ޕީއެސްއައިޕީއަށް ޖަހާފައި ހުރި ފައިސާ ހުރީ އެހެން ކަންކަމަށް ބޭނުންކޮށް ހުސްކޮށްލާފައި - ޝަމްހީދު
ސިއްހީ ދާއިރާއަށް ޖުމްލަ 5 ބިލިއަން އޮތް އިރު ހޭދަކޮށްފައިވަނީ އެހެން ކަންކަމަށް
ހުޅުމާލޭ ދެކުނު ދާއިރާގެ މެމްބަރު ޑރ އަޙްމަދު ޝަމްހީދު
ޕީއެސްއައިޕީ އަށް ޖަހާފައި ހުރި ފައިސާހުރީ އެހެންކަންކަމަށް ބޭނުންކޮށް ހުސްކޮށްލާފައި ކަމަށް ހުޅުމާލޭ ދެކުނު ދާއިރާގެ މެމްބަރު ޑރ އަޙްމަދު ޝަމްހީދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން ޑރ. ޝަމްހީދު ވިދާޅުވީ ރައީސުލްޖުމްހޫރިއްޔާ ބައެއް ކަންތައްތަކުގައި ތެދުބަހުން ވާހަކަދައްކަން ޖެހޭ ކަމަށެވެ. އެގޮތުން ޕީއެސްއައިޕީ ބަޖެޓުގައި ހުރި މަޝްރޫޢުތައް ކުރިއަށް ނުގެންގޮސް އޮތީ ބަޖެޓު ގައި ޖަހާފައި ހުރި އަދަދު ތަކުން ކަމަށް ބުނެވޭނެ އެއްވެސް ޖާގައެއް ނެތްކަމަށް ޝަމްހީދު ވިދާޅުވިއެވެ.
އޭނާ ވިދާޅުވީ ޕީއެސްޕީއަައި ކުރިއަށް ނުގެންދެވުނުކަމަށް ރައީސް ވިދާޅުވާއިރު، ބަޖެޓް އޮތީ އެއްކޮށް ހުސްކޮށްލާފައި ކަމަަށެވެ. އެންމެ ފުރަތަމަ ބަޖެޓުކުރި އަދަށްވުރެ ބޮޑަށް ބަޖެޓު އޮތީ ބޭނުންކޮށްފައި ކަމަށް ވެސް ޝަމްހީދު ވިދާޅުވިއެވެ.
ޝަމްހީދު ވިދާޅުވީ ބަޖެޓުން ހޭދަކުރާނެ ގޮތުގެ ޕްރޮއިިރިޓީ އެއްކޮށް ބަދަލުކޮށްފައިވާ ކަމަށާއި، ޕީއަސްސައިޕީ ބަޖެޓު މުޅިން އެހެން ކަމަކަށް ހޭދަކޮށް ނިންމާލި ކަމަށެވެ. ޝަމްހީދު ވިދާޅުވީ ފައިސާ ޗާޕުނުކޮށް ބަޖެޓު ހަމަޖައްސަވާ ވާހަކަ ރައީސް ދައްކަވާ އިރު ބަޖެޓަށް ފައިނޭންސް ކުރަން އޮންނަ އެއް ގޮތަކީ ޓެކްސް ފައިސާ އިން އެކަން ކުރުމެވެ. އަނެއް ގޮތަކީ ފައިސާ ޗާޕުކޮށްގެން އެކަން ކުރުން ކަމަށެވެ.
ޝަމްހީދު ވިދާޅުވީ ކޮންމެ ސަރުކާރެއްގެ ކެބިނެޓުގައިވެސް ކޮންމެވެސް ވަރަކަށް އިކޮނޮމީ ދަންނަ މީހުން ތިބެންޖެހޭ ކަމަށެވެ. އަދި މި ސަރުކާރުން އެ ބޭފުޅުންނަށް އެ ދެއްކޭ ވާހަކައެއް މާ ރަނގަޅަށް ފަހުމު ވާނެ ކަމަށާއި، މިދިޔަ އަހަރުގެ ބަޖެޓުގައި ޕީއެސްއައިޕީ އަށް ޖަހާފައި ހުރި މަސައްކަތް ނުކޮށް އޮތީ ބަޖެޓް ހެދިފައި އޮތްގޮތުން ނޫން ކަމަށެވެ.
ޝަމްހީދު ވިދާޅުވީ ބަޖެޓު ހޭދަކޮށްފައި އޮތް ގޮތަށް ބަލައިލުމުން ހޭދަކުރި ގޮތް އެނގޭނެ ކަމަށާއި، ސަޕްލިމެންޓްރީ ބަޖެޓާ އެއްކޮށް ހެލްތް ސެކްޓާއަށް އެކަނި ފަސްސަތޭކަ މިލިއަނާ ގާތަށް އަަދަދު އަރާފައިވާއިރު އެކަމަށް ހޭދަ ނުކުރައްވާ އެކަމަކު ޖުމްލަ އަދަދު އިނީ ހޭދަކޮށްފައި ކަމަށެވެ.
