ޤައުމީ ކެރަމް ޓީމުގެ ސެލެކްޝަން ފަށައިފި

ސީނިއަރ ޤައުމީ ކެރަމް ޓީމުގެ ސެލެކްޝަން ފަށައިފި އެވެ.

ކެރަމް އެސޯސިއޭޝަން އޮފް މޯލްޑިވްސް އިން މައުލޫމާތު ދީފައިވާ ގޮތުގައި މިއަހަރުގެ ފުރަތަމަ ސެލެކްޝަންގައި އެންމެ ފުރަތަމަ ކުރިއަށް ގެންދިޔައީ ޕްރީ ސެލެކްޝަން އެވެ. އޭގެ ތެރެއިން 24 ކުޅުންތެރިޔަކު ވަނީ ސީނިއަރ ޤައުމީ ޓީމުގެ ސެލެކްޝަން އަށް ހޮވިފަ އެވެ. އެއީ 12 ފިރިހެން ކުޅުންތެރިން އަދި 12 އަންހެން ކުޅުންތެރިންނެވެ.

ސީނިއަރ ޤައުމީ ޓީމުގެ ސެލެކްޝަން ކުރިއަށް ދާނީ ހޯމަ ދުވަހުން ފެށިގެން، އަންނަ ބުދަ ދުވަހުގެ ނިޔަލަށެވެ. ސެލެކްޝަންގައި ސީނިއަރ ޤައުމީ ޓީމަށް ނަގާނީ ޖުމުލަ 10 ކުޅުންތެރިންނެވެ. އެއީ ފަސް ފިރިހެން ކުޅުންތެރިންނާއި، ފަސް އަންހެން ކުޅުންތެރިންނެވެ.

ކޮންމެ ހަތަރު މަހުން އެއް ފަހަރު ސީނިއަރ ޤައުމީ ޓީމުގެ ސެލެކްޝަން ކުރިއަށް ގެންދެ އެވެ. އެހެންކަމުން މިއަހަރުގެ އޭޕްރީލް މަހުގެ ތެރޭގައި ސީނިއަރ ޤައުމީ ޓީމުގެ ދެ ވަނަ ސެލެކްޝަނެއް ވެސް އޮންނާނެ އެވެ. އެ ސެލެކްޝަނުން ސީނިއަރ ޤައުމީ ޓީމަށް ހޮވޭ ކުޅުންތެރިން، މިއަހަރުގެ ޖުލައި މަހުގެ ތެރޭގައި ސިންގަޕޫރުގައި އޮންނަ އޭޝިއަން ކެރަމް ޗެމްޕިއަންޝިޕުގައި ވާދަކުރާނެ އެވެ.

ރާއްޖޭގެ ޤައުމީ ކެރަމް ޓީމުން އަންނަނީ މުބާރާތްތަކުގައި ވަދަކޮށް ރަނގަޅު ކާމިޔާބީތަކެއް ހޯދަމުންނެވެ. އެންމެ ފަހުން މިދިޔަ އަހަރުގެ ނޮވެމްބަރު މަހުގެ ތެރޭގައި އެމެރިކާގައި ކުރިއަށް ދިޔަ ކެރަމް ވާރލްޑް ޗެމްޕިއަންޝިޕުގައި ވާދަކޮށް، ރާއްޖޭގެ ކެރަމް ޓީމުން ވަނީ ރަނގަޅު ކާމިޔާބީއެއް ހޯދައިފަ އެވެ. އެ މުބާރާތުގެ ޓީމު އިވެންޓުގައި ރާއްޖޭގެ ފިރިހެން އަދި އަންހެން ޓީމުން ވެސް ވަނީ ލޯ މެޑަލް ހޯދައިފަ އެވެ.

މީގެ އިތުރުން ހަމަ އެ އަހަރު ރާއްޖޭގައި ބޭއްވި އޭޝިއަން ކެރަމް ޗެމްޕިއަންޝިޕްގައި ވެސް ރާއްޖެއިން ވަނީ ރަނގަޅު ނަތީޖާތަކެއް ހޯދައިފައެވެ. އެގޮތުން ޑަބަލްސް އިވެންޓުގައި ރާއްޖޭގެ އިސްމާއީލް އަޒްމީން އަދި ޙަސަން ނާޒިމް ރިހި މެޑަލް ހޯދި އެވެ. ޓީމު އިވެންޓުގައި ރާއްޖޭގެ ފިރިހެން ޓީމު ރިހި މެޑަލް ހޯދިއިރު، އަންހެން ޓީމުން ލޯ މެޑަލް ހޯދި އެވެ. މުބާރާތުގައި ރާއްޖޭގެ ކުޅުންތެރިން ވަނީ ސިންގަލްސް އިވެންޓުގެ ކުއާޓާ ފައިނަލްގައި ވެސް ވާދަކޮށްފަ އެވެ.