ބަދަލު ދިނީ ކުރީ ސަރުކާރުތަކުން ކަންކަން ކޮށްފައި ހުރިގޮތުން، މައްސަލަތައް ބަލަން އުޅެނީ ސިޔާސީ ހިޔާލު ތަފާތުވާތީ - އަމީރު
3 ޖެނުއަރީ 2025 | ހުކުރު 07:47މައްސަލައިގެ ޖިނާއީ ތަޙުޤީޤެއް ހިންގުމަށް އެންޓި-ކޮރަޕްޝަން ކޮމިޝަންގައި 17 ޑިސެންބަރު 2024 ގައި ވަނީ އަންގާފަ
ކުރީގެ ފިނޭންސް މިނިސްޓަރު އިބްރާހިމް އަމީރު
ނިމިގެންދިޔަ އެމްޑީޕީގެ ވެރިކަމުގައި އެކި ފަރާތްތަކަށް ބަދަލުދޭން ޖެހުނީ ކުރީ ސަރުކާރުން ކަންކަންކޮށްފައި ހުރިގޮތުން ކަމަށާއި، ނޫމަޑިއާއި ނެކްސްބިޒްގެ މައްސަލަތަކަކީ އެމްޑީޕީ ވެރިކަމަށް އައި އިރުވެސް ބަދަލުދޭންޖެހި ނުދީ ހުރި މައްސަލަތައް ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން އަމީރު ވިދާޅުވީ ކުރީ ސަރުކާރުން އަމަލުކޮށްފައި ހުރި ގޮތުންނާއި، އާބިޓްރޭޝަނުން ރާއްޖެއާއި ދެކޮޅަށް ނިންމާފައި ހުރި މައްސަލަތަކަށް ބަދަލުދޭން އެމްޑީޕީން ސަރުކާރާއި ހަވާލުވެ އުފެއްދީ ސެޓެލްމަންޓް ކޮމިޓީއެއް ކަމަށެވެ.
އަމީރު ވިދާޅުވީ ސަރުކާރަށް އައިއިރު ވެސް އަދި އޭރު ކެމްޕެއިން ތެރޭގައި ވެސް ވާހަކަ ދައްކަމުން އައީ ކުރީގެ ރައީސް އަބްދުﷲ ޔާމީންގެ ސަރުކާރުގައި ވަރަށް ގިނައިން ވަރަށް ގިނަ މީހުންނަށް އެކިއެކި ސިޔާސީ ވިސްނުމުގެ ތެރޭގައި ވަރަށް ބޮޑަށް ގެއްލުންތަކެއް ލިބެމުން ދިޔަ ކަމަށެވެ. އަދި ލިބުނު ގެއްލުމުގެ ބަދަލު އިންސާފުވެރި ބަދަލެއް ލިބޭނެ ކަމަށް އޭރު އެމްޑީޕީން ވަކާލާތު ކުރަމުން އައި ކަމަށާއި، ސަރުކާރާ ހަވާލުވެ އެގޮތުން މަސައްކަތްތަކެއް ކުރެވުނު ކަމަށެވެ.
އަމީރު ވިދާޅުވީ ވެރިކަމަށް އައިސް ސެޓެލްމަންޓް ކޮމިޓީއެއް ހެދި އޭގެ ފަހުން ގަވާއިދެއްގެ ދަށުން ބަދަލު ދިނުމުގެ މަސައްކަތްތަކެއް ކުރެވުނީ އޭރު ހެދިފައި ހުރި ގާނޫނާ ގަވާއިދުތަކުގެ ތެރެއިން ކަމަށް އަމީރު ވިދާޅުވިއެވެ.
އަމީރު ވިދާޅުވީ މި ސަރުކާރުގެ ކޮރަޕްޝަންގެ ވާހަކަތަކުގެ މިސްރާބު އޮޅުވާލަން ވެގެން މި ސަރުކާރުން އަލަށް އުފަންކޮށްގެން އުޅޭ މައްސަލަތަކެއްގެ ގޮތުގައި ބަދަލުދިނުމުގެ މައްސަލައިގެ ކަންކަން ހިމެނޭ ކަމަށެވެ. އެޓަރނީ ޖެނެރަލް އޮފީހުން ނެރުނު ލިސްޓުގެ ވެސް އެ ހުރި ކަންތައްތަކަށް ބަލާއިރު އިތުރަށް ވެސް ކަންކަން ހުންނާނެ ކަމަށް އަމީރު ވިދާޅުވިއެވެ. އެގޮތުން ކުރީގެ ސަރުކާރުތަކުން ފަތުރުވެރިކަމުގެ ސިނާޢަތަށް ރަށްތަކެއް ދޫކޮށްފައި ހަމަ ބޭ އިންސާފު ކަންތައްތަކެއް ކޮށްފައި ހުރީމަ އެ ބޭފުޅުންނަށް ވެސް ބަދަލުގެ ގޮތުގައި ސުޕްރީމް ކޯޓުގެ ހުކުމަކާ އެއްކޮށް ބަދަލުދީފައި އޮންނާނެ ކަމަށެވެ.
