މިގައުމުގައި އެންސްޕާއިން އެހީތެރިކަމެއް ލިބޭ އެއްވެސް ރައްޔިތެއް މިހާރު ނެތް ކަމަށް އެމްޑީޕީގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ އައިކު އަހުމަދު އީސާ ވިދާޅުވެއްޖެއެވެ.
ބުދަ ދުވަހު އެންސްޕާ އޮފީސް ކުރިމަތީގައި ކުރިއަށް ގެންދިޔަ މުޒާހަރާގައި ހުންނަވައި އައިކު ވިދާޅުވީ އެންސްޕާއިން މިހާރު އެހީތެރިކަމެއް ލިބޭ އެއްވެސް ރައްޔިތެއް މިގައުމުގައި ނެތް ކަމަށާއި، އެންސްޕާގެ ފައިސާއަށް ވާނުވާ ނޭނގޭ ކަމަށެވެ. ނަމަވެސް 34.8 މިލިއަން ރުފިޔާ އަމިއްލަ ޓީވީ ޗެނަލްއެއް ހެދުމަށް ހަރަދުކޮށްފައިވާ ކަމަށާއި ލިޔެކިއުންތަކުން އެކަން ހާމަވާ ކަމަށް އައިކު ވިދާޅުވިއެވެ.
ރައީސް އޮފީހުގެ ތަރުޖަމާން ހީނާ ވަލީދުގެ މައްޗަށް ގިނަ ތުހުމަތުތަކެއް ކުރެވޭކަން ފާހަގަކުރައްވައި އައިކު ވިދާޅުވީ ހީނާ މަގާމުން ދުރުކުރަންޖެހޭ ކަމަށާއި، ރައީސް ޑރ.މުހައްމަދު މުއިއްޒަށް އަޑު އިވެންދެން މުޒާހަރާ ކުރާނެ ކަމަށެވެ. އަދި މިއަދު ހިނާ އެ މަގާމުގައި ހުންނަވަން ގިނަ ރައްޔިތުން ނުރުހޭ ކަމަށް އޭނާ ވިދާޅުވިއެވެ.
މިއީ ހަމަ ދައުލަތުގެ ނިޒާމުގެ ތެރެއިން ގޮސްފައި މާނީ ލޯންޑަރ ކުރުން ނޫން ކޮންއެއްޗެއްކަން އަޅުގަނޑަކަށް ހަމަ އެއްގޮތަކަށް ވެސް ނޭނގިދާނެ. ހަމަ ދައުލަތުގެ ފައިސާ އާއްމު ރައްޔިތުންގެ ޓެކްސް ފައިސާއިން އެއްފައި މިހެން ހުންނަ ފައިސާ އެބޭފުޅުން އެ ހަރަދަކުރެއްވީ އަމިއްލަ ވިޔަފާރިއަށް. އިންވެސްޓެއް އެކުރެއްވީ އަމިއްލަ ވިޔަފާރިއަށް. މިއީ އެއްވެސް ވަރަކަށް އަޅުގަނޑުމެން ގަބޫލުކުރާނެ ކަމެއް ނޫން. އެބަލައިގަންނާނެ ކަމެއް ވެސް ނޫން. އެހެންވީމަ ރައީސުލްޖުމްހޫރިއްޔާ ޑރ.މުއިއްޒަށް އެއަޑު އިވެންދެން އަޅުގަނޑުމެން މިއަދު އެއްވީ މިތަނަށް އަޅުގަނޑުމެން މި ޑިމާންޑް ކުރަނީ މިކަންތައްތައް ވީހާ ވެސް އަވަހަށް ބަލައި ހީނާ އެންސްޕާގެ ސީއީއޯ މިހާރު މިހާރަށް އިސްތިއުފާ ދެއްވުމަށް. މިފުރުސަތުގައި އަޅުގަނޑު ގޮވާލަން ސަރުކާރަށާއި، ޕީސީބީއަށާއި، ޑރ.މުއިއްޒަށް ވެސް އިސްތިއުފާ ނުދެއްވަންޏާ ވަކިކުރައްވާށޭ.އެމްޑީޕީގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ އައިކު އަހުމަދު އީސާ
އައިކު ވިދާޅުވީ ހީނާގެ މައްޗަށް ކުރެވޭ ކޮރަޕްޝަންގެ ތުހުމަތުތަކާއި ގުޅިގެން ސަރުކާރުގެ ތެރެއިން ޖަވާބު ހޯދުމަށް މަސައްކަތް ކޮށްފައިވާ ކަމަށާއި، ނަމަވެސް އެއްވެސް ޖަވާބެއް ލިބިފައިނުވާ ކަމަށެވެ. އަދި މަގުމައްޗަށް ނުކުތީ ޖަވާބު ނުލިބުމުން ކަމަށާއި، ނަތީޖާއާ ހަމައަށް ވާސިލްވަންދެން ހިނާއާ ދެކޮޅަށް މުޒާހަރާ ކުރިއަށް ގެންދާނެ ކަމަށް އައިކު ވިދާޅުވިއެވެ.
