ތިމަރަފުށީގައި ތޫނު އެއްޗަކުން ހަމަލާދީ މީހަކު ޒަޚަމްކޮށްލައިފި
ފަސް މީހަކު އެ ރަށުގެ ގެޔަކަށް ވަދެ ހިންގި މާރާމާރީއެއްގެ މައްސަލަ ރިޕޯޓް ކޮށްފައިވަނީ މިއަދު
ތ.ތިމަރަފުށި | ތިމަރަފުށި އޮންލައިން
ތ. ތިމަރަފުށީގައި ވަޅިއަކުން ހަމަލާދީ، މީހަކު ޒަޚަމްކޮށްލައިފިއެވެ.
މިކަމާއި ގުޅިގެން މީޑިއާތަކަށް ފުލުހުން ހޮނިހުރު ދުވަހު ފޮނުވި މެސެޖެއްގައި ބުނެފައިވަނީ ފަސް މީހަކު އެ ރަށުގެ ގެޔަކަށް ވަދެ ހިންގި މާރާމާރީއެއްގެ މައްސަލަ ރިޕޯޓުކޮށްފައިވާ ކަމަށެވެ.
މި މާރާމާރީގައި އަނިޔާވި މީހާއަށް ތިމަރަފުށީ ހެލްތު ސެންޓަރުގައި ފަރުވާދީނުމަށް ފަހު މިހާރު ދޫކޮށްލައިފައިވާ ކަމަށް ފުލުހުން ބުންޏެވެ.
މައުލޫމާތު ލިބިފައިވާ ގޮތުން މި ހަމަނުޖެހުން ހިނގާފައި ވަނީ އެ ރަށުގެ ޒުވާން ދެ ފިރިހެނެއްގެ މެދުގައެވެ. އެގޮތުން ހަމަނުޖެހުމުގެ ތެރެއިން އެކަކު، އަނެއް މީހާގެ ބުރަކަށްޓަށް ވަޅިން ހަމަލާ ދިން ކަމަށް މައުލޫމާތު ލިބިފައިވެއެވެ.
ފުލުހުން އަންނަނީ އެ މައްސަލަ ތަހުގީގު ކުރަމުންނެވެ. ނަމަވެސް އެ މައްސަލައިގައި މިހާތަނަށް މީހަކު ހައްޔަރުނުކުރާ ކަމަށް ފުލުހުން ބުނެފައިވެއެވެ.
ފުލުހުން އާންމުކޮށްފައިވާ ތަފާސްހިސާބަށް ބަލާއިރު، މި އަހަރުގެ މިހާތަނަށް ޖިސްމާނީ އަނިޔާގެ 694 މައްސަލައެއް ހުށަހަޅާފައިވެއެވެ.
