މިހާތަނަށް ހައްޖު ކިއުގައި 65 އަހަރުން މަތީގެ 1473 މީހުން އެބަ ތިބި

މިހާތަނަށް ހައްޖު ކިއުގައި 65 އަހަރުން މަތީގެ 1473 މީހުން އެބަ ތިބި ކަމަށް ހައްޖު ކޯޕަރޭޝަންގެ މެނޭޖިން ޑިރެކްޓަރު މުޙައްމަދު ޝަކީލް ވިދާޅުވެއްޖެއެވެ.

ދައުލަތުގެ މީޑިއާއިން ގެނެސްދިން "ރާއްޖެ މިއަދު" ޕްރޮގްރާމުގައި ވާހަކަދައްކަވަމުން ޝަކީލް ވިދާޅުވީ، މި ފަހުން ރައީސް ޑރ. މުޙައްމަދު މުއިއްޒު ނިންމެވި ނިންމެވުމަކީ 65 އަހަރުން މަތީގެ މީހުންނަށް ލިބުނު ވަރަށް އުފާވެރި ޚަބަރެއް ކަމަށެވެ.

ފަރުޟު ޙައްޖުނުވާ މީހުންނަށް އިސްކަން ދޭ ގޮތަށް އުސޫލަށް ބަދަލުގެންނަން ރައީސް ވަނީ ނިންމަވާފައެވެ.

އުސޫލަށް ގެނައި މައިގަނޑު ބަދަލުތަކުގެ ތެރޭގައި އަލަށް ޙައްޖުގެ އަޅުކަން އަދާކުރަން އެދޭ ފަރާތްތަކަށް އިސްކަންދިނުމާއި ޙައްޖުގެ އަޅުކަން އަދާކޮށްފައިނުވާ މީހުންގެ ތެރެއިން ޢުމުރުން 65 އަހަރުން ފެށިގެން މަތީގެ މީހުންނަށް ކޮންމެ އަހަރަކު ޙައްޖު ކޯޕަރޭޝަނުން ކަނޑައަޅާ ވަކި އިންސައްތައެއް ޚާއްޞަކުރުމާއި ފަރުޟު ޙައްޖުވެފައިވާ މީހުންނަށް ދެން ފުރުސަތު ލިބޭނީ އެންމެ ފަހުން ޙައްޖު ވިތާ ހިޖުރީ ސަނަތުން ފަސް އަހަރުވުމުން ކަމަށް ނިންމުމެވެ.

އެ އުސޫލުތަކަށް އަލިއަޅުވާލައްވައި ޝަކީލް ވިދާޅުވީ، އެ ނިންމެވުންތައް ނިންމަވާފައިވަނީ ރައްޔިތުންގެ ހައްގުގައި ކަމަށާއި ދޮށީ އުމުރުގެ މީހުންނަށް ވީހާ ވެސް އަވަހަށް ހައްޖުވުމުގެ ފުރުސަތު ފަހިކޮށްދެއްވުމަށް ކަމަށް ގަބޫލު ކުރެވޭ ކަމަށެވެ.

މީގެއިތުރުން، އެ ކޯޕަރޭޝަނާ ހަވާލުވިއިރު، އުސޫލުގައި އޮންނަނީ އަލަށް ހައްޖަށް ދާ ފަރާތްތަކަށް ކިއު ތަރުތީބުން ކޯޓާގެ ކަނޑައެޅެނީ 75 އިންސައްތަ ކަމަށާއި ބާކީ 25 އިންސައްތަ އޮންނަނީ ކުރިން ހައްޖުގެ އަޅުކަން އަދާކޮށްފައިވާ މީހުންނަށް ޚާއްސަކޮށް ކަމަށް ޝަކީލް ވިދާޅުވިއެވެ.

ނަމަވެސް، ރައީސްގެ އިރުޝާދާ އެއްކޮށް، އަލަށް ހައްޖަށް ދާ މީހުންގެ އިންސައްތަ 90 އަށް މަތިކޮށް، ކުރިން ފަރުޟު ހައްޖު ވެފައިވާ މީހުންނަށް ލިބެނީ 10 އިންސައްތަ ކަމަށް ޝަކީލް ވިދާޅުވެފައެވެ.

މި ބަދަލަކީ އުސޫލުތަކުގެ ތެރެއިން ވީހާ ވެސް ހައްޖުގެ ކަންކަން ހަރުދަނާ ކުރުމަށް ރައީސްގެ އިރުޝާދާ އެކު އެ ކުންފުނިން ނިންމި ކަމެއްކަން އޭނާ ފާހަގަކުރެއްވިއެވެ.