މަޝްރޫއުތައް ހުއްޓި، އިމާރާތް ކުރުމުގެ ދާއިރާގެ އިމްޕޯޓު ދަށަށް

ކޮންސްޓްރަކްޝަން ދާއިރާގެ އިމްޕޯޓު މިދިޔަ އަހަރުގެ ތިންވަނަ ކުއަރޓަރުގައި ދަށަށް ގޮސްފައިވާކަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަ ކޮށްފިއެވެ.

އެމްއެމްއޭ އިން ނެރުނު 2024 ވަނަ އަހަރުގެ ތިންވަނަ ކުއާޓަރގެ އިގްތިޞާދީ ބުލެޓިންގައި 2023 ވަނަ އަހަރާ އަޅާބަލާއިރު އިމާރާތްކުރުމާ ގުޅުންހުރި މުދާ އިމްޕޯޓްކުރި މިންވަރު 2024 ވަނަ އަހަރުގެ ތިންވަނަ ކުއަރޓަރުގައި 4 އިންސައްތަ ދަށްވެފައިވާ ކަމަށް ވަނީ ބުނެފައެވެ.

އަނެއްކޮޅުން އެމްއެމްއޭ ގެ ރިޕޯޓުން ފާހަގަވާ ގޮތުގައި އިމާރާތް ކުރުމުގެ ދާއިރާ ހިންގުމަށް ކޮމާޝަލް ބޭންކުތަކުން ކުންފުނިތަކުން ދަރަނި ނެގުން ވަނީ މައްޗަށް ގޮސްފައެވެ. މިގޮތުން ހުސްވި އަހަރުގެ ތިން ވަނަ ކުއަރޓަރުގައި ކޮންސްޓްރަކްޝަން ދާއިރާ އަށް ދޫކުރި ލޯނު 15 އިންސައްތަ ވަނީ އިތުރުވެފައެވެ.

ކުންފުނިތަކުން ކޮށްފައިވާ މަސައްކަތްތަކަށް ސަރުކާރުން ދޭންޖެހޭ ފައިސާ ނުދިނުމުގެ ސަބަބުން ބައެއް ކުންފުނިތައް ބަނގުރޫޓުވުމާ ހަމައިގައިވާ ކަމަށް ކުރީގެ ފައިނޭންސް މިނިސްޓަރ އިބްރާހިމް އަމީރު އަންގާރަ ދުވަހު ސޯޝަލް މީޑިއާ ގައި ކުރެއްވި ޕޯސްޓެއްގައި ވަނީ ފާހަގަ ކުރައްވާފައެވެ. އޭނާ ވިދާޅުވީ ބައެއް ކުންފުނިތަކަށް އެއްގޮތަކަށް ވެސް މި ސަރުކާރުން ފައިސާ ދީފައި ނުވާ ކަމަށެވެ.

އެމްއެމްއޭގެ ރެކޯޑުތަކުން ފާހަގަވާ ގޮތުގައި އިމާރާތްކުރުމުގެ ދާއިރާއަށް ފައިނޭންސް ކުރުމަށް ލޯނަށް ވަނީ ވަރަށް ބޮޑަށް ބަރޯސާ ވެފައެވެ. ޕްރޮޕަޓީ ޑިވެލޮޕްމަންޓް މަޝްރޫޢުތަކާއި، ރިސޯޓުތައް ރިނޮވޭޓް ކުރުމާއި، ގެދޮރު އިމާރާތް ކުރުމުގެ މަޝްރޫޢުތަކަށް ލޯނު ނެގުން ވަނީ އިތުރުވެފައިވެއެވެ. ނަމަވެސް، އައު ރިސޯޓުތަކާއި ގެސްޓްހައުސްތައް އިމާރާތްކުރުމަށް ދޫކުރި ލޯނުގެ އަދަދު ވަނީ ދަށަށް ގޮސްފައެވެ.

އިމްޕޯޓް ދަށްވެފައިވާއިރު ލޯނުގެ ނެގުން އިތުރުވެފައި ވުމުން، މި ދާއިރާގެ ކުރިއެރުން ދެމެހެއްޓެނިވި ގޮތެއްގައި ހިފެހެއްޓިދާނެތޯ ތަޖުރިބާކާރުން ވަނީ ސުވާލު އުފައްދާފައެވެ. ލޯނަށް ބަރޯސާވުން އިތުރުވަމުންދާނަމަ، އިންޓްރެސްޓް ރޭޓް މަތިވެ ނުވަތަ ލޯނު ދޫކުރުމުގެ ޝަރުތުތައް ހަރުކަށިވެއްޖެނަމަ މި ދާއިރާއަށް ނޭދެވޭ އަސަރުކުރުމުގެ ފުރުސަތު އޮންނާނެ ކަމަށް ވެސް ތަޖުރިބާކާރުން ބުނެއެވެ.

ތަޖުރިބާކާރުންގެ ނަޒަރުގައި އިމާރާތް ކުރުމުގެ ދާއިރާގެ އިމްޕޯޓު އިމާރާތްކުރުމުގެ ދަށަށް ދިއުމުގެ ސަބަބުތަކުގެ ތެރޭގައި ރަށްރަށުގައި ފަށާފައި ހުރި ގިނަ މަޝްރޫއުތައް މަޑުޖެހި ނުވަތަ ހުއްޓިފައި ހުރުމާއި ބޮޑެތި އައު މަޝްރޫއުތައް ފަށާފައި ނުވުން ހިމެނެއެވެ. އެނެއްކޮޅުން ލޯނަށް ބަރޯސާވެގެން މަޝްރޫއުތައް ކުރިއަށް ގެންދަން ޖެހުމަކީ ވެސް ކޮންސްޓްރަކްޝަން ދާއިރާ އަށް ރިސްކު އިތުރުވާނެ ކަމެއް ކަމަށް ތަޖުރިބާކާރުން ބުނެއެވެ.

މާލީ ގޮތުން ބޮޑެތި ދަތިތަކެއްގައި ރާއްޖޭގެ އިމާރާތް ކުރުމުގެ ކުންފުނިތައް މަސައްކަތް ކުރަން ޖެހިފައިވާއިރު މިދިޔަ ޑިސެމްބަރު 7، ގައި ފިނޭންސް މިނިސްޓަރު މޫސާ ޒަމީރު ވިދާޅުވީ މި ސަރުކާރު ވެރިކަމާ ހަވާލުވިއިރު، 124 ބިލިއަން ރުފިޔާގެ ދަރަންޏެއް ދައުލަތުގެ އޮތް ކަމަށެވެ.

ހުވަދޫ އަތޮޅަށް ކުރައްވާ ދަތުރުގައި ގދ. ހޯނޑެއްދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ އަންގާރަ ދުވަހު ދެއްކެވި ވާހަކަފުޅުގައި މި ހަފްތާ ތެރޭގައި ފިނޭންސް މިނިސްޓްރީން ދިވެހި ވިޔަފާރިތަކަށް 500 އަށް ވުރެ ގިނަ މިލިއަން ރުފިޔާ ދޫކުރާނެ ކަމަށް ވަނީ ރައީސް މުއިއްޒު ވަނީ ވިދާޅުވެފައެވެ.

މިހެން ރައީސް ވިދާޅުވި ނަމަވެސް ސާރުކާރުން ކުންފުނިތަކަށް ދައްކަން ޖެހޭ ފައިސާ ދައްކާނެ ކަމަށް އެކި ފަހަރު މަތިން އެކި ތާރީޚް އެމަނިކުފާނު ވަނީ ދެއްވާފައެވެ.