައި ކުރިން ހުންނެވި ހައުސިންގ މިނިސްޓަރ ޑރ. އަލީ ހައިދަރު ރައްޔިތުންގެ މަޖިލީހުގެ ޕެޓިޝަން ކޮމިޓީއަށް ވަޑައިގަތެވެ.

ކޮމިޓީގައި ވާހަކަފުޅު ދައްކަވަމުން ހައިދަރު ވިދާޅުވީ އެމަނިކުފާނު ކުރައްވާނެ ކަމަކީ އެ 4000 މީހުންގެ ހައްގުތައް ވީހާވެސް ރަނގަޅަށް ރައްކައުތެރިކުރެވޭތޯ ބެއްލެވުން ކަމަށެވެ.

"ޝަރުތު ހަމަވޭތޯ ނުވޭތޯ ބަލާފައި، ޝަރުތު ހަމަވާ މީހުންނަށް ހަމަ ޔަގީންކަން ދެން އަޅުގަނޑުމެން ފްލެޓް ހަވާލު ކުރާނެ ކަމުގެ،" ކޮމިޓީގައި ހައިދަރު ވިދާޅުވިއެވެ.

ހައިދަރު އެހެން ވިދާޅުވި ފަހުން އަހަރަކަށް ވުރެ ގިނަ ދުވަސްވީއެވެ. މިހާރު ހައިދަރު ހުންނެވީ އެހެން މިނިސްޓްރީ އަކަށް ބަދަލު ކުރައްވާފައެވެ. ހައުސިންގ މިނިސްޓްރީ އަށް ގެންނެވީ މުއްތަލިބެވެ. މިނިސްޓަރު ބަދަލު ވިޔަސް މިނިސްޓްރީގެ ކޮންޓިނިއުޓީ އޮންނާނެ ކަމަށް އާންމު އުސޫލުން ގަބޫލު ކުރެވެއެވެ.

މުއްތަލިބު ވިދާޅުވީ ވެރިފިކޭޝަންގެ މާނަ ސާފުކޮށްދެއްވަމުން އޭނާ ވިދާޅުވީ އެއީ 4000 މީހުންގެ ތެރޭގައި ޝަރުތު ހަމަ ނުވާ މީހުން ބެލުން ކަމުގައެވެ. ހައިދަރު ވެސް ކުރެއްވީ ހަމަ އެ މަސައްކަތެވެ. 20،000 ފޯމުގެ އިތުރުން 4000 ފޯމުގެ ޝަރުތު ހަމަވޭތޯ ބެލުމެވެ. އެހެން ނަމަވެސް މުއްތަލިބުގެ ވާހަކަފުޅުން އެކަމެއް އަދި ނުނިމެއެވެ. އެހެން ނޫންނަމަ އެ 4000 މީހުންގެ ފޯމުތައް ވެރިފައި ކުރައްވާނެ ކަމަކަށް ވިދާޅެއް ނުވީހެވެ.

އަހަރެއް ވަންދެން ހައިދަރު ވެސް 4000 މީހުންގެ ހައްގުތައް ރައްކައުތެރި ކުރެއްވީ އެވެ. ހައްގުތައް ރައްކައުތެރި ކުރަން ކުރެއްވި މަސައްކަތެއްގެ ނަތީޖާ އެއް ނުފެނުނެވެ. ދެން ވަޑައިގެންނެވި މުއްތަލިބު އެ ފެއްޓެވީ ހަމަ އެ 4000 މީހުންގެ ހައްގުތައް ރައްކައުތެރި ކުރައްވާށެވެ. ހައްގުތައް ރައްކައުތެރި ކުރުމަށް ދެބޭފުޅުންވެސް މިކުރައްވަނީ އެއް ކަމެކެވެ. އެއީ ވެރިފައި ކުރައްވަނީއެވެ.

މުއްތަލިބު ވިދާޅުވީ، ރޯދަ މަހުގެ ކުރިން ވެރިފައި ކުރުމަށް ފަހު ލިސްޓު ނެރުއްވާނެ ކަމަށެވެ. ރޯދަ މަހަށް ދެން އޮތީ 45 ދުވަހެވެ. 4000 ފޯމުގެ ރޭޓުން ބެލިޔަސް ކޮންމެ ދުވަހަކު 89 މީހުންގެ ފޯމު ވެރިފައި ކުރަން ޖެހޭނެއެވެ. ކުރީގެ ސަރުކާރުން އިއުލާން ކުރި އުސޫލަށް ފްލެޓް ލިބުނު އެންމެން ހުށަހެޅި ލިޔެކިޔުންތައް ބަލާ ސައްހަތޯ ޗެކް ކުރާނެއެވެ.