ވާދޫ ޖަމާލުއްދީން ސްކޫލަށް ބޭނުންވާ ޢުމްރާނީ ތަރައްޤީގެ ކަންކަން މިއަހަރުގެ ވީހާވެސް ކުރީކޮޅު ފައްޓައިދޭނަން: ރައީސް
ސްކޫލަށް ބޭނުންޖެހިފައިވާ އެހެންކަންކަން ކުރުމުގައި ސަރުކާރުން ފުރިހަމަ އެއްބާރުލުން ދެއްވާނެ
ގދ. ވާދޫ ރައްޔިތުންނާއި ބައްދަލުކުރައްވާ ރައީސް ވާހަކަފުޅުދައްކަވަނީ
ވާދޫ ޖަމާލުއްދީން ސްކޫލަށް ބޭނުންވާ ޢުމްރާނީ ތަރައްޤީގެ ކަންކަން މިއަހަރުގެ ވީހާވެސް ކުރީކޮޅު، ޢަމަލީ ގޮތުން ފަށްޓަވައި ދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ހުވަދުއަތޮޅަށް ކުރައްވަމުންގެންދަވަ ދަތުރުފުޅުގެ ތެރެއިން ގދ. ވާދޫއަށް ވަޑައިގެން ރައްޔިތުންނާއި ބައްދަލުކުރައްވާ ރައީސް ވަނީ ރަށުގެ ތަޢުލީމު ކުރިއެރުވުމަށްޓަކައި، ރަށުގެ ރައްޔިތުން ކުރައްވަމުން ގެންދަވާ އުންމީދުތައް ފުރިހަމަކޮށްދެއްވާނެ ކަމުގެ ޔަޤީންކަން، އެ ރައްޔިތުންނަށް ދެއްވާފައެވެ.
ވާދޫގެ ޖަމާލުއްދީން ސްކޫލަކީ ގދ. ވާދޫއަށް ޚާއްޞަ ތަނެއް ކަމަށް ވިދާޅުވެ، ހަމަ އެފަދައިން ގދ. ވާދޫއަކީ ތަޢުލީމީ ރަށެއްގެ ގޮތުގައި ސިފަކުރައްވައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވަނީ، ފަޚުރުވެރި މާޒީއެއް އޮތް "ވާދޫ ދަންނަކަލޭފާނު"ގެ ރަށަށް، ސަރުކާރުތަކުން އަހައްމިއްޔަތުކަން ދެއްވަންޖެހޭކަން ފާހަކުރައްވާފައެވެ.
ވަކިން ޚާއްޞަކޮށް، ރަށުގެ ތަޢުލީމީ ދާއިރާ ކުރިއެރުވުމަށް އަހައްމިއްޔަތުކަން ދެއްވަންޖެހޭނެކަމަށް ދެކެވަޑައިގަންނަވާ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. އެގޮތުން، ވާދޫ ޖަމާލުއްދީން ސްކޫލަށް ބޭނުންވާ ޢުމްރާނީ ތަރައްޤީގެ ކަންކަން މިއަހަރުގެ ވީހާވެސް ކުރީކޮޅު، ޢަމަލީ ގޮތުން ފަށްޓަވައި ދެއްވާނެ ކަމުގެ ޔަޤީންކަން، ރައީސުލްޖުމްހޫރިއްޔާ ވަނީ އެ ރަށުގެ ރައްޔިތުންނަށް ދެއްވާފައެވެ.
ޢުމްރާނީ ތަރައްޤީގެ އިތުރުންވެސް، ސްކޫލަށް ބޭނުންޖެހިފައިވާ އެހެންކަންކަން ކުރުމުގައި ސަރުކާރުން ފުރިހަމަ އެއްބާރުލުން ދެއްވާނެކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
މީގެ އިތުރުން، ރައްޔިތުންނަށް އިޤްތިޞާދީ ބާރުވެރިކަން ހޯއްދަވައިދެއްވުމަށް ސަރުކާރުގެ ފުރިހަމަ އެއްބާރުލުން ލިބެމުންދާނެކަމުގެ ފުރިހަމަ ޔަޤީންކަންވެސް ރައީސުލްޖުމްހޫރިއްޔާ ވަނީ ދެއްވާފައެވެ. އަދި މުޅި ރާއްޖެއަށް ދިމާވެފައިވާ ކުނީގެ މައްސަލަ ޙައްލުކުރުމުގެ ތެރެއިން، ވާދޫގައި ހިންގަން ފަށައި، ހުއްޓިފައިވާ މަޝްރޫޢު ނިންމަވައި، ޢަމަލީ ގޮތުން އޮޕަރޭޝަންތައް ފެށޭވަރު ކޮށްދެއްވާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.
މިހިނގާ 2025 ވަނަ އަހަރާއި، 2026 ވަނަ އަހަރަކީ ރިޔާސީ ކެމްޕޭނާއި މެނިފެސްޓޯގައި ވެވަޑައިގެންފައިވާ ވަޢުދުތައް ޢަމަލީ ގޮތުން ފުއްދަވަން ފައްޓަވާ، އަދި ގިނަ މަޝްރޫޢުތަކެއްގެ ނަތީޖާ ނެރެދެއްވާނެ 2 އަހަރު ކަމުގައި ރައީސުލްޖުމްހޫރިއްޔާ ވިދާޅުވިއެވެ.
