ރޭސިންގ އެސޯސިއޭޝަން އޮފް ދަ މޯލްޑިވްސްއިން ކުރިއަށްގެންދާ އެންމެ ބޮޑު އެއް ރޭސިންގ އިވެންޓުކަމަށްވާ، ރާސް ޗެމްޕިއަންޝިޕުގެ ހުރިހާ ކަމެއް ކުރިއަށް ގެންދިއުމަށް ކަމާ ބެހޭ ރަސްމީ އިދާރާތަކުން 'އަނގަބަހުން' ހުއްދަދީ، މިއަދު އިވެންޓު ބާއްވަން ތައްޔާރުވެފައިވަނިކޮށް އެ ކަމަށް ހުރަސް އެޅުމުން އެ އެސޯސިއޭޝަނުން ނުރުހުން ފާޅުކޮށްފިއެވެ.
ރޭސިންގ އެސޯސިއޭޝަނުގެ، ދެ ދުވަހަކަށް ބަހައިލައިގެން ކުރިއަށް ގެންދަން ހަމަޖެހިފައިވާ މި އިވެންޓު ބާއްވަނީ ހުޅުމާލެ ދެވަނަ ފިޔަަވައްސަށް އަރަން، ވެމްކޯ ކައިރި އޮންނަ ބްރިޖާ ގުޅިފައިވާ މަގުގައެވެ.
މި ރޭސިންގ ޗެމްޕިއަންޝިޕުގައި ކާރާއި ސައިކަލުގެ 15 ކެޓަގަރީން 72 ރޭސަރުން ރާއްޖޭގެ އެކި ކަންކޮޅުތަކުން ބައިވެރިވެއެވެ.
މަސްދުވަހެއް ކުރިން ކަމާ ގުޅުންހުރި އެންމެ އިސް ފަރާތްތަކުން ދިން ހުއްދައާއެކު މިއަދު އިވެންޓު ބާއްވަން ތައްޔާރުވެފައިވަނިކޮށް އެ ކަން ހުއްޓުވުމުން އެ އެސޯސިއޭޝަނުގެ ކަންބޮޑުވުންތައް ވަނީ "ރާއްޖެ ޓީވީ"އާ ހިއްސާކޮށްފައެވެ.
އެގޮތުން އެ އެސޯސިއޭޝަންގެ ޕީއާރު އަޙުމަދު އިބުރާހީމް (ޕޮއްތު) "ރާއްޖެ ޓީވީ"އަށް ވިދާޅުވީ މި އިވެންޓަކީ ކަމާއި ގުޅުންހުރި އިދާރާތަކާއި އެކު ކުރެވުނު މަޝްވަރާގެ މަތިން ކުރެވުނު މަސައްކަތެއް ކަމަށާއި ނަމަވެސް ފުލުހުން އައިސް އެ އިވެންޓު ކުރިއަށް ގެންދިއަ ނުދީ ހުއްޓުވާފައިވާ ކަމަށެވެ. އަދި އިވެންޓު ހުއްޓުވަން އައި ފުލުހުން އެންގީ ލިޔެކިޔުމަކުން ދީފައިވާ ހުއްދަ ނެތް ނަމަ އިވެންޓު ކުރިއަަށް ނުގެންދެވޭނޭ ކަމަށް އޭނާ ވިދާޅުވިއެވެ.
ރޭސިންގ އެސޯސިއޭޝަނުން ބުނީ މި އިވެންޓުގެ ކަންތަކުގައި ކުޅިވަރައި ބެހޭ ވަޒީރު އަބްދުﷲ ރާފިއު (ރާއްޕެ)ގެ އިތުރުން އެޗްޑީސީ އާއި އެކުވެސް މަސްވަރާތައް ކުރެވުނު ކަމަށެވެ. އަދި މި މަޝްވަރާތަކުގައި އެ ފަރާތްތަކުން ވެސް އަނގަބަހުން ހުއްދަދެއްވި ކަމަށެވެ. ނަމަވެސް އެއްވެސް ލިޔެކިޔުމަކުން މި އިވެންޓު ކުރިއަށް ގެންދަން ހުއްދަ ނުދޭކަމަށް ޕޮއްތު ވިދަޅުވިއެވެ.
