ދިވެހިންނަށް ވިސާ ނެތި ތުރުކީވިލާތަށް ދަތުރުކުރެވޭނެ އެއްބަސްވުމެއް ޤާއިމްކުރަނީ

ދިވެހިންނަށް ވިސާ ނެތި ތުރުކީވިލާތަށް ދަތުރުކުރެވޭނެ އެއްބަސްވުމެއް ޤާއިމްކުރަން ދެޤައުމުން ނިންމައިފިކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

މިނިސްޓަރު ޝާހިދުގެ ދައުވަތަކަށް ރަސްމީ ދަތުރުފުޅެއްގައި ރާއްޖެ ވަޑައިގެންނެވި ތުރުކީވިލާތުގެ ފޮރިން މިނިސްޓަރު މެވްލޫތް ޝަވްޝަގްލޫ އާއެކު ބޭއްވެވި ރަސްމީ މަޝްވަރާތަކަށްފަހު ދެއްވި ބަޔާނުގައި މިނިސްޓަރު ޝާހިދު ވިދާޅުވީ މިހާރުވެސް ދިވެހިންނަށް ތުރުކީވިލާތަށް ދަތުރުކުރުމަށް އީ-ވިސާ ނެގޭނެ އިންތިޒާމް ހަމަޖެހިފައިވާކަމަށާއި، އޭގެ ބަދަލުގައި ވިސާ-ފްރީ އެއްބަސްވުމެއް އެކުލަވާލުމަށް ހުށަހެޅުއްވިކަމަށެވެ. އަދި އެކަމަށް ތުރުކީވިލާތުގެ ސަރުކާރުން އެއްބަސްވެ، ވިސާ ނެތި ދިވެހިންނަށް ތުރުކީވިލާތަށް ދަތުރުކުރެވޭނެ އިންތިޒާމް ހަމަޖެހިގެންދާނެކަމަށް މިނިސްޓަރު ޝާހިދު ވިދާޅުވިއެވެ.

Advertisement

ރާއްޖެއާއި ތުރުކީއާއި ދެމެދުގައި އިތުރު 5 އެއްބަސްވުމެއްގައިވެސް ވަނީ ސޮއިކޮށްފައެވެ. އެއީ އެގްރީމަންޓް އޮން ޓްރޭޑް އެންޑް އިކޮނޮމިކް ކޯޕަރޭޝަން، އެގްރިކަލްޗަރަލް ކޯޕަރޭޝަން އެމްއޯޔޫ، ތިމާވެށްޓާއި ބެހޭ އެމްއޯޔޫ އަކާއި، ޑިޕްލޮމެޓިކް ޓްރެއިނިންގ އެންޑް އެކްސްޗޭންޖް އޮފް އިންފޮމޭޝަން އެންޑް ޑޮކިއުމެންޓޭޝަން އެއްބަސްވުމާއި، ކަލްޗަރަލް ކޯޕަރޭޝަން އެއްބަސްވުމެވެ.

މި އެއްބަސްވުމުގެ ސަބަބުން އިތުރަށް ގުޅުން ބަދަހި ވެގެންދާނެ ކަމަށް ރާއްޖޭގެ ފޮރިން މިނިސްޓަރ ޝާހިދު ވިދާޅުވިއެވެ.

މިނިސްޓަރ ވިދާޅުވީ، ތައުލީމާއި ސިއްޙީ ދާއިރާ އަދިވެސް ކައުންޓަރ ޓެރަރިޒަމްގެ ދާއިރާއިން ގުޅުން ބަދަހި ކުުރުމަށް މަޝްވަރާ ކުރެވުނު ކަމަށާއި، އެކަމުގައި ތުރުކީން ރާއްޖެއަށް އެއްބާރުލުން ދެއްވާނެ ކަމަށެވެ. ވިޔަފާރީގެ ދާއިރާއިން އިތުރަށް ގުޅުން ބަދަހި ކުރުމަށް ވެވުނު އެއްބަސްވުމުގެ ދަށުން، އިކޮނޮމިކް ކޮމިޝަނެއް އުފެދި އެ ކޮމިޝަންގެ ބެލުމުގެ ދަށުން ވިޔަފާރީގެ ދާއިރާއިން ގުޅުން ބަދަހި ކުރެވިގެންދާނެ ކަމަށް މިނިސްޓަރު ވިދާޅުވިއެވެ. ދަނޑުވެރިކަމުގެ ދާއިރާއިން ވެވުނު އެއްބަސްވުމުގެ ސަބަބުން ރާއްޖެއަށް ފައިދާ ކުރާނެ ކަން މިނިސްޓަރ ފާހަގަކުރެއްވިއެވެ.

އަދި ތުރުކީގެ ފޮރިން މިނިސްޓަރުގެ ދަތުރުފުޅުން ރާއްޖެއާއި ތުރުކީއާއި އޮތް ގުޅުން ވަރުގަދަކަން ދޭހަވެގެންދާ ކަމަށާއި، ހުޅުމާލޭގައި އިސްލާމިކް ސެންޓަރެއް އެޅުމަށް ތުރުކީގެ އެހީ ހޯދުމާއި ގުޅޭ ގޮތުން މަޝްވަރާ ކުރެވުނު ކަމަށް މިނިސްޓަރު ޝާހިދު ވިދާޅުވިއެވެ.

ފޮރިން މިނިސްޓަރު މެވްލޫތް ޝަވްޝަގްލޫ ވަނީ ޔޫއެންޖީއޭގެ ކާމީޔާބީއަށް މިނިސްޓަރު ޝާހިދަށް މަރުޚަބާ ދަންނަވާފައެވެ. އަދި ތުރުކީއިން ރާއްޖެއަށް އެހީ ބޭނުންވާ ދާއިރާތަކުން އެހީތެރިކަން ފޯރުކޮށްދެއްވާނެކަމުގެ ޔަޤީންކަން ދެއްވިއެވެ. އާދީއްތަ ދުވަހު ވެވުނު އެއްބަސްވުމުގެ އިތުރުންވެސް ގުޅުން އިތުރަށް ބަދަހި ކުރެވޭނެ ދާއިރާތައް އެބަހުރިކަމަށާއި، ކުރިއަށް އޮތްތަނުގައި އެ ދާއިރާތަކުންވެސް އެބަސްވުންތަކެއް ޤާއިމް ކުރެވޭނެ ކަމަށް ވިދާޅުވިއެވެ.

އަދި ތުރުކީގެ ކުންފުނިތަކުން ފަތުރުވެރިކަމަށް އިންވެސްޓް ކުރުމުގެ ޝައުގުވެރިކަން އެބަހުރިކަމަށާއި، ހުރި ފުރުސަތުތައް ދެނެގަތުމަށް ބިޒިނަސް ފޯރަމެއް ބޭއްވުމަށް ވެސް މިނިސްޓަރު ޝަވްޝަގްލޫ ވިދާޅުވިއެވެ.

ތުރުކީގެ ފޮރިން މިނިސްޓަރު ރާއްޖެއަށް ކުރައްވަމުންގެންދަވާ މި ދަތުރުފުޅުގައި ރައީސުލްޖުމްހޫރިއްޔާ އާއި ބައްދަލުކުރައްވައި ގުޅުން ބަދަހި ކުރެވިދާނެ ދާއިރާތަކާއި ބެހޭ ގޮތުން މަޝްވަރާ ކުރައްވާފައިވެއެވެ.