މިގައުމުގައި އެންސްޕާއިން އެހީތެރިކަމެއް ލިބޭ އެއްވެސް ރައްޔިތެއް މިހާރު ނެތް: އައިކު
25 ޑިސެމްބަރު 2024 | ބުދަ 12:30އެންސްޕާގެ ފައިސާއަށް ވާނުވާ ނޭނގޭ
މުޒާހަރާގައި ހުންނަވައި އެމްޑީޕީގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ އައިކު އަހުމަދު އީސާ ވާހަކަދައްކަވަނީ
މިގައުމުގައި އެންސްޕާއިން އެހީތެރިކަމެއް ލިބޭ އެއްވެސް ރައްޔިތެއް މިހާރު ނެތް ކަމަށް އެމްޑީޕީގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ އައިކު އަހުމަދު އީސާ ވިދާޅުވެއްޖެއެވެ.
ބުދަ ދުވަހު އެންސްޕާ އޮފީސް ކުރިމަތީގައި ކުރިއަށް ގެންދިޔަ މުޒާހަރާގައި ހުންނަވައި އައިކު ވިދާޅުވީ އެންސްޕާއިން މިހާރު އެހީތެރިކަމެއް ލިބޭ އެއްވެސް ރައްޔިތެއް މިގައުމުގައި ނެތް ކަމަށާއި، އެންސްޕާގެ ފައިސާއަށް ވާނުވާ ނޭނގޭ ކަމަށެވެ. ނަމަވެސް 34.8 މިލިއަން ރުފިޔާ އަމިއްލަ ޓީވީ ޗެނަލްއެއް ހެދުމަށް ހަރަދުކޮށްފައިވާ ކަމަށާއި ލިޔެކިއުންތަކުން އެކަން ހާމަވާ ކަމަށް އައިކު ވިދާޅުވިއެވެ.
ރައީސް އޮފީހުގެ ތަރުޖަމާން ހީނާ ވަލީދުގެ މައްޗަށް ގިނަ ތުހުމަތުތަކެއް ކުރެވޭކަން ފާހަގަކުރައްވައި އައިކު ވިދާޅުވީ ހީނާ މަގާމުން ދުރުކުރަންޖެހޭ ކަމަށާއި، ރައީސް ޑރ.މުހައްމަދު މުއިއްޒަށް އަޑު އިވެންދެން މުޒާހަރާ ކުރާނެ ކަމަށެވެ. އަދި މިއަދު ހިނާ އެ މަގާމުގައި ހުންނަވަން ގިނަ ރައްޔިތުން ނުރުހޭ ކަމަށް އޭނާ ވިދާޅުވިއެވެ.
އައިކު ވިދާޅުވީ ހީނާގެ މައްޗަށް ކުރެވޭ ކޮރަޕްޝަންގެ ތުހުމަތުތަކާއި ގުޅިގެން ސަރުކާރުގެ ތެރެއިން ޖަވާބު ހޯދުމަށް މަސައްކަތް ކޮށްފައިވާ ކަމަށާއި، ނަމަވެސް އެއްވެސް ޖަވާބެއް ލިބިފައިނުވާ ކަމަށެވެ. އަދި މަގުމައްޗަށް ނުކުތީ ޖަވާބު ނުލިބުމުން ކަމަށާއި، ނަތީޖާއާ ހަމައަށް ވާސިލްވަންދެން ހިނާއާ ދެކޮޅަށް މުޒާހަރާ ކުރިއަށް ގެންދާނެ ކަމަށް އައިކު ވިދާޅުވިއެވެ.
