ކުރީ ސަރުކާރުން ހިންގި ހޯޑެއްދޫ ފެނާއި ނަރުދަމާގެ ޚިދުމަތް އިފްތިތާހުކޮށްފި
ރައީސް މުއިއްޒު މިއަދު އިފްތިތާހުކުރެއްވި ހޯނޑެއްދޫގެ ފެނާއި ނަރުދަމާ ނިޒާމަކީ އިންޑިއާގެ ލައިން އޮފް ކްރެޑިޓްގެ ދަށުން ނިމިދިޔަ އެމްޑީޕީގެ ސަރުކާރުން ގާއިމްކުރި ޕްރޮޖެކްޓެއް
ގދ. ހޯނޑެއްދޫގައި ގާއިމްކުރި ފެނާއި ނަރުދަމާ ނިޒާމު ރައީސް ހުޅުއްވައިދެއްވަނީ. ފޮޓޯ: ރައީސް އޮފީސް
އިންޑިއާގެ ލައިން އޮފް ކްރެޑިޓްގެ ދަށުން ނިމިދިޔަ އެމްޑީޕީގެ ސަރުކާރުން ގދ. ހޯނޑެއްދޫގައި ގާއިމްކުރި ފެނާއި ނަރުދަމާ ނިޒާމު ރައީސް މުހައްމަދު މުއިއްޒު މިއަދު އިފްތިތާހުކޮށްދެއްވައިފި އެވެ.
އެ މަޝްރޫއަކީ އިންޑިއާގެ ލައިން އޮފް ކްރެޑިޓްގެ ދަށުން ކުރިން އޮތް އެމްޑީޕީ ސަރުކާރުން ކުރިއަށް ގެންދިޔަ މަޝްރޫއެކެވެ. އެ ރަށާ އެކު 34 ރަށެއްގެ ފެނާއި ނަރުދަމާގެ މަސައްކަތް ކުރަން ކުރީގެ ސަރުކާރުން ހަވާލުކުރީ ޓްރެވެނީ އިންޖީނިއަރިން އެންޑް އިންޑަސްޓްރީސް ލިމިޓެޑާ އެވެ. ބައެއް ރަށްތަކުގެ މަޝްރޫއުތައް މިހާރު ވަނީ ނިމިފަ އެވެ.
އެ ރަށުގައި މި ދެ ހިދުމަތް ފައްޓަވައިދެއްވީ ރައީސް މުއިއްޒު ދެކުނުގެ ރަށްތަކަށް މިއަދު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ.
ހޯނޑެއްދޫގައި ނަރުދަމާގެ ފަސް ޕަމްޕު ސްޓޭޝަން ގާއިމްކުރުމާއި ސީ އައުޓް ފޯލް އެޅުމާއި މުޅި ރަށުގައި ފެނާއި ނަރުދަމާ ނިޒާމުގެ ވިއުގަ އެޅުމާއި ދުވާލަކު 75 ޓަނުގެ ފެން އުފެއްދޭ ވަރުގެ ދެ އާރުއޯ ޕްލާންޓު ބަހައްޓާފައިވެ އެވެ.
މި ޕްރޮޖެކްޓްގެ ދަށުން ފެން ރައްކާކުރުމަށް ދެ ޓޭންކު ބަހައްޓައި ގޭގެއަށް ފެނާއި ނަރުދަމާގެ ކަނެކްޝަން ގުޅާފައިވެ އެވެ.
ހޯނޑެއްދޫގައި ފެނާއި ނަރުދަމާ ނިޒާމުގެ ގާއިމުކުރުމުގެ މަޝްރޫއުގެ މައިގަނޑު ސްކޯޕްގައި ހިމެނިގެން ނަރުދަމާގެ 5 ޕަމްޕް ސްޓޭޝަން ގާއިމުކުރުމާއި ސީ އައުޓް ފޯލް އެޅުމާއި މުޅި ރަށުގައި ފެނާއި ނަރުދަމާ ނިޒާމު ވިއުގަ އެޅުމުގެ މަސައްކަތް ވަނީ ކޮށްފަ އެވެ.
އެ ރަސްމިއްޔާތުގެ ތެރެއިން ހޯނޑެއްދޫގައި އޭޓީއެމްއެއް ބެހެއްޓުމަށް ރަށު ކައުންސިލާއި ބޭންކް އޮފް މޯލްޑިވްސް (ބީއެމްއެލް) އާ ދެމެދު އެއްބަސްވުމެއްގައި ސޮއިކޮށްފައިވެ އެވެ.
