ބުރިޖު ހައިވޭގައި ތިން ސައިކަލެއް އެކްސިޑެންޓުވެ 5 މީހަކަަށް އަނިޔާވެއްޖެ
މި އެކްސިޑެންޓްގައި ގަވާއިދާ ޚިލާފަށް ދުއްވި ސައިކަލު ޓޯ ކޮށް، މައްސަލަ ފުލުހުން ގެންދަނީ ތަޙުޤީޤު ކުރަމުން
ހައިވޭގައި ހިނގި އެކްސިޑެންޓް
ބުރިޖު ހައިވޭގައި ތިން ސައިކަލެއް އެކްސިޑެންޓުގެ 5 މީހަކަަށް އަނިޔާވެއްޖެއެވެ.
ފުލުހުން ބުނީ ބްރިޖް ހައިވޭ މާލެއިން ހުޅުމާލެއަށް ދަތުރުކުރާ ފަޅީގައި 3 ސައިކަލު ޖެހި އެކްސިޑެންޓް ވެފައިވާ މައްސަލަ އާދީއްތަ ދުވަހުގެރޭ ދަންވަރު 12:11 ހާއިރު ފުލުހުންނަށް ހުށަހަޅާފައިވާ ކަމަށެވެ.
މި އެކްސިޑެންޓް ހިނގަން މެދުވެރިވީ، ސައިކަލެއް އޯވަރޓޭކް ކުރަން އުޅުމުގެ ތެރޭގައި 2 ސައިކަލު ޖެހި އެކްސިޑެންޓް ވެ، ފަހަތުން އައި އެހެން ސައިކަލެއް ޖެހިގެން ކަމަށް ފުލުހުން ބުނެއެވެ.
މި އެކްސިޑެންޓްގައި އަނިޔާވި 5 މީހުންގެ ތެރެއިން 4 މީހަކަށް ފަރުވާ ދިނުމަށް ފަހު އާދީއްތަ ދުވަހުގެރޭ ވަނީ ދޫކޮށްލާފައެވެ. އަނެއް މީހާ އަށް ޓްރީޓޮޕް ހޮސްޕިޓަލްގައި ދަނީ ފަރުވާދެމުންނެވެ. އެ މީހާގެ ޙާލަތު ސީރިއަސް ނޫން ކަމަށް ހޮސްޕިޓަލުން ފުލުހުންނަށް މަޢުލޫމާތު ދީފައިވެއެވެ.
މި އެކްސިޑެންޓްގައި ގަވާއިދާ ޚިލާފަށް ދުއްވި ސައިކަލު ޓޯ ކޮށް، މައްސަލަ ފުލުހުން ގެންދަނީ ތަޙުޤީޤު ކުރަމުންނެވެ.
