ރޭގަނޑު ޝިކާރަ ކުރަން ނުކުމެ އުޅޭ ދޫންޏެއް ކަމަށްވާ ބަކަމޫނެއް، ޔޫކްރެއިން މަތިން އުދުހުނު ރަޝިޔާގެ ޑްރޯނެއް ވައްޓާލައިފިއެވެ.

މި މަންޒަރު ފެންނަ ވީޑިއޯ އެއް ސޯޝަލް މީޑިއާ ގައި ވަނީ ވައިރަލް ވެފައެވެ.

މި ހާދިސާ ހިނގާފައިވަނީ ޑޮނެޓްސްކް އޮބްލާސްޓް ގައި ކަމަށް ބުނެވެއެވެ. ވީޑިއޯ ގައި ފެންނަނީ ބަކަމޫނު ސީދާ ޑްރޯނަކާ ދިމާއަށް އުދުހުނު މަންޒަރެކެވެ.

ސޯޝަލް މީޑިއާގައި މި ވީޑިއޯ ޕޯސްޓްކޮށްފައިވާ ފަރާތްތަކުން ބުނެފައިވަނީ މި ބަކަމޫނަކީ "ޔޫކްރެއިންގެ ބަޔޯ ލެބްތަކުން" އައި އެއްޗެއް ކަމަށެވެ. މިއީ ހަނގުރާމަ ފެށުނުއިރު ރަޝިޔާ އިން ފެތުރި ކޮންސްޕިރަސީ ތިއަރީއަކަށް އިޝާރާތްކޮށް ބުނެފައިވާ އެއްޗެކެވެ. ރަޝިޔާ އިން ފެތުރި ވާހަކައިގައި ބުނެފައިވަނީ އެމެރިކާއިން ކީވް ގައި ބަޔޯލެބްތައް ހިންގައި، ބަޔޯލޮޖިކަލް ހަތިޔާރު ތައްޔާރުކުރަމުންދާ ކަމަށެވެ.

ޔޫކްރެއިނުން މި ވާހަކަތައް ދޮގުކޮށްފައިވެއެވެ. ސެކިއުރިޓީ ސަރވިސް އޮފް ޔޫކްރެއިން (އެސްބީޔޫ) އިން ނެރުނު ބަޔާނެއްގައި ބުނެފައިވަނީ، "ޔުކްރެއިންގައި އެއްވެސް ބޭރު ޤައުމެއްގެ ބަޔޯލޮޖިކަލް ލެބޯޓަރީއެއް ނުހިންގެއެވެ. ފަހަކަށް އައިސް މިކަމާ ބެހޭ ގޮތުން ސިޔާސީ ފަރާތްތަކުން ދައްކާފައިވާ ވާހަކަތަކަކީ ތެދެއް ނޫނެވެ. އަދި އެއީ ގަސްތުގައި ޙަޤީޤަތް އޮޅުވާލުމަށް ކުރާ ކަމެކެވެ."

ބަކަމޫނު ގޮސް ޖެހުނު ރަޝިޔާގެ ޑްރޯނަކީ އިރުމަތީ ޔޫކްރެއިން ގައި މައުލޫމާތު އެއްކުރުމުގެ މިޝަނެއް ކުރިއަށް ގެންދަން އުދުހުނު ޑްރޯނެއް ކަމަށް ވެއެވެ.

ބަކަމޫނަކީ ރަޝިޔާ – ޔޫކްރެއިން ހަނގުރާމައިގެ ތެރެއަށް ވަތް ފުރަތަމަ ޖަނަވާރު ނޫންކަން ފާހަގަ ކުރެވެއެވެ. ހަނގުރާމަ ފެށުނު އިރު، ޔުނިފޯމްތަކާއި، ރަޖަޔާއި، ކާބޯތަކެތި ހަލާކުކުރަމުންދިޔަ މީދަލުގެ އުނދަގުލުން ސަލާމަތްވުމަށް ފްރަންޓްލައިން އަށް ބުޅާ ނެރުނުކަން ފާހަގަ ކުރެވެއެވެ. މީގެ ތެރެއިން ގިނަ ބުޅާތައް މޮސްކޯއާ ދެކޮޅަށް ހަނގުރާމަ ކުރަމުންދާ ޔޫކްރެއިންގެ ސިފައިން އޮޅުކޮށްގެން ގެންގުޅޭކަން ފާހަގަ ކުރެވެއެވެ.

ޔުކްރެއިނުން ވަނީ ކުރީސަފުގެ ހަނގުރާމަވެރިންނަށް އެހީތެރިވުމަށް ރޮބޮޓިކް ކުއްތާތައް ވެސް ބޭނުންކުރަން ފަށާފައެވެ. މި ރޮބޮޓިކް ކުއްތާ އޮޕަރޭޓް ކުރަނީ ރިމޯޓްކޮށެވެ. އަދި މިއީ ވަޒަން އުފުލައި، އޮބްޒަރވޭޝަން ހެދުމުގެ ޤާބިލުކަން ލިބިފައިވާ އެއްޗެހިތަކެކެވެ.

މި ރޮބޮޓިކް ކުއްތާތައް ތަޢާރަފުކޮށްފައިވަނީ 2024 ވަނަ އަހަރުގެ ހޫނު މޫސުމުގައެވެ. މި އެއްޗެހި ތައްޔާރުކޮށްފައިވަނީ ބްރިޓިޝް ރިސްކް-މެނޭޖްމަންޓް ކުންފުންޏެއް ކަމަށްވާ ބްރިޓް އެލަޔަންސް އިން ކަމަށް ބުނެވެއެވެ. މިއީ ޑްރޯން އުފައްދާ ކުންފުންޏެކެވެ. މި ކުންފުނިން ވަނީ 30 އަށްވުރެ ގިނަ މި ބާވަތުގެ ރޮބޮޓިކް ކުއްތާ ޔޫކްރެއިނަށް ފޮނުވާފައެވެ.

މި ރޮބޮޓިކް ކުއްތާ އަކީ ޔޫކްރެއިންގެ ބާރުތަކަށް ވަރަށް މުހިންމު އެސެޓަކަށް ވަނީ ވެފައިވެއެވެ. އެއީ މި އެއްޗެހިތަކަށް ގަޑިއަކު 9 މޭލުގެ ސްޕީޑުގައި ދުވެވޭ އިރު، އަދި މީގެ ބެޓެރީ 5 ގަޑިއިރު ހިފަހައްޓައެވެ. މީގެ އިތުރުން، މި އެއްޗެހިތަކުން ނުކުންނަ ހޫނުގެ މިންވަރަކީ މުސަޅުގެ ހަށިގަނޑުން ބޭރުވާ މިންވަރުގެ ހޫނު ކަމަށްވާތީ، ރަޝިޔާގެ ޔޫއޭވީތަކަށް މި އެއްޗެހި ދެނެގަތުން އޮންނަނީ ދަތި ކަމަކަށްވެފައެވެ.