"އަވަސް އެޕް" ލޯންޗްކުރުން ހުކުރު ދުވަހުގެ ރޭ - "ހަވާ އެރުވުން އޮންނާނެ، ޕީއެސް ފައިވް އެއް ހޯދުމުގެ ފުރުސަތު އެބައޮތް"
އަވަސް ރައިޑްގެ ހިދުމަތް ފެށީ 2019 ގައި މާލެ ސިޓީގައި، އޭގެ ފަހުން އެ ހިދުމަތް ފުޅާކޮށް ރާއްޖޭގެ އެކި ކަންކޮޅުގައި މިހާރު އެ ޚިދުމަތް ދަނީ ދެމުން
އަވަސްގެ ފަރާތުން ބޭއްވި ކުޑަކުދިންގެ ހަވީރު
ރާއްޖޭގެ އެންމެ ކާމިޔާބުކަމާއި އެކު ޓެކްސީގެ ޚިދުމަތް ދެމުން އަންނަ އަވަސްގެ ފަރާތުން، "އަވަސް އެޕް" ލޯންޗްކުރުން ކުލަ ގަދަ ހަރަކާތްތަކާއި، ހަވާ އެރުވުމާއި އެކު ކުރިއަށް ގެންދަން ހަމަޖެހިފައިވާ ކަމަށް އަވަސްގެ ފަރާތުން ބުނެފިއެވެ.
ހުކުރު ދުވަހު ހަވީރު އަވަސްގެ ފަރާތުން ވަނީ ޚާއްސަ ހަވީރެއް ބާއްވާފައެވެ. ކުޑަކުދިންނަށް ކަމުދާ ގިނަ ހަރަކާތްތަކާއި އެކު ކުރިއަށް ގެންދިޔަ މި ހަރަކާތުގައި ރޮބޯމެންގެ ނެށުމާއި، ހަރަކާތްތައް ވަނީ ދައްކާލާފައެވެ.
އަވަސްގެ ފަރާތުން ރާއްޖެއެމްވީ އަށް މައުލޫމާތުދެއްވަމުން، އަވަސް ރައިޑްގެ ސީއޯއޯގެ މާތިއު ނަޖީބު ވިދާޅުވީ ހުކުރު ދުވަހު އަވަސް ރައިޑުން "އަވަސް އެޕް" ގެ ނަމުގައި މުޅިން އާ އެޕްލިކޭޝަނެއް ތައާރަފްކުރުމަށް ހަމަޖެހިފައިވާ ކަމަށެވެ. އެ ހަރަކާތުގެ ތެރެއިން ހުކުރު ދުވަހު ހަވީރު ބޭއްވި ކުޑަކުދިންގެ ހަވީރަށް ވަރަށް ހޫނު ތަރުހީބެއް ލިބިފައިވާ ކަމަށް އޭނާ ވަނީ ބުނެފައެވެ.
އޭނާ އިތުރަށް ބުނީ އަވަސް އެޕް ލޯންޗުކުރުމުގެ ހަރަކާތުގެ ތެރެއިން ހުކުރު ދުވަހުގެ ރޭ ހަވާ އެރުވުމަށް ވެސް ވަނީ ހަމަޖެހިފައި ކަމަށެވެ. އަދި އަވަސް ރައިޑްގެ ފަރާތުން ކުރުމަށް ހަމަޖެހިފައިވާ އިތުރު ބައެއް ޚާއްސަ ކަންކަން ހުކުރު ދުވަހުގެ ރޭ އިއުލާންކުރުމަށް ހަމަޖެހިފައިވާ ކަމަށް އޭނާ ވަނީ ވިދާޅުވެފައެވެ. އެ ހަރަކާތުގެ ތެރެއިން އިނާމްވެސް ދިނުމަށް ހަމަޖެހިފައިވާ ކަމަށާއި އާއްމުންނަށް ޝައުގުވެރިކަންތައްތަކެއް އެ ހަރަކާތުގެ ތެރޭގައި ހިމެނޭނެ ކަމަށް އޭނާ ވިދާޅުވިއެވެ. އަދި ހަމައެހެންމެ އަވަސް އެޕް ޑައުންލޯޑްކުރުމަށް ފަހު އެ ހަރަކާތް ކުރިއަށްދާ ސަރަހައްދުގައި ހުރި ކިއުއާރް ކޯޑް ސްލޭންކޮށްލައިގެން ޕީއެސްފައިވް އެއް ހޯދުމުގެ ފުރުސަތު އަވަސްގެ ފަރާތުން ވަނީ ހުޅުވާލާފައެވެ.
އަވަސް އެޕް ހުކުރު ދުވަހު ރަސްމީކޮށް ލޯންޗު ކުރުމުގެ ހަރަކާތް ކުރިއަށް ދާނީ ރޭގަނޑު 8:00ން ފެށިގެން ހުޅުމާލެ ސެންޓްރަލް ޕާކުގައެވެ. މި ހަރަކާތްތައް އިންތިޒާމްކުރި ތިންކްގެ އެޖެންސީ ޑައިރެކްޓަރ އިސްމާއިލް މާއިޒް މުހައްމަދު ވެސް ވަނީ މި ހަރަކާތުގެ ޚާއްސަކަމަށް އަލިއަޅުވާލައްވާފައެވެ. އަވަސް ރައިޑް އާއި ތިންކް އާއި ގުޅިގެން ބޭއްވި ކުޑަކުދިންގެ ހަވީރަށް އާއްމުންގެ ވަރަށް ބޮޑު ތަރުހީބެއް ލިބުނުކަން އޭނާ ވަނީ ހާމަކޮށްފައެވެ. އަދި ކާބޯތަކެތީގެ ޚިދުމަތް ފޯރުކޮށްދިނުމާއި ކުޑަކުދިންގެ ޚާއްސަ ގޭމްތަކުގެ އިތުރުން ކުޑަކުދިންނަށް ޚާއްސަ ފޮތް ކިޔާދިނުމުގެ ހަރަކާތްތައް ފެނިގެން ދިޔަ ކަމަށް އޭނާ ވަނީ ބުނެފައެވެ.
އަވަސް ރައިޑްގެ ހިދުމަތް ފެށީ 2019 ގައި މާލެ ސިޓީގައެވެ. އޭގެ ފަހުން އެ ހިދުމަތް ފުޅާކޮށް ރާއްޖޭގެ އެކި ކަންކޮޅުގައި މިހާރު އެ ޚިދުމަތް ދަނީ ދެމުންނެވެ.
