ފެނަކަ ކަސްޓަމަރުންނަށް އޮންލައިންކޮށް ބިލްދެއްކޭނެ ނިޒާމެއް ޤާއިމްކުރަނީ!
14 މެއި 2019 | އަންގާރަ 10:05ފެނަކަކޯޕަރޭޝަންގެ ކަސްޓަމަރުން މިހާރު ބިލް ދައްކަންޖެހެނީ އެ ކުންފުނީގެ އެކި ބްރާންޗްްތަކަށް
ފެނަކަ ކޯޕަރޭޝަންގެ އިސްވެރިންތަކެއް
ފެނަކަ ކަސްޓަމަރުންނަށް އޮންލައިންކޮށް ބިލްދެއްކޭނެ ނިޒާމެއް ޤާއިމްކުރުމުގެ މަސައްކަތްކުރަމުން އަންނަ ކަމަށް އެ ކުންފުނިން ބުނެފި އެވެ.
ޓްވިޓަރ މެދުވެރިކޮށް ކަސްޓަމަރަކު ކުރި ސުވާލަކަށް ޖަވާބުދެއްވަމުން ފެނަކަ ކޯޕަރޭޝަންގެ މެނޭޖިން ޑިރެކްޓަރ މުހައްމަދު ސައީދު ވިދާޅުވީ ވަރަށް އަވަހަށް ފެނަކައިގެ ކަސްޓަމަރުންނަށް އޮންލައިންކޮށް ބިިލް ދެއްކޭނެ ނިޒާމެއް ޤާއިމްވެގެންދާނެ ކަމަށެވެ. އަދި އެކަމަށް މިހާރު މަސައްކަތްކުރަމުން އަންނަކަމަށް އޭނާ ވިދާޅުވި އެވެ.
ފެނަކަ ކޯޕަރޭޝަންގެ ކަސްޓަމަރުން މިހާރު ބިލް ދައްކަންޖެހެނީ އެ ކުންފުނީގެ އެކި ބްރާންޗްްތަކަށެވެ.
ފެނަކަ ކޯޕަރޭޝަނުން އަންނަނީ އެ ކުންފުނީގެ ހިންގުން ހަރުދަނާކޮށް، ދިމާވާ މައްސަލަތައް ވެސް ހައްލުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން ނިމިދިޔަ ހަފްތާގެ ތެރޭގައިވެސް ބައެއް ރަށްރަށަށް އައު ޖަނެރޭޓަރު ފޮނުވާފަ އެވެ. އެ ކުންފިން މަސައްކަތްކުރަނީ މައްސަލަތައް ދިމާވާ ރަށްރަށުގެ މައްސަލަތައް ހައްލުކޮށް، ފުރިހަމަ ހިދުމަތެއް ދިނުމަށެވެ.
ފެނަކަ ކޯޕަރޭޝަނަކީ ކުރިން ހިންގި ޔޫޓިލިޓީސް ކުންފުނިތައް އެއްކޮށްލުމަށްފަހު، އުފެއްދި ކުންފުންޏެކެވެ. އެ ކުންފުނިން ހިދުމަތްދެނީ އަތޮޅުތެރޭގެ ރަށްރަށުގެ ފެނާއި، ކަރަންޓުގެ ހިދުމަތް ދިނުމުގަ އެވެ.
