އެންސްޕާގެ ސީއީއޯ ހީނާ ވަލީދުގެ އިސްތިއުފާއަށް ގޮވާލައި މުޒާހަރާކޮށްފި
މި ސަރުކާރުގައި އެންސްޕާ އަދި އާސަންދަ ލިބުން ދަތިވެ، މި ޚިދުމަތް ހޯދުމަށް ރައްޔިތުން ތަކުލީފު އުފުލަން ވަނީ ޖެހިފައި
މުޒާހަރާގައި ހުންނަވައި ޖެންޑަރ މިނިސްޓްރީގެ ކުރީގެ ސްޓޭޓް މިނިސްޓަރު އިފްހާމް ހުސައިން ވާހަކަދައްކަވަނީ
އެންސްޕާގެ ސީއީއޯ އަދި ރައީސް އޮފީހުގެ ތަރުޖަމާން ހީނާ ވަލީދުގެ އިސްތިއުފާއަށް ގޮވާލައި، އެ އޮފީސް ކުރިމަތީގައި މުޒާހަރާކޮށްފިއެވެ.
ބުދަ ދުވަހު ކުރިއަށްގެންދިޔަ މުޒާހަރާގައި ހިނާގެ މައްޗަށް ކުރެވޭ ކޮރަޕްޝަންގެ ގިނަ ތުހުމަތުތައް މުޒާހަރާގެ ބައިވެރިން ފާހަގަކޮށްފައިވެއެވެ. މި ތުހުމަތުތަކަށް ސަރުކާރުގެ ފަރާތުން ވެސް ހީނާ ވެސް ޖަވާބުދާރީވެފައިނުވާ ކަމަށާއި، މިއީ ރައްޔިތުން އިންތިހާއަށް ކަންބޮޑުވާ ކަމެއް ކަމަށް މުޒާހަރާގެ ބައިވެރިން ބުނެފައިވެއެވެ.
މުޒާހަރާގެ ބައިވެރިން ބުނީ އެންސްޕާއަކީ ރައްޔިތުންނަށް ޚިދުމަތްދޭ ރައްޔިތުންނާ ވަރަށް ބޮޑަށް ގުޅިފައިވާ މުއައްސަސާއެއް ކަމަށާއި، އެތަނަށް ވަންނަ ފައިސާއަށް ވާނުވާ ނޭނގޭ ކަމަށްވާނަމަ އެތަނާއި ހަވާލު ހުންނަ ބޭފުޅަކު ޖަވާބުދާރީވާންޖެހޭ ކަމަށެވެ. އަދި ރައީސް ޑރ.މުހައްމަދު މުއިއްޒުގެ ސަރުކާރުގައި އެންސްޕާ އަދި އާސަންދަ ލިބުން ދަތިވެ، މި ޚިދުމަތް ހޯދުމަށް ރައްޔިތުން ތަކުލީފު އުފަލަންޖެހުމަކީ ވަރަށް ބޮޑު ކަންބޮޑުވުމެއް ކަމަށެވެ.
ބޭސްފަރުވާ އަށް މިހާރު ސަލާންޖެހުން އިތުރުވެފައިވާކަން ފާހަގަކޮށް މުޒާހަރާގެ ބައިވެރިން ބުނީ އެކިއެކި ސޯޝަލް މީީޑިއާގެ ފްލެޓްފޯމްތަކުގައި އަދި މަގުމަތީގައި އެކި އިވެންޓްތައް ބާއްވައިގެން ބޮޑެތި ބަލިތައް ތަހައްމަލުކުރާ މީހުންނަށް ފައިސާގެ އެހީ ހޯދުމަށް މަސައްކަތް ކުރާާ އާއިލާތައް އިތުރުވެފައިވާ ކަމަށެވެ.
މި މުޒާހަރާގެ އިސް ސަފުގައި ހުންނަވައި، ޖެންޑަރ މިނިސްޓްރީގެ ކުރީގެ ސްޓޭޓް މިނިސްޓަރު އިފްހާމް ހުސައިން ވިދާޅުވީ އެންސްޕާއަކީ އެންމެ ނާޒުކު ހާލަތުގައި ދިރިއުޅޭ ފަރާތްތަކަށް އެހީވާން ހުރި ތަނެއް ކަމަށާއި، ނަމަވެސް މިސަރުކާރުގައި މިހާރު އަޑު އިވިގެންދަނީ ނުކުޅެދުންތެރިކަން ހުންނަ މީހުންނަށް ލިބޭ އެލަވަންސް ކަނޑާލާ އަޑުތައް ކަމަށެވެ.
މީގެ އިތުރުން މުޒާހަރާގެ ބައިވެރިން ބުނީ ސަރުކާރަށް އަދި ރައީސް މުއިއްޒަށް އަޑު އިވެދެން އެންސްޕާ އޮފީސް ކުރިމަތީގައި މުޒާހަރާ ކުރިއަށް ގެންދާނެ ކަމަށެވެ. ހިނާ ޖަވާބުދާރީ ކުރުވާނެ ކަމަށާއި، ރައްޔިތުންނަށް ފިލައިގެން ނޫޅެވޭނެ ކަމަށް މުޒާހަރާގެ ބައިވެރިން ބުނެފައިވެއެވެ. އަދި ހީނާ އިސްތިއުފާ ދެއްވަންޖެހޭ ކަމަށާއި، ނުދޭ ކަމަށްވާނަމަ މަގާމުން ވަކި ކުރުމަށް މުޒާހަރާގެ ބައިވެރިން ގޮވާލާފައިވެއެވެ.