އޭގެ ތެރޭގައި މި ސަރުކާރަށް ތާއިދުކުރާ މާމިލިގިލީ ދާއިރާގެ މެންބަރު އަދި ވިލާ ގްރޫޕުގެ ޗެއަރމަން ގާސިމް އިބްރާހިމްގެ ވިލާ ކުންފުންޏަށް ވެސް ބަދަލުދީފައިވާ ކަމަށެވެ. ނަމަވެސް އެވާހަކަތައް މި ސަރުކާރުން ދައްކަން ބޭނުން ނުވާކަމަށް އަމީރު ވިދާޅުވިއެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި އުފެއްދެވި ސެޓްލްމަންޓް ކޮމިޓީން އެކި ފަރާތްތަކަށް ބަދަލު ދިން މައްސަލައިގެ ޖިނައީ ތަހުގީގެއް ހިންގަން ރައްޔިތުންގެ މަޖިލީހުގެ މާލިއްޔަތު ކޮމިޓީން ވަނީ 11 ޑިސެމްބަރުގައި ފާސްކޮށްފައެވެ.
ޕީޖީ އޮފީހުން ބުނެފައި ވަނީ 17 ނޮވެންބަރު 2018ން ފެށިގެން 17 ނޮވެންބަރު 2023ށް ދައުލަތުން އެކި ފަރާތްތަކަށް ބަދަލުގެ ގޮތުގައި ދީފައިވާ ފައިސާއާގުޅޭ މައްސަލަ ރައްޔިތުންގެ މަޖިލީހުގެ މާލިއްޔަތު ކޮމިޓީން ދިރާސާކުރެއްވުމަށްފަހު، އެ ކޮމިޓީއަށް ފާހަގަވާ ކަންކަމުގެ ރިޕޯޓު އެ އޮފީހަށް ހުށަހަޅާފައިވާ ކަމަށެވެ.
އެ ރިޕޯޓުގައި، ދައުލަތުގެ އިސް މަޤާމުތަކެއް އަދާކުރައްވާފައިވާ ބައެއްގެ މައްޗަށް ދައުލަތުގެ ފައިސާއާއި މުދާ، އެ ތަކެތީގެ ޙައްޤުވެރިން ފިޔަވައި އެހެން ފަރާތްތަކަށް ލިއްބައިދީ، އަދި ލިއްބައިދިނުމަށް މަސައްކަތްކޮށްފައިވާ ކަމަށް ތުހުމަތުކުރެވޭކަމަށް ބަޔާންކޮށްފައިވެއެވެ. އަދި މިކަމުގައި ދައުލަތުގެ މުވައްޒަފުންތަކެއް ރަސްމީ ވާޖިބުތަކާ ޚިލާފަށް، އަދި ދައުލަތަށް ގެއްލުން ލިބޭ ގޮތަށް ޢަމަލުކޮށްފައިވާ ކަމަށް ތުހުމަތުކުރެވޭ ކަންތައްތަކެއް ރިޕޯޓުގައި ފާހަގަކޮށްފައިވެއެވެ.
އެ ރިޕޯޓުގައިވާ ކަންކަމަށް ޕީޖީ އޮފީހުން ރިޢާޔަތްކުރުމަށްފަހު، އެ ކަންކަމަކީ އެންޓި-ކޮރަޕްޝަން ކޮމިޝަނަށް ތަޙުޤީޤުކުރުމުގެ ބާރު ލިބިފައިވާ ކަންތައްތަކެއްކަމަށް ފެންނާތީ، ރައްޔިތުންގެ މަޖިލީހުގެ ރިޕޯޓުގައި ފާހަގަކޮށްފައިވާ މައްސަލައިގެ ޖިނާއީ ތަޙުޤީޤެއް ހިންގުމަށް އެންޓި-ކޮރަޕްޝަން ކޮމިޝަންގައި 17 ޑިސެންބަރު 2024 ގައި ދަންނަވާފައިވާނެ ކަމަށް އެ އޮފީހުން ބުނެފައެވެ.
އެގޮތުން ކުރީގެ ރައީސް ސާލިހުގެ އިތުރުން، ކުރީގެ އިކޮނޮމިކް މިނިސްޓަރު، އެމްޑީޕީގެ ޗެއަރޕާސަން ފައްޔާޒު އިސްމާއީލް އަދި ރައީސް އޮފީހުގެ ކުރީގެ މިނިސްޓަރު އަލީ ޝިޔާމް، މައްޗަށް ޖިނާއީ ތަހުގީގެއް ހިންގުމަށް ޕްރޮސެކިއުޓަރ ޖެނެރަލްއަށް އެންގުމަށް ވަނީ ފާސްކޮށްފައެވެ.
