އިންޑިއާގެ ސަލާމަތަކީ އަޅުގަނޑުމެންގެ ސަލާމަތް: ފޮރިން މިނިސްޓަރ އަބްދުﷲ ޚަލީލް
ޚަލީލު ވަނީ ދިވެހިރާއްޖެއަށް އިންޑިއާ އިން ދޭ މާލީ އެހީތެރިކަމަށާއި އިންޑިއާގެ އެހީގައި ހިންގާ ތަރައްގީގެ މަޝްރޫއުތަކަށް ޝުކުރު އަދާ ކުރައްވާފައި
ފޮރިން މިނިސްޓަރ ޚަލީލު އިންޑިއާގެ ވިއޯން އަށް އިންޓަވިއު ދެއްވަނީ
އިންޑިއާގެ ސަލާމަތަކީ ދިވެހިރާއްޖޭގެ ސަލާމަތް ކަމަށް ރާއްޖޭގެ ފޮރިން މިނިސްޓަރ އަބްދުﷲ ޚަލީލު ވިދާޅުވެއްޖެއެވެ.
ޚަލީލު މިހެން ވިދާޅުވީ، އިންޑިއާ އަށް ކުރައްވަމުން ގެންދަވާ ރަސްމީ ދަތުރުފުޅުގައި އިންޑިއާގެ ވިއޯން ނިއުސް އަށް ދެއްވި ބަސްދީގަތުމެއްގައެވެ.
ވިއޯން ނިއުސް އަށް ދެއްވި ބަސްދީގަތުމުގައި އިންޑިއާ ކަނޑުގެ ހަމަޖެހުމަށް ރާއްޖެއިން ކޮމިޓް ވެފައިވާ ކަމަށާއި، ޚާއްޞަކޮށް އިންޑިއާ ކަނޑުގެ ސަލާމަތަކީ އިންޑިއާ ކަނޑުގެ ޤައުމުތަކުގެ ސަލާމަތް ކަށަވަރު ކޮށްދޭނެ ކަމެއް ކަމަށާއި އިންޑިއާގެ ސަލާމަތަކީ ރާއްޖޭގެ ސަލާމަތް ކަމުގައި ރާއްޖޭން ދެކޭ ކަމަށް މިނިސްޓަރ ޚަލީލު ވިދާޅުވިއެވެ.
ފޮރިން މިނިސްޓަރ ޚަލީލު ދިއްލީ އަށް ވަޑައިގަތީ އެ ގައުމުގެ އެކްސްޓާނަލް އެފެއަރޒް މިނިސްޓަރ ޑރ. އެސް. ޖައިޝަންކަރާއެކު މުހިންމު މަޝްވަރާތަކެއް ކުރެއްވުމަށެވެ.
ފޮރިން މިނިސްޓަރ ގެ ހައިސިއްޔަތު އިންޑިއާ އަށް ކުރެއްވި ފުރަތަމަ ރަސްމީ ދަތުރުފުޅުގައި ޚަލީލު ވަނީ ދިވެހިރާއްޖެއަށް އިންޑިއާ އިން ދޭ މާލީ އެހީތެރިކަމަށާއި އިންޑިއާގެ އެހީގައި ހިންގާ ތަރައްގީގެ މަޝްރޫއުތަކަށް ޝުކުރު އަދާ ކުރައްވާފައެވެ.
ޚަލީލު ވިދާޅުވީ، 'މި ސަރަޙައްދު ތަރައްޤީ ވެގެންދާނީ ތަރައްގީގައި އިންޑިއާ އިސްވެގެން ކަމަށާއި "އަޅުގަނޑުމެންނަކީ އެ ތަރައްޤީގެ ބައިވެރިން" ކަމުގައެވެ. ޚަލީލު ވަނީ އިންޑިއާގެ އަވައްޓެރިން ތަރައްގީ ކުރުމަށް އިންޑިއާ އިން ދޭ އެހީތެރި ކަމަށް ޝުކުރުވެރިވާ ކަމަށް ވިދާޅުވެފައެވެ.
