މާލެ ސިޓީ ކައުންސިލަށް ފުރަތަމަ ފަހަރަށް އިންޓާރނަލް އޮޑިޓަރަކު އައްޔަންކޮށްފި

މާލެ ސިޓީ ކައުންސިލަށް އިންޓާރނަލް އޮޑިޓަރަކު އައްޔަންކޮށްފިއެވެ.

މިއީ މާލޭ ސިޓީ މޭޔަރ ކަމަށް، މޭޔަރު އާދަމް އާޒިމް ވާދަކުރެއްވި އިރު، މާލެ ސިޓީ ކައުންސިލުން ކުރަމުން ގެންދާ މަސައްކަތް، ދެ ފުށް ފެންނަގޮތަށް ބައްޓަންކުރެއްވުމުގެ ވައުދުގެ ދަށުން އައްޔަންކުރެއްވި އޮޑިޓަރެކެވެ. ހާމަކަން ބޮޑު ގޮތެއްގައި ދެފުށް ފެންނަ، ކޮރޮޕްޝަނަށް މަގުފަހި ނުވާގޮތަށް، މާލެ ސިޓީ ހިންގުމަށް ކުރަމުންދާ މަސައްކަތްޕުޅުގެ ތެރެއިން، މާލެ ސިޓީ ކައުންސިލް އިދާރާއަށް ބޭނުންވާ، އިންޓާނަލް އޮޑިޓަރަކު ހޯދުމަށް އިޢުލާންކުރީ، މިިދިޔަ އޮކްޓޫބަރ މަހުގެތެރޭގައެވެ.

މާލޭ ސިޓީ ކައުންސިލުގައި އިންޓަރނަލް އޯޑިޓަރަކު މަސައްކަތްކުރަން ފެށުމުން، ކައުންސިލް އިދާރާއިން ތައްޔާރުކުރަންޖެހޭ އެކިއެކި އިންޓާރނަލް އޮޑިޓް ރިޕޯޓް ތައްޔާރުކޮށް އިތުރު މަޢުލޫމާތު، މާލޭގެ ރައްޔިތުންނާއި އަދި ގުޅުންހުރި މުއައްސަސާތަކާ ހިއްޞާ ކުރެވެމުން ގެންދެވޭނެއެވެ. މިކަމުގެ ސަބަބުން ނަހަމަ ނުފޫޒާއި ކޮރޮޕްޝަން ހުއްޓުވުމަށް ވަރަށް ބޮޑަށް މަގުފަހިވެގެންދާނެ ކަމަށް ކައުންސިލުން ބުނެއެވެ.

މި ކަމާ ގުޅިގެން މާލެސިޓީގެ މޭޔަރ އާދަމް ޢާޒިމް ވިދާޅުވީ 'ފުރަތަމަ ފަހަރަށް މާލެ ސިޓީ ކައުންސިލުން އިންޓަރނަލް އޮޑިޓަރެއް އައްޔަންކޮށްފައިވާ ކަމަށާއި، މިއީ މާލެ ސިޓީއިން ކުރާ ކަންކަމުގައި ފުރިހަމައަށް ޖަވާބުދާރީވުމަށާއި، އާންމުންގެ އިތުބާރު ހޯދުމަށް އެޅި މުހިންމު ފިޔަވަޅެއް ކަމަށެވެ. އާޒިމް ވިދާޅުވީ ކައުންސިލުން ކުރާ ހުރިހާ ކަމެއްގައި ވެސް ނަޒާހަތްތެރިކަން ކަށަވަރު ކުރައްވާނެ ކަމަށާއި، އިންޓަރނަލް އޮޑިޓަރުގެ ސަބަބުން، މާލެ ސިޓީ ކައުންސިލްގެ މުސްތަޤްބަލު ބައްޓަންވެގެންދާނީ، ދެފުށްފެންނަ ގޮތަށް މަސައްކަތް ކުރާ މުއައްސަސާއެއްގޮތަށް ކަމަށް އާޒިމް ވިދާޅުވިއެވެ.

މާލެ ސިޓީ ކައުންސިލަށް އިންޓަރނަލް އޮޑިޓަރެއްގެ ގޮތުގައި ހަމަޖައްސާފައިވަނީ ކުރޯ މޯލްޑިވްސް އެލްއެލްޕީއާއެވެ. މަސައްކަތުގެ އަގަކީ ޖީ.އެސް.ޓީ އާއިއެކު ޖުމުލަ 466,560.00 (ހަތަރުލައްކަ ފަސްދޮޅަސް ހަހާސް ފައްސަތޭކަ ފަސްދޮޅަސް) ރުފިޔާއެވެ.