ޕޮއްތު ވިދާޅުވީ އެ އިވެންޓު ބާއްވަން އެންމެ ފުރަތަމަ މަޝްވަރާތައް ކުރިއަށް ދިޔައިރު، އެއްވެސް ރަސްމީ އިދާރާއަކުން ލިޔެކިޔުމުން ހުއްދަ ނުދިނީ، މި އަހަރު އޯގަސްޓު މަހު ހުޅުމާލޭ ސެންޓްރަލް ޕާކު ކައިރި ރޭސް ކާރަކާއި ސައިކަލެއް ޖެހި ހިނގި އެކްސިޑެންޓުގައި 23 އަހަރުގެ ޒުވާނަކު ނިޔާވި ހާދިސާއާއި ގުޅިގެން ކަމަށެވެ. އަދި މި ހާދިސާއާއި ރޭސިންގ އެސޯސިއޭޝަން އާއި ގުޅުން ހުރި ކަމަށް އޭރު އެންމެ ބޮޑަށް ތުހުމަތު ކުރެވިފައިވަނީ އެ ހާދިސާ ހިނގަން ދިމާވީ ރެސިންގ ކާރެއް އެ ހާދިސާގެ ތެރޭގައި ހިމެނޭކަމަށް ބުނެއެވެ.
އަދި ގަވައިދާއި ޚިލާފު ބާރު ސްޕިޑުގައި ހިމެނުނު ރޭސިންގ ކާރާއި ސައިކަލް ޖެހި ވި ސީރިއަސް އެކްސިޑެންޓާ ގުޅިގެން، ރައީސް ޑރ. މުޙައްމަދު މުއިއްޒު، ހުޅުމާލޭގައި ރޭސިންގ އާއި ޑްރިފްޓިންގެ ހުއްދަތައް ބާތިލްކުރަން އަންގަވާފައިވާތީ ކަމަށް އެ އެސޯސިއޭޝަންގެ ރައީސް ޝާމިން ވިދާޅުވިއެވެ. އަދި މި އެކްސިޑެންޓާއި ގުޅިގެން އެ އެސޯސިއޭޝަންގެ ހުއްދަ ބާތިލުކުރާތީ އެ ކަމާމެދު ސްޕޯޓްސް މިނިސްޓްރީގައި ސުވާލު އުފެއްދި ކަމަށާއި އެއާއެކު އެ މިނިސްޓްރީން، އެ އެސޯސިއޭޝަނުގެ އެއްވެސް ހުއްދައެއް ބާތިލްނުކުރާނެކަމުގެ ޔަގީންކަން ދިންކަމަށް ވެސް އެ ފަރާތުން ވިދާޅުވިއެވެ.
އެ ސޯސިއޭޝަންގެ ރައީސް މުޙައްމަދު ޝާމިން ވިދާޅުވީ ރޭސިންގ އެސޯސިއޭޝަނުން ހުއްދަ ނަގަނީ ހަމައެކަނި މިފަދަ އިވެންޓުތައް ބާއްވަން އެކަނި ކަމަށާއި އެހެންކަމުން އެއީ އަބަދު ދީފައި އޮންނަ ހުއްދައެއް ނޫންކަމަށެވެ.
އޭނާ ވިދާޅުވީ އިވެންޓު ބާއްވާ ތާރީޚު ކައިރިވުމުން އެޗްޑީސީގައި ހުއްދައަށް އެދުމުން، އެ ކޯޕަރޭޝަނުން އެންގީ، ރައީސް އޮފީހުން އިއުތިރާޒެއް ނެތްކަމުގެ ލިޔުމެއް ނުހޯދެނީސް ހުއްދަ ލިޔުމުން ނުދެވޭނެކަމަށް ކަމަށެވެ.
އެ ކަން ސްޕޯޓްސް މިނިސްޓަރު އަބްދުﷲ ރާފިއުގެ ސަމާލުކަމަށް ގެނައުމުން، ހޯމް މިނިސްޓަރު އަލީ އިހުސާނާއި، ޓްރާންސްޕޯޓު މިނިސްޓަރު މުޙައްމަދު އަމީނާއި، ފުލުހުންގެ ވެރިންނާއި، އެޗްޑީސީގެ ވެރިންނާއެކު ބައްދަލުވުމެއް އޮތްކަމަށް ޝާމިން ވިދާޅުވިއެވެ.
ޝާމިން ވިދާޅުވީ އެ ބައްދަލުވުމުގައި، އަނގަބަހުން ނުރަސްމީކޮށް ދިން ހުއްދައާއެކު އެ މަގުގައި ފަރިތަކުރުން ބާއްވާތާ ވެސް މިހާރު ތިން ހަފުތާ ވެއްޖެކަމަށެވެ. އަދި ރޭސިންގ ވެހިކަލްތައް އިވެންޓު އޮންނަ ތަނަށް ގެނެސްދެނީ ވެސް ފުލުހުންގެ އެސްކޯޓުގައި ކަމަށް ވިދާޅުވިއެވެ. މީގެ އިތުރުން އެޗްޑީސީން، އިވެންޓަށް ބޭނުންކުރާ މަގު ސާފުކޮށްދީ، ސެޓަޕް ވެސް ޖަހައިދިން ކަމަށް އޭނާ ވިދާޅުވިއެވެ.
