ފަހަތުން އަރައި ނިއުކާސަލް އިން ޓޮޓެންހަމް ބަލިކޮށްފި

އިނގިރޭސި ޕްރިމިއަރ ލީގުގައި ޓޮޓެންހަމާ ދެކޮޅަށް ކުޅުނު މެޗުން ނިއުކާސަލް ޔުނައިޓެޑު މޮޅުވެއްޖެ އެވެ.

ޓޮޓެންހަމްގެ އަމިއްލަ ދަނޑުގައި އެ ޓީމާ ދެކޮޅަށް ކުޅުނު މެޗު ނިއުކާސަލް އިން ކާމިޔާބު ކުރީ 2-1 އިންނެވެ. އެއީ މެޗުގައި ޓޮޓެންހަމް އިން ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައި ދެ ލަނޑު ޖަހައިގެންނެވެ.

މެޗު ފަށައިގެން ހަތަރު ވަނަ މިނެޓުގައި ޓޮޓެންހަމް އިން ވަނީ ނިއުކާސަލް ކޮޅަށް ލަނޑު ޖަހައި ކުރި ހޯދައިފަ އެވެ. އެ ލަނޑު އެ ޓީމަށް ޖަހައިދިނީ ޑޮމިނިކް ސޮލާންކޭ އެވެ. އޭނާ އެ ލަނޑު ޖެހީ ޕެޑްރޯ ޕޮރޯ ތަނަވަސްކޮށްދިން ފުރުސަތެއްގަ އެވެ. އޭގެ ދެ މިނެޓު ފަހުން ނިއުކާސަލް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ އެންތަނީ ގޯޑަން އެވެ. މެޗުން ނިއުކާސަލް މޮޅުވީ ފުރަތަމަ ހާފުގެ 38 ވަނަ މިނެޓުގައި އަލެކްސެންޑާ އިސާކް ޖެހި ލަނޑުންނެވެ.

ނިއުކާސަލް އަތުން ބަލިވެ ޓޮޓެންހަމް އޮތީ ލީގު ތާވަލްގެ 12 ވަނައިގަ އެވެ. އެއީ މިހާތަނަށް ލީގުގައި އެ ޓީމު ކުޅެފައިވާ 20 މެޗުން 24 ޕޮއިންޓާ އެކު އެވެ. ޓޮޓެންހަމްގެ ނަތީޖާތައް ވަރަށް ބޮޑަށް ދަށްވެފައިވާއިރު، އެ ޓީމުގެ ކޯޗު އަންގޭ ޕޮސްޓެކޮގްލޫ އަށް ޕްރެޝަރު ބޮޑުވަމުން އަންނަ ކަމަށް މީޑިއާ ތަކުގައި ވަނީ ރިޕޯޓުކޮށްފަ އެވެ. މި ސީޒަންގެ ލީގުގައި ޓޮޓެންހަމް މޮޅުވެފައި ވަނީ ހަތް މެޗުންނެވެ. 10 މެޗުން ބަލިވެފައިވާއިރު، ތިން މެޗުން ވަނީ އެއްވަރުވެފަ އެވެ.

ޓޮޓެންހަމް އަތުން މޮޅުވެ ނިއުކާސަލް އޮތީ ލީގު ތާވަލްގެ ފަސް ވަނައިގަ އެވެ. އެއީ އެ ޓީމު ކުޅެފައިވާ 20 މެޗުން 35 ޕޮއިންޓު ހޯދައިގެންނެވެ.