ބޮޑު ހިލަ ނުލިބިގެން ތަރައްގީގެ މަޝްރޫއުތަކެއް ހުއްޓުނުކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.
ހުވަދު އަތޮޅުގެ ރަށްތަކަށް މިހާރު ކުރައްވަމުންދާ ދަތުރުފުޅުގެ ތެރެއިން ގދ.ރަތަފަންދޫ ރައްޔިތުންނާ ބައްދަލުކުރައްވައި މިއަދު ދެއްކެވި ވާހަކަފުޅުގައި ރައީސް ވިދާޅުވީ އެ ރަށުގެ ގިރާ ސަރަހައްދު ހިމާޔަތްކުރުމުގެ މަޝްރޫއު މަޑުޖެހިފައި އޮތީ މަސައްކަތަށް ބޭނުންވާ ތަކެތި ނުލިބުމާއި ފައިސާގެ ދަތިކަމާހުރެ ކަމަށެވެ.
ރައީސް ވިދާޅުވީ ގިރާ ސަރަހައްދު ހިމާޔަތްކުރުމަށް އެތައް ރަށެއްގައި ފެށި މަޝްރޫއުތައް މަޑުޖެހިފައިވާ މައިގަނޑު ސަބަބަކީ ތަކެތި ހަމަނުވުން ކަމަށާއި އެގޮތުން އެންމެ ބޮޑު މައްސަލައެއްގެ ގޮތުގައި އޮތީ ބޮޑުހިލަ ނުލިބުމުގެ މައްސަލަކަމަށެވެ. އަދި އެކަން އެގޮތަށް ވިޔަ ނުދިނުމަށް، މިހާރު ގަނޑުކޮށް ބޮޑު ހިލަ ގަންނަން ނިންމާފައިވާ ކަމަށް ވެސް ރައީސް ވިދާޅުވިއެވެ.
އަޅުގަނޑުމެން މި ބަލަނީ މިގޮތަށް ހުއްޓިފައި ހުރި ހުރިހާ ރަށަކަށް ބޭނުންވާ ތަކެތި ހަމަކުރަން. ބޮޑު ހިލަ އެންމެ ބޮޑަށް، އެންމެ ގިނަ ރަށްތަކުގައި މަސައްކަތް ހުއްޓިފައި އޮތް ސަބަބަކީ ބޮޑު ހިލަ ނުލިބުން. މިދިޔަ ހަފްތާ ތެރޭގައި އަޅުގަނޑު ހަމަ މިކަމާ ބެހޭ ހުރިހާ ކުންފުނިތަކުގެ ވެރިންނާއި ފިނޭންސް މިނިސްޓަރާއި އަދި ކޮންސްޓްރަކްޝަން މިނިސްޓަރާއި އެކީގައި ބައްދަލުވުމެއް ބާއްވާފައި. ގޮތްތަކެއް ރާވަފައިފިން. ހުރިހާ ރަށަކަށް ބޭނުންވާ ބޮޑު ހިލަ ބަލްކުކޮށް ރާއްޖެ ގެންނަން.އެމަނިކުފާނު ވިދާޅުވި
ރައީސް މުއިއްޒު ވިދާޅުވީ ބޮޑު ހިލައިގެ އިތުރުން ރަށް ގިރުމުގެ މައްސަލަ ހައްލު ކުރަން ބޭނުންވާ ތަކެތި ވެސް ނުލިބި އެބަހުރި ކަމަށާއި ނުލިބިގެން އުޅޭ ހިލައަކީ ބަނދަރުތަކާއި ރަށް ގިރުމުގެ މައްސަލައިގެ އިތުރުން ބިން ހިއްކުމާއި ތޮށިލުމަށް ބޭނުންވާ ހިލަ ކަމަށެވެ.
ރައީސް ވަނީ ރަތަފަންދޫ ގައި ހިންގެވުމަށް ނިންމަވާފައިވާ ބައެއް މަޝްރޫއުތައް އިއުލާނުކުރައްވާފަ އެވެ. އެގޮތުން އެ ރަށުގައި ހިންގަން ނިންމަވާފައިވާ ކަންކަމުގެ ތެރޭގައި ބަނދަރު ހެދުމުގެ މަޝްރޫއާއި ސުކޫލުގައި މަލްޓި ޕާރޕަސް ހޯލު އެޅުމާއި އޭޓީއެމް މެޝިން ބެހެއްޓުމުގެ އިތުރުން ކުނި މެނޭޖުކުރާނެ ނިޒާމު ގާއިމުކުރުން ހިމެނެއެވެ.
ތިން ދުވަހުގެ މުއްދަތަށް ކުރައްވާ މި ދަތުރުފުޅުގައި ހުވަދުއަތޮޅު ދެކުނުބުރީގެ ފަސް ރަށަކަށާއި، ހުވަދުއަތޮޅު އުތުރުބުރީގެ ހަތަރު ރަށަކަށް ރައީސް ވަޑައިގެންނެވުމަށް ވަނީ ހަމަޖެހިފަ އެވެ. އެގޮތުން، ހުވަދުއަތޮޅު ދެކުނުބުރިން އެމަނިކުފާނު އިއްޔެ ވަނީ ހޯނޑެއްދޫ، ނަޑެއްލާ، ވާދޫ، ފިޔޯރީއަށް ވަޑައިގެންފަ އެވެ. ހުވަދުއަތޮޅު އުތުރުބުރީން އެ މަނިކުފާނުގެ މި ދަތުރުފުޅުގައި ވަޑައިގެންނެވުމަށް ހަމަޖެހިފައި ވަނީ ކަނޑުހުޅުދޫ، ނިލަންދޫ، މާމެންދޫ އަދި ދެއްވަދޫއަށެވެ.
މި ދަތުރުފުޅުގައި އެ މަނިކުފާނުގެ އަރިހުގައި ވަޒީރުންނާއި ސަރުކާރުގެ ބައެއް އިސްވެރިން ބައިވެރިވެވަޑައިގަންނަވައެވެ. ރައީސް ހުވަދުއަތޮޅުގެ ބައެއް ރަށްރަށަށް ކުރައްވާ މި ދަތުރުފުޅު ނިންމަވާލައްވައި، މާލެ ވަޑައިގެންނެވުމަށް ހަމަޖެހިފައިވަނީ ބުރާސްފަތި ދުވަހުގަ އެވެ.
