ވަގު ފޯމުގެ މައްސަލައިގައި މުއިއްޒު ހައްޔަރުކޮށް ތަހުޤީޤު ހިންގަން ކުރީގެ މިނިސްޓަރ މަލީހް ގޮވާލައްވައިފި

ވަގު ފޯމު ހުށަހަޅައިގެން ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް މީހުން ވައްދަމުންދާ މައްސަލަތައް އިންތިހާ އަށް އިތުރުވެފައިވަނިކޮށް، ވަގު ފޯމުގެ މައްސަލައިގައި ރައީސް މުއިއްޒު ހައްޔަރު ކޮށް ތަހުގީގު ކުރުމަށް ކުރީގެ މިނިސްޓަރ މަލީހް ޖަމާލު ގޮވާލައްވައިފިއެވެ.

ގިނަ އަދަދެއްގެ ބަޔަކު ސޯޝަލް މީޑިއާގައި އެމީހުންނަށް ނޭނގި ޕީއެންސީ އަށް ވައްދާފައިވާ ކަމުގެ ކަންބޮޑުވުން ފާޅު ކުރަމުންދާ ދަނޑިވަޅެއްގައި އެކްސް ގައި ކުރެއްވި ޕޯސްޓެއްގައި މަލީހް ވިދާޅުވީ، "މުއިއްޒުގެ އިރުޝާދާއި ނުލާ މިފަދަ ކަމެއް ކުރަން ޕީއެންސީ އަށް ނުކެރޭނެ." ކަމަށެވެ.

ޕީއެންސީގެ ރައީސްގެ ގޮތުގައި މުއިއްޒު ހުންނެވި އިރު، ވަގު ފޯމު ފުރާފައިވަނީ ބޮޑުތަކުރުފާނު މަގުގައި ހުންނަ އެ ޕާޓީގެ ޖަގަހައިގެ ކޮޓަރިއެއްގެ ތެރޭގައި ކަމަށް ޕީއެންސީ އަށް ނިސްބަތްވާ މާފަންނު މެދު ދާއިރާގެ މެންބަރު އަސްމާ ރަޝީދު ވިދާޅުވެފައިވާ ކަމަށް ބައެއް މީޑިއާތަކުގައި ވަނީ ރިޕޯޓު ކޮށްފައެވެ.  ޕީއެންސީގެ މަޖިލިސް މެންބަރުން ތިބޭ ވަޓްސްއެޕް ގްރޫޕަކަށް ފޮނުއްވި މެސެޖެއްގައި އަސްމާ ވިދާޅުވި ކަމަށް ވަނީ މެންބަރުން އިތުރުކުރަން ފޯމުތައް ތައްޔާރު ކުރީ އައިޑީ ކާޑުގައި ހުންނަ މީހުންގެ ފޮޓޯތައް ބަދަލުކޮށް ގަމީސް ނުވަތަ ހެދުމުގައި ކުލަ ޖައްސައިގެން ކަމަށެވެ.

މަލީހް ވިދާޅުވީ، މުއިއްޒު މަޤާމުގައި ހުރެއްޖެނަމަ ދިވެހި ހުރިހާ ރައްޔިތުންގެ ސޮޔާއި ފިންގަރ ޕްރިންޓް ފޯޖުކޮށް އިލެކްޝަންސް ކޮމިޝަނުން ގިނަ އަދަދެއްގެ ފައިސާ ނަގާފާނެ ކަމަށެވެ.

ވަގު ފޯމު ހުށަހަޅައިގެން ގިނަ އަދަދެއްގެ ބަޔަކު ޕީއެންސީ އަށް ވައްދަމުންދާ މައްސަލަ ހޫނުވެގެން ދިޔައީ، އެމްޑީޕީ އަށް ނިސްބަތްވާ ވައިކަރަދޫ ދާއިރާގެ މެމްބަރު ހުސެއިން ޒިޔާދު (ފިއްޓޭ) ޕީއެންސީ އަށް ވަގަށް ވެއްދިކަން ފަޅާ އެރި ހިސާބުންނެވެ.

ޒިޔާދުގެ ފޯމުގައި ހެކިވެރިންގެ ގޮތުގައި ސޮއި ކޮށްފައިވަނީ ރ. އަލިފުށީ، ކިޔުބާ އައިމިނަތު އަލީ އާއި ސ.ހުޅުދޫ ސުވާސާގޭ އަލީ އިޒްހާން ކަން ހާމަވެއްޖެއެވެ.

ޕީއެންސީގެ ޕާޓީގެ ރަޖިސްޓްރަރ މުހައްމަދު އަފޫ ހާމިދު ޒިންމާވާ ގޮތައް ޕާޓީގެ ތައްގަނޑު ޖަހާ ހުށަހެޅި ފިއްޓޭގެ ފޯމު އިލެކްޝަންސް ކޮމިޝަނަށް ހުށަހަޅާފައިވަނީ 24 ޑިސެމްބަރު 2024 ގައެވެ.