އާސެނަލް މޮޅުނުވުމުން އާޓެޓާ ހުރީ ހައިރާންވެފައި!

އިނގިރޭސި އެފްއޭ ކަޕްގެ ތިން ވަނަ ބުރުގައި މެންޗެސްޓަރ ޔުނައިޓެޑާ ދެކޮޅަށް ކުޅުނު މެޗުން އާސެނަލް މޮޅުނުވުމުން، ބޮޑު ހައިރާން ކަމެއްގައި ހުރި ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.

އާސެނަލްގެ އަމިއްލަ ދަނޑުގައި ޔުނައިޓެޑާ ދެކޮޅަށް ކުޅުނު މެޗުން ބަލިވެ، އެ ޓީމު ވަނީ މުބާރާތުން ކަޓައިފަ އެވެ. ޕެނަލްޓީ ޖަހައިގެން އެ މެޗުން އާސެނަލް ބަލިވީއިރު، މެޗުން މޮޅުވާނެ ފުރުސަތު ވެސް އާސެނަލަށް ވަނީ ލިބިފަ އެވެ.

މެޗަށްފަހު ވާހަކަ ދައްކަމުން އާޓެޓާ ބުނީ މެޗުގައި އާސެނަލްގެ ކުޅުންތެރިން ދެއްކި ކުޅުމާއި، އާސެނަލް އިން މެޗު ޑޮމިނޭޓު ކުރި ވަރަށް ބަލާއިރު، މެޗުން މޮޅު ނުވުމަކީ ހައިރާންވާ ކަމެއް ކަމަށެވެ. މެޗުގައި އިދިކޮޅު ޓީމަށް ވުރެ ވެސް އާސެނަލް ރަނގަޅަށް ކުޅުނު ކަމަށާއި، މެޗުން މޮޅުވުމަށް އާސެނަލް އަށް ކުރެވެން އޮތް ހުރިހާ މަސައްކަތެއް ކުރި ކަމަށް ވެސް އާޓެޓާ ބުންޏެވެ.

މީގެ އިތުރުން އާޓެޓާ ބުނީ، މެޗުގައި އާސެނަލަށް ލިބުނީ އެ ޓީމަށް ހައްގުވި މިންވަރެއް ނޫން ކަމަށެވެ. އާޓެޓާ ބުނީ ދެން އާސެނަލަށް ޖެހޭނީ އެކަމުން އަރައި ގަނެ ކުރިއަށް ހުރި މެޗުތަކަށް އިސްކަން ދޭން ކަމަށާއި، ޓީމު ގޮވައިގެން ކުރިއަށް ދާން އޭނާ ހުރީ ތައްޔާރަށް ކަމަށެވެ. އެކަން ފާހަގަކޮށް އާޓެޓާ ބުނީ ކުޅުންތެރިންނާ މެދު އެއްވެސް ކަހަލަ ހިތްބުރަ ކަމެއް އޭނާގެ ނެތް ކަމަށާއި، ކުޅުންތެރިން އެމީހުންގެ އެންމެ ރަނގަޅަށް މަސައްކަތް ކުރިކަން ޤަބޫލު ކުރާ ކަމަށެވެ.

ދެން އާސެނަލަށް އޮންނާނީ އިނގިރޭސި ޕްރިމިއާ ލީގުގައި މި މަހުގެ 16 ވަނަ ދުވަހު އަމިއްލަ ދަނޑުގައި ޓޮޓެންހަމާ ދެކޮޅަށް ކުޅޭ މެޗެވެ.