ފިޔޯރީގައި މަސްކިރާ ކާރުހާނާއެއް ޤާއިމްކުރަނީ
ފިޔޯރީގައި ޤާއިމްކުރާ މަސްކިރާ ކާރުހާނާގެ އެއްބަސްވުމުގައި އަންނަމަހު ސޮއިކޮށް، 2 މަހެއްހާދުވަހުގެ ތެރޭގައި އަމަލީ މަސައްކަތް ފެށޭނެކަމަށް ރައީސް ވިދާޅުވި
ރައީސް ފިޔޯރީގައި. ފޮޓޯ: ރައީސް އޮފީސް
ފިޔޯރީގައި ޤާއިމްކުރާ މަސްކިރާ ކާރުހާނާގެ އެއްބަސްވުމުގައި އަންނަމަހު ސޮއިކޮށް، 2 މަހެއްހާދުވަހުގެ ތެރޭގައި އަމަލީ މަސައްކަތް ފެށޭނެކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ފިޔޯރީގައި މަސްކިރާ ކާރުހާނާއެއް ޤާއިމްކުރެއްވުމަކީ ރައީސް ޑރ. މުއިއްޒުގެ ރިޔާސީ ވަޢުދެކެވެ.
ހުވަދު އަތޮޅުގެ ބައެއް ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ގދ.ފިޔޯރީއަށް ވަޑައިގެން އެ ރަށު ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައި ރައީސް ޑރ. މުއިއްޒު ވަނީ އެ ރަށުގެ ތަރައްޤީއަށް ކުރައްވަން ނިންމަވާފައިވާ ކަންކަތައްތަކަށް އަލިއަޅުއްވާލައްވާފައެވެ.
ރައީސް ވިދާޅުވީ ފިޔޯރީ ސްކޫލަށް ބޭނުންވާ ކަންކަން ކޮށްދެއްވުމުގެ އިތުރުން އޭޓީއެމްގެ ޚިދުމަތް ވެސް ތައާރަފްކޮށްދެއްވާނޭ ކަމަށެވެ. އަދި އެ ރަށުގެ ކުނި މެނޭޖްކުރެވޭނެ އިންތިޒާމްތައްވެސް ހަމަޖައްސައިދެއްވާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ފިޔޯރީ އަކީ މަސްވެރިކަމަށް އެ ސަރަހައްދަށްވެސް އެންމެ މުހިންމު ސިނާއަތްކަމަށާއި އަދި ރިޔާސީ އިންތިޚާބުގައި ކެމްޕެއިންގައި ވައުދުވެވަޑައިގެންނެވި ގޮތަށް ފިޔޯރީގައި މަސްކިރާ ކާރުހާނާގެ މަސައްކަތް ކުރިއަށް ގެންދަވާނެކަމަށެވެ.
ރައީސް ވިދާޅުވީ ފިޔޯރީގައި ގާއިމްކުރައްވާ މަސްކިރާ ކާރުހާނާގައިި 100 ޓަނުގެ ދަޅުމަސް ބަންދުކުރުމުގެ ކެޕޭސިޓީއާއި 3000 ޓަނުގެ މަސް ފިނިކުރާ ކޯލްޑް ސްޓޯރޭޖް ހުންނާނެކަމަށެވެ. އަދި 100 ޓަނުގެ ފިޝް މީލް އަދި 50 ޓަނުގެ އައިސް ޕްލާންޓެއްވެސް ކާރުހާނާގައި ހުންނާނެކަމަށް ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ ޗައިނާގެ ކުންފުންޏަކާއި ގުޅިގެން މަސައްކަތް ފެށުމަށް ތައްޔާރުވަމުންދާކަމަށެވެ. އެގޮތުން އެންމެ ލަސްވެގެން އަންނަ ފެބްރުއަރީމަހު އެއްބަސްވުމުގައި ސޮއިކުރެވޭނެކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ މަސްވެރިކަމުގެ ސިނާއަތަކީ އެމަނިކުފާނު އެންމެ އިސްކަމެއް ދެއްވާ އެއް ސިނާޢަތްކަމަށާއި، އެއީ ދިވެހި އެތައް ޢާއިލާއަކާއި ގުޅިފައިވާ ސިނާއަތެއްކަމަށެވެ. ނަމަވެސް މަސްވެރިކަމުގެ ސިނާއަތް ކުރިއަރުވަން އެކި ސަރުކާރުތަކުން އެތައް ވަޢުދެއްވި ނަމަވެސް، އެކަންކަން ފުރިހަމަނުވެ އޮތްކަން ރައީސް ފާހަގަކުރެއްވިއެވެ.
ރައީސް ވިދާޅުވީ އެމަނިކުފާނު ވެރިކަމާއި ހަވާލުވެވަޑައިގަތުމަށްފަހު މަސްވެރިިކަމުގެ ސިނާޢަތް ކުރިއަރުވަން ވެވަޑައިގެންނެވި ވަޢުދުތައް ފުއްދެވުމުގެ މަސައްކަތް ކުރައްވަމުން ގެންދަވާކަމަށެވެ. އެގޮތުން މަސްވެރިންނަށް މިފްކޯއިން ދޭންޖެހޭ ހުރިހާ ފައިސާއެއް ދީ ޚަލާސްކުރުމަށްފަހު، ރިޔާސީ ވަޢުދާއި އެއްގޮތަށް މަސްކިރާތާ 48 ގަޑިއިރު ތެރޭގައި މިހާރު މަސްވެރިންނަށް ފައިސާ ދެމުންދާކަމަށް ރައީސް ވިދާޅުވިއެވެ.
