މައްކާގައި ތާށިވި އުމްރާވެރިން ހޮނިހިރު ދުވަހު މާލެ ގެންނަނީ
އުމްރާއަށް ދިޔަ މީހުންގެ ތެރެއިން ހާލުގައި ޖެހިފައި ތިބީ 23 އުމްރާވެރިން އަދި އޭގެ ތެރޭގައި، 12 އަހަރުން ދަށުގެ ތިން ކުޑަކުދިން ހިމެނޭ
ހޫނުމިން 49 ޑިގުރީ ސެލްސިއަސް އަށް މައްޗަށް ގޮސްފައި ވަނިކޮށް މައްކާ އަށް ވާރޭ ވެހި މާހައުލަށް ފިނިކަން (ފައިލް)
އަލްހިޖުރަ ޓްރެވަލް އެންޑް ޓުއާސްގެ ހަވާލުގައި މިދިޔަ ޑިސެމްބަރު މަހު އުމްރާއަށް ގެންގޮސް، ހާލުގައި ޖެއްސި އުމްރާވެރިން ހޮނިހިރު ދުވަހު މާލެ އަންނާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
އުމްރާއަށް ދިޔަ މީހުންގެ ތެރެއިން ހާލުގައި ޖެހިފައި ތިބީ 23 އުމްރާވެރިންނެވެ. އޭގެ ތެރޭގައި، 12 އަހަރުން ދަށުގެ ތިން ކުޑަކުދިން ތިއްބެވެ.
އުމްރާވެރިން ހާލުގައި ޖެހެން މެދުވެރިވީ، އުމްރާވެރިން ދަތުރަށް ފައިސާ ދައްކާފައިވީ ނަމަވެސް އެ ފައިސާއިން އުމްރާވެރިންގެ ދެކޮޅު ޓިކެޓު ހަމަނުޖައްސާ އެ ފައިސާ ކުންފުނީގެ އެހެން ކަންކަމަށް ބޭނުންކޮށްފައިވާތީ ކަމަށް އެ ކުންފުނިން ވަނީ އިއުތިރާފުވެފައެވެ.
އެކަމާ ގުޅުވައި އިސްލާމިކް މިނިސްޓަރު ވިދާޅުވީ، ހާލުގައި ޖެހުނު މީހުން، އެ މިނިސްޓްރީގެ އިރުޝާދުގެ ދަށުން ހައްޖު ކޯޕަރޭޝަންގެ އުމްރާވެރިން ތިބި ހޮޓަލަށް ބަދަލުކޮށްފައިވާ ކަމަށެވެ.
އެ އުމްރާވެރިން އަންނަ ހޮނިހިރު ދުވަހު ހެނދުނު ގަތަރު އެއާވޭސް އިން މާލެއަށް އަންނާނެ ކަމަށް މިނިސްޓަރު ޝަހީމް ވިދާޅުވިއިރު، މި މައްސަލައާ ގުޅިގެން އެކުންފުނި ވަނީ 100,000 ރުފިޔާއިން ޖޫރިމަނާކޮށްފައެވެ. މީގެ އިތުރުން، އެ ކުންފުނީގެ މައްޗަށް ވަނީ ފިޔަޅުތަކެއްވެސް އަޅާފައެވެ.
އަލް ހިޖްރަ ޢުމްރާ ގްރޫޕުގެ ހަވާލުގައި އުމްރާއަށް ދިޔަ 23 މީހުންގެ އެ ގްރޫޕު މައްކާއަށް ގެންދިޔައީ ވެސް ތިންބައި ކޮށް، ތިން ފްލައިޓެއްގައި ކަމަށާއި، ހުރުމުގެ އިންތިޒާމުތަކެއް ވެސް ހަމަޖެހިފައި ނެތް ކަމަށް ވަނީ މައުލޫމާތު ލިބިފައެވެ. އެގޮތުން ދަތުރުގެ ތެރެއިން އެއް ރެއަކު، ހޮޓަލުން ވެސް ނިކުންނަށް ޖެހުނު ކަމަށް ވަނީ ބުނެފައެވެ.
