ގާނޫނުއަސާސީގެ ދިފާއުގައި އެމްޑީޕީން މަގުމައްޗަށް ނުކުންނީ
31 ޖެނުއަރީގައި "ގާނޫނުއަސާސީގެ ދިފާއުގައި" މަގުމައްޗަށް ނުކުތުމަށް ވަނީ ފާސްކޮށްފައި
ޤާނޫނުއަސާސީގެ ދިފާޢުގައި ރައްޔިތުންގެ ނަމުގައި އެމްޑީޕީން ބޭއްވި ޖަލްސާގެ ތެރެއިން
ގާނޫނު އަސާސީގެ ދިފާއުގައި އެމްޑީޕީން މަގުމައްޗަށް ނުކުންނަން އެ ޕާޓީގެ ގައުމީ މަޖިލީހުން ފާސްކޮށްފިއެވެ.
އިދިކޮޅު މައި ސިޔާސީ ޕާޓީ، އެމްޑީޕީން މަގުމައްޗަށް ނުކުންނަން ފާސްކުރީ އެ ޕާޓީން ބުދަ ދުވަހުގެރޭ ބޭއްވި ގައުމީ މަޖިލީހަށް ހުށަހަޅައި ފާސްކޮށްގެންނެވެ. މި ބައްދަލުވުމުގައި ރިޔާސަތުން ހުށަހެޅީ 31 ޖެނުއަރީގައި "ގާނޫނުއަސާސީގެ ދިފާއުގައި" މަގުމައްޗަށް ނުކުތުމަށެވެ.
ރިޔާސަތުން ހުށަހެޅި ހުށަހެޅުމަށް ގައުމީ މަޖިލީހުގެ އެއްވެސް މެންބަރަކު އިއުތިރާޒުކޮށްފައި ނުވެއެވެ. މިއީ އެމްޑީޕީން ބޮޑު ހަރަކާތެއް ބޭއްވުމަށް ދުރާލާ ރާވައިގެން ރައީސް ޑރ. މުހައްމަދު މުއިއްޒުގެ ސަރުކާރު ޖަވާބުދާރީކުރުމަށް މަގުމައްޗަށް ނުކުތުމަށް ފާސްކުރި ފުރަތަމަ ފަހަރެވެ.
އެމްޑީޕީން ވަނީ ސަރުކާރު ޖަވާބުދާރީކުރުމަށްޓަކައި "ގާނޫނުއަސާސީގެ ދިފާއުގައި" ނަމުގައި މިދިޔަ ޑިސެމްބަރު މަހުގައި ވެސް ބޮޑު ޖަލްސާއެއް ބާއްވާފައެވެ. ކާނިވަލުގައި ބޭއްވި މި ޖަލްސާއަކީ އެމްޑީޕީން އިދިކޮޅުގައި ތިބެގެން ސަރުކާރު ޖަވާބުދާރީކުރުމުގެ މަސައްކަތް ފެށިފަހުން އެމްޑީޕީން ބޭއްވި އެންމެ ބޮޑު ޖަލްސާއެވެ.
މި ޖަލްސާގައި ވަނީ ޤާނޫނުއަސާސީ އަށް ގެނެސްފައިވާ ބަދަލު ބާތިލް ކުރުމަށާއި، ރައްޔިތުންގެ ބާރުވެރިކަން ހިނގައިދާނެ ހަމަ އެއްވެސް ކަމެއް ނުކުރުމަށް މަޖިލީހަށާއި، ރައީސް މުއިއްޒަށް އަންގާ އަމުރުކޮށް ޕެޓިޝަނެއް ހުށަހަޅައި ގައުމީ މަޖިލީހުގެ ބައްދަލުވުމެއް ބާއްވާ އެ ޖަލްސާގައި ވަނީ ފާސްކޮށްފައެވެ.
