ސްޕެއިންގެ ރެއާލް މެޑްރިޑަށް ކުޅެމުން އަންނަ ކްރޮއޭޝިއާގެ މިޑްފީލްޑަރު ލޫކާ މޮޑްރިޗް އަކީ، ފުޓުބޯޅަ އަށް ލިބުނު ހަދިޔާއެއް ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.

އަންޗެލޮޓީ މިހެން ބުނީ ސްޕެނިޝް ކޮޕާ ޑެލް ރޭ މުބާރާތުގައި ރެއާލް އިން ޑިޕޯޓިވާ މިނޭރާއާ ދެކޮޅަށް ކުޅުނު މެޗަށްފަހު ވާހަކަ ދައްކަމުންނެވެ. ރެއާލުން ފަސް ލަނޑުގެ މޮޅެއް ހޯދި އެ މެޗުގައި މޮޑްރިޗް ވަނީ ލަނޑެއް ޖަހައިފަ އެވެ.

އަންޗެލޮޓީ ބުނީ މޮޑްރިޗް އަކީ ފުޓުބޯޅަ އަށް ލިބުނު ވަރަށް ބޮޑު ހަދިޔާއެއް ކަމަށާއި، ޓީމުގެ ސަޕޯޓަރުންނާއި، ކޯޗިން އޮފިޝަލުން އަދި ކުޅުންތެރިންނަށް ވެސް އެކަމުގެ އުފާ އިޙުސާސް ކުރެވޭނެ ކަމަށެވެ. އޭނާ އަށް މޮޑްރިޗް އަކީ ވަރަށް ޚާއްސަ ކުޅުންތެރިޔެއްކަން ފާހަގަ ކުރަމުން އަންޗެލޮޓީ ބުނީ، އެންމެ ބޮޑަށް ފާހަގަކޮށްލެވެނީ މުހިންމު މެޗުތަކަށް މޮޑްރިޗް ވަމުން އަންނަ ތައްޔާރީތައް ކަމަށެވެ.

މީގެ އިތުރުން އަންޗެލޮޓީ ބުނީ ކޮންމެ މެޗަކަށް ވެސް މޮޑްރިޗް ތައްޔާރުވަމުން އަންނަނީ އެ މެޗަކީ ފައިނަލެއްގެ ގޮތުގައި ދެކިގެން ކަމަށެވެ. އަދި އެ ހުރިހާ ކަންކަމާ އެކު މޮޑްރިޗް އަކީ ޒުވާން ކުޅުންތެރިންނަށް ހުރި މިސާލެއް ކަމަށް ވެސް އަންޗެލޮޓީ ވަނީ ބުނެފަ އެވެ. ހަމައެހެންމެ މޮޑްރިޗް އަކީ ރެއާލަށް ވަރަށް މުހިންމު ކުޅުންތެރިޔެއް ކަމަށާއި، ޓީމަށް އެންމެ ބޭނުންވާ ވަގުތުގައި މޮޑްރިޗްގެ އެހީތެރިކަން އަބަދު ވެސް ލިބެމުން އަންނަ ކަމަށް އޭނާ ވަނީ ބުނެފަ އެވެ.

ޓޮޓެންހަމް ދޫކޮށްލުމަށްފަހު މޮޑްރިޗް ރެއާލަށް ބަދަލުވީ 2012 ވަނަ އަހަރު އެވެ. އޭގެ ފަހުން އޭނާ ވަނީ މިހާތަނަށް ރެއާލަށް ކުޅެދިން 562 މެޗުގައި 41 ލަނޑު ޖަހައިފަ އެވެ. ރެއާލާ އެކު މޮޑްރިޗް ވަނީ 28 ތައްޓެއް ވެސް ކާމިޔާބު ކޮށްފަ އެވެ. މޮޑްރިޗް އަކީ ރެއާލްގެ ތާރީޚުގައި ވެސް އެ ޓީމުގެ އެންމެ ކާމިޔާބު ކުޅުންތެރިޔާ އެވެ. ރެއާލާ އެކު މިހާތަނަށް އެންމެ ގިނަ ތަށި ކާމިޔާބު ކޮށްފައިވާ ކުޅުންތެރިޔަކީ ވެސް މޮޑްރިޗް އެވެ.