މާލޭގެ ގެއެއްގައި ރެނދު އަޅާ، އަޑިއަށް ގަނބަމުން ދާތީ އެ ގޭގެ މީހުން އެހެންތަނަކަށް ބަދަލުކޮށްފި

މާލޭގެ ގެއެއްގައި ރެނދު އަޅާ، އަޑިއަށް ގަނބަމުން ދާތީ އެ ގޭގައި ދިރިއުޅޭ މީހުން އެހެން ތަނަކަށް ބަދަލުކޮށްފިއެވެ.

މާލޭ ސިޓީ ކައުންސިލުން ބުނީ މ. ކެރިންލައިޓް އިމާރާތްކުރަމުން ދަނިކޮށް، އެ ގެއާ ޖެހިގެން ހުރި މ. ލަކީ ހެވެންގެ ބައެއް ގަނބައިގަނެ އަޑިއަށް ދާތީ އެ ގެއިން މީހުން ހުސްކުރުމުގެ މަސައްކަތް މިހާރު ކުރަމުން އަންނަ ކަމަށެވެ.

މި ހާދިސާގައި އެއްވެސް މީހަކަށް އަނިޔާއެއް ނުވެއެވެ.

ސިޓީ ކައުންސިލުން ބުނީ އެ ހާދިސާ ހިނގީ ޝީޓް ޕައިލް ނުކޮށް އިމާރާތްކުރުމުގެ މަސައްކަތް ކުރުމުގެ ސަބަބުން ކަމަށެވެ. އެހެންވެ ލަކީ ހެވަންގޭގެ ފާރުތަކުގައި ރެނދުލައި އަޑިއަށް ދާތީ އެކަން ސިޓީ ކައުންސިލްގެ ސަމާލުކަމަށް ގެނައީ އެގޭގައި ދިރިއުޅޭ މީހުން ކަމަށެވެ.

ލަކީ ހެވަންގޭގެ ހަތަރު ކޮޓަރިއެއްގައި ދިރިއުޅޭ ހަތަރު އާއިލާ އެތަނުން ބަދަލުކުރުމުގެ މަސައްކަތް ސިޓީ ކައުންސިލުން އަންނަނީ ކުރަމުންނެވެ. އެގޭގައި ބިދޭސީން ވެސް ކުއްޔަށް އުޅެ އެވެ.

އެގޭގައި ދިރިއުޅޭ ބައެއް މީހުން ބުނީ އެ ހާދިސާ ހިނގާކަން ފާހަގަވެ ދުރާލައި އިމާރާތްކުރާ މީހުންގެ ސަމާލުކަމަށް ގެނައުމުން އެއްވެސް ފިޔަވަޅެއް އަޅާފައި ނުވާ ކަމަށެވެ. އަދި މިއީ އެކަމުގެ ނަތީޖާ ކަމަށް އެ މީހުން ބުންޏެވެ.

ސިޓީ ކައުންސިލުން ބުނީ އެ ގޭގައި 4 ކޮޓަރިން 4 އާއިލާ އާއި 18 އަހަރުން ދަށުގެ 3 ކުދިންނާ 6 މީހުން ތިބި ކަމަށާއި އަދި އެ ގޭގެ ދެ ބައެއްގައި ބޭރު މީހުންތަކެއް ކުއްޔަށް އުޅޭ ކަމަށެވެ.

މާލޭ ސިޓީ ކައުންސިލުން ބުނީ، މިހާރު އެގެ ހުސްކޮށް، ގޭގައި ދިރިއުޅޭ މީހުންނަށް ވަގުތީ ބޯހިޔާވަހިކަން ފޯރުކޮށްދޭން ފަށާފައި ވާކަމަށެވެ.

އެ ގޭގައި ތިބި މީހުންނަށް ވަގުތީ ބޯހިޔާވަހިކަން ހަމަޖައްސާދީފައި ވަނީ މާލޭ ސިޓީ ކައުންސިލުންނެވެ.