އޭޑީކޭއަށް ޒިޔާރަތްކުރާ މީހުންނަށް ޕާކިން ސިސްޓަމް ބޭނުން ކުރެވޭނެ އިންތިޒާމު ހަމަޖައްސަނީ
މުވައްޒަފުންގެ ވެހިކަލްތައް މިހާރުވެސް ދަނީ ޕާކު ކުރެވެމުން
އޭޑީކޭ ހޮސްޕިޓަލުގައި ގާއިމް ކުރާ މެކޭނިކަލް ޕާކިން ސިސްޓަމު
އޭޑީކޭ ހޮސްޕިޓަލުގެ ވޯކްވޭ ސަރަހައްދަށް ގެންނަ ބަދަލުތައް ނިމުމުން ޕާކިން ޕެސިލިޓީ އާންމުންނަށް ބޭނުން ކުރެވޭގޮތަށް ހުޅުވާލާނެ ކަމަށް އެ ހޮސްޕިޓަލުން ބުނެފި އެވެ.
އޭޑީކޭގެ މެނޭޖިންގ ޑިރެކްޓަރ އަހުމަދު އަފްއާލް ވިދާޅުވީ، އެ ހޮސްޕިޓަލުން ޚަރަދުކޮށްގެން ގާއިމް ކޮށްފައިވާ މެކޭނިކަލް ޕާކިން ސިސްޓަމުގެ މަސައްކަތް ނިމިފައިވާ ކަމަށެވެ. އަދި އެ ސިސްޓަމުގައި އޭޑީކޭގެ މުވައްޒަފުންގެ ވެހިކަލް ޕާކު ކުރަމުންދާ ކަމަށެވެ. ޑޮކްޓަރަށް ދައްކަން އަންނަ ފަރާތްތަކަށް، ފީއެއް ދައްކައިގެން ޕާކްކުރެވޭނެ އިންތިޒާމު ހަމަޖައްސާނެ ކަމަށް ވެސް އޭނާ ވިދާޅުވި އެވެ. އެގޮތަށް އާންމުންނަށް ޕާކު ކުރުމުގެ ފުރުސަތު ހުޅުވާލާނީ، އޭޑީކޭ އަށް ވަންނަ ސަރަހައްދަށް ގެންނަމުންދާ ބަދަލުތައް ގެނައުމަށް ފަހު ކަމަށް އަފްއާލް ވިދާޅުވި އެވެ.
ފަސް ބުރީގެ މި ޕާކިން ސިސްޓަމްގައި ހަތަރު ފުރޮޅުލީ 19 އުޅަނދު ޕާކް ކުރެވޭނެ އެވެ. މި ފަދަ ސިސްޓަމެއް ގާއިމް ކުރީ އެ ސަރަހައްދުގައި މިހާރަށް ވުރެ ރަގަޅަށް ވެހިކަލް ޕާކު ކުރެވޭނެ ނިޒާމެއް ގާއިމް ކުރުމަށް ކަމަށް އޭޑީކޭ ހޮސްޕިޓަލުން ބުނެ އެވެ.
އޭޑީކޭއިން ޕާކިން ސިސްޓަމެއް ގާއިމް ކޮށްފައިވާއިރު، ސަރުކާރުން ވަނީ ވެލާނާގޭ ސަރަހައްދުގައި ބެހެއްޓިފައިވާ އޮޓަމޭޓަޑް ޕާކިން ސިސްޓަމްގެ ބޭނުން މިހާރު ވަނީ ކުރަން ފަށާފަ އެވެ.
މާލޭގެ އެކި ސަރަހައްދުތަކުގައި 20 މެކޭނިކަލް ޕާކިން ސިސްޓަމް ގާއިމް ކުރާނެ ކަމަށް ހައުސިން މިނިސްޓްރީން ވަނީއިއުލާނު ކޮށްފަ އެވެ. މީގެ ކޮންމެ ސިސްޓަމެއްގައި 10 ކާރު ޕާކު ކުރެވޭ އިރު ސައިކަލް ޕާކު ކުރާ މިފަދަ ސިސްޓަމެއްގައި 100 ސައިކަލް ޕާކް ކުރެވޭނެ ކަމަށް ވެސް އެމިނިސްޓްރީން ވަނީ ހާމަކޮށްފަ އެވެ